Homeຂ່າວພາຍ​ໃນພິທີມອບ-ຮັບໜ້າທີ່ ເລຂາຄະນະພັກ, ລັດຖະມົນຕີ ກະຊວງການເງິນ

ພິທີມອບ-ຮັບໜ້າທີ່ ເລຂາຄະນະພັກ, ລັດຖະມົນຕີ ກະຊວງການເງິນ

Published on

ໃນວັນທີ 3 ກຸມພາ 2023 ທີ່ກະຊວງການເງິນ, ຈັດພິທີມອບ-ຮັບໜ້າທີ່ ເລຂາຄະນະພັກ, ລັດຖະມົນຕີ ກະຊວງການເງິນ ລະຫວ່າງ ທ່ານ ບຸນໂຈມອຸບົນປະເສີດ ກຳມະການສູນກາງພັກ, ເລຂາຄະນະບໍລິຫານງານພັກ ລັດຖະມົນຕີກະຊວງການເງິນ (ຜູ້ເກົ່າ) ແລະ ທ່ານ ສັນຕິພາບ ພົມວິຫານ ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີກະຊວງການເງິນ (ຜູ້ໃໝ່) ເພື່ອສືບຕໍ່ນໍາພາ-ຊີ້ນຳ ວຽກງານຕາມການຈັດຕັ້ງພັກ-ລັດມອບໝາຍໃຫ້ ໂດຍການເຂົ້າຮ່ວມຂອງ ທ່ານ ສອນໄຊ ສີພັນດອນ ກຳມະການກົມການເມືອງສູນກາງພັກ, ນາຍົກລັດຖະມົນຕີ ແຫ່ງ ສປປ ລາວ, ມີຜູ້ຕາງໜ້າຈາກຄະນະຈັດຕັ້ງສູນກາງພັກ, ພ້ອມດ້ວຍອະດີດການນຳຂັ້ນສູງ ແລະ ພະນັກງານຫລັກແຫລ່ງກະຊວງການເງິນ ເຂົ້າຮ່ວມ.

ໃນພິທີ, ທ່ານ ນາງ ບຸດສະດີ ທະນະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ ໄດ້ຕາງໜ້າຈາກຄະນະຈັດຕັ້ງສູນກາງພັກ ຜ່ານບັນດານິຕິກຳຕ່າງໆ ໂດຍສະເພາະເອກະສານວ່າດ້ວຍການຍົກຍ້າຍ ແລະ ແຕ່ງຕັ້ງ ເປັນຕົ້ນແມ່ນຄຳສັ່ງ ຂອງກົມການເມືອງສູນກາງພັກ ສະບັບເລກທີ 02/ກມສພ, ວັນທີ 26 ມັງກອນ 2023 ວ່າດ້ວຍການຍົກຍ້າຍພະນັກງານການນຳຂັ້ນສູງໄປຮັບໜ້າທີ່ໃໝ່ ແລະ ລັດຖະດຳລັດຂອງປະທານປະເທດວ່າດ້ວຍການຍົກຍ້າຍສະມາຊິກລັດຖະບານ ໂດຍຍົກຍ້າຍສະຫາຍ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະພັກກະຊວງ, ລັດຖະມົນຕີກະຊວງການເງິນ (ຜູ້ເກົ່າ) ໄປຮັບໜ້າທີ່ໃໝ່ຢູ່ແຂວງສະຫວັນນະເຂດ. ພ້ອມດຽວກັນນີ້, ຍັງໄດ້ຜ່ານ ມະຕິຕົກລົງຂອງຄະນະເລຂາທິການສູນກາງພັກ ສະບັບເລກທີ 280/ຄລສພ ລົງວັນທີ 26 ມັງກອນ 2023 ວ່າດ້ວຍການແຕ່ງຕັ້ງກຳມະການ ຄະນະພັກ ຄະນະປະຈຳພັກກະຊວງການເງິນ, ມະຕິຕົກລົງຂອງກົມການເມືອງສູນກາງພັກ ສະບັບເລກທີ 07/ກມສພ ລົງວັນທີ 26 ມັງກອນ 2023 ວ່າດ້ວຍການແຕ່ງຕັ້ງເລຂາຄະນະບໍລິຫານງານພັກກະຊວງການເງິນ ແລະ ລັດຖະດຳລັດຂອງປະທານປະເທດ ສະບັບເລກທີ 010/ປປທ ລົງວັນທີ 31 ມັງກອນ 2023 ວ່າດ້ວຍການແຕ່ງຕັ້ງສະມາຊິກລັດຖະບານ ໂດຍແຕ່ງຕັ້ງ ສະຫາຍ ສັນຕິພາບ ພົມວິຫານ ກຳມະການສູນກາງພັກ ເປັນກຳມະການຄະນະພັກ ແລະ ຄະນະປະຈຳກະຊວງການເງິນ ແລະ ເປັນລັດຖະມົນຕີກະຊວງການເງິນ (ຜູ້ໃໝ່).

ໂອກາດນີ້, ທ່ານ ສອນໄຊ ສີພັນດອນ ກໍໄດ້ໃຫ້ກຽດໂອ້ລົມ ໂດຍໄດ້ເນັ້ນບາງບັນຫາໃຫ້ຄະນະນຳກະຊວງການເງິນ ສຸມໃສ່ຈັດຕັ້ງປະຕິບັດໃນຕໍ່ໜ້າ ເປັນຕົ້ນ ການຮັກສາສະຖຽນລະພາບທາງດ້ານເສດຖະກິດ ໃຫ້ໝັ້ນທ່ຽງ ໂດຍສະເພາະ ອັດຕາເງິນເຟີ້, ອັດຕາແລກປ່ຽນ, ລາຄານໍ້າມັນ; ສືບຕໍ່ຈັດຕັ້ງປະຕິບັດວາລະແຫ່ງຊາດຢ່າງຫ້າວຫັນ ໂດຍສະເພາະ ຊຸກຍູ້ການຜະລິດເປັນສິນຄ້າສົ່ງອອກ ເພື່ອທົດແທນການນຳເຂົ້າ; ການຄຸ້ມຄອງເງິນຕາ, ຫັນເປັນທັນສະໄໝ; ຄຸ້ມຄອງລາຍຮັບ-ລາຍຈ່າຍ ຕິດພັນກັບການປະຍັດມັດທະຍັດ; ການແກ້ໄຂໝີ້ສິນພາຍໃນ ໂດຍສະເພາະໂຄງການລົງທຶນຂອງລັດ ແລະ ໜີ້ສິນຂອງລັດວິສາຫະກິດຕ່າງໆ; ໃຫ້ກະຊວງການເງິນກວດກາຄືນ ໄຈ້ແຍກແຕ່ລະສັນຍາໂຄງການ ເນື່ອງຈາກມີບາງໂຄງການສາມາດສ້າງລາຍຮັບໄດ້ຫລາຍ ເພື່ອຫັນບັນດາໂຄງການເຫລົ່ານີ້ໃຫ້ມີສ່ວນຮ່ວມເພື່ອຊ່ວຍລັດຖະບານ; ເອົາໃຈໃສ່ຈັດເກັບລາຍຮັບທາງດ້ານງົບປະມານ, ອັດຕາການຮົ່ວໄຫລ ຕ້ອງຫັນເປັນທັນສະໄໝໃຫ້ກວ້າງຂວາງ ແລະ ທົ່ວເຖິງແຕ່ສູນກາງລົງຫາທ້ອງຖິ່ນຕື່ມ.

ພ້ອມກັນນີ້, ການພັດທະນາເຄື່ອງມືທີ່ທັນສະໄໝເຂົ້າໃນການຄຸ້ມຄອງການຈັດເກັບລາຍຮັບ ດ້ວຍລະບົບທີ່ທັນສະໄໝ ລວມທຸກຂົງເຂດທີ່ມີແຫລ່ງລາຍຮັບ ເພື່ອອັດຊ່ອງວ່າງການຮົ່ວໄຫລ; ການເກັບລາຍຮັບຈາກພາສີທີ່ດິນ ຍັງຂາດຂໍ້ມູນຂອງທີ່ດິນ ເພາະວ່າ ທີ່ດິນໄດ້ແບ່ງອອກເປັນຫລາຍປະເພດທີ່ດິນ ເຮັດໃຫ້ການເກັບອາກອນລາຍໄດ້ ຍັງບໍ່ທັນຖືກຕ້ອງໃນບາງທ້ອງຖິ່ນ ແລະ ການເກັບຄ່າທຳນຽມປະຈຳປີ ຍັງບໍ່ທັນຄົບຖ້ວນຕາມເວລາ.
ຂ່າວ: ມະນີທອນ
ພາບ: ກະຊວງການເງິນ

ບົດຄວາມຫຼ້າສຸດ

ທ່ານ ອາລຸນໄຊ ສູນນະລາດ ກຳມະການສູນກາງພັກ ເລຂາຄະນະບໍລິຫານງານພັກແຂວງຈໍາປາສັກ ໄດ້ຕ້ອນຮັບ ທ່ານ ເຫຼັກໄຫຼ ສີວິໄລ ກໍາມະການສູນກາງພັກ ລັດຖະມົນຕີກະຊວງໂຍທາທິການ ແລະ ຂົນສົ່ງ (ຍທຂ)...

ສປປ ລາວ ເຂົ້າຮ່ວມເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ (OAC)

ໃນວັນທີ 5 ພະຈິກ 2026 ທີ່ຜ່ານມາ, ສປປ ລາວ ໄດ້ເຂົ້າຮ່ວມການເປັນສະມາຊິກເຄືອຂ່າຍພັນທະມິດດ້ານທຸລະກິດປະຊາສຳພັນໃນອາຊີ ຫຼື One Asia Communications (OAC) ໃນເວທີປຶກສາຫາລືດ້ານການສື່ສານ...

ແກ້ໄຂຫຼາຍບັນຫາ ນະຄອນຫຼວງວຽງຈັນ ແກ້ໄຂບັນຫາຄວາມທຸກຍາກ ການຂາດແຄນຄູສອນ ການບໍລິຫານຈັດການຂີ້ເຫຍື້ອ

ກອງປະຊຸມສະໄໝສາມັນ ເທື່ອທີ 2 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ V ໄດ້ດໍາເນີນມາຮອດວັນທີ 13 ພະຈິກ 2026 ໄດ້ປິດລົງດ້ວຍຜົນສໍາເລັດອັນຈົບງາມ ພາຍໃຕ້ການເປັນປະທານຂອງ ທານ...

ກົດລະບຽບພາຍໃນ, ບໍ່ຈອດຊ້ອນຄັນ ຫຼື ກີດຂວາງທາງເຂົ້າ-ອອກ, ບໍ່ຈອງບ່ອນຈອດລົດສາທາລະນະດ້ວຍວັດຖຸ ແລະ ບໍ່ຫຼົບຫຼີກການຊຳລະຄ່າບໍລິການ.

ການຊອກຫາບ່ອນຈອດລົດໃນຕົວເມືອງຍັງກາຍເປັນບັນຫາທີ່ສ້າງຄວາມຫຍຸ້ງຍາກໃຫ້ແກ່ຜູ້ຂັບຂີ່ ໂດຍສະເພາະ ການຈອດລົດບໍ່ເປັນລະບຽບ, ທັງກີດຂວາງການສັນຈອນ ແລະ ສ່ຽງຕໍ່ການເກີດອຸບັດຕິເຫດ ເພື່ອແກ້ໄຂບັນຫາດັ່ງກ່າວ. ດັ່ງນັ້ນນະຄອນຫຼວງວຽງຈັນ (ນວ) ຈຶ່ງໄດ້ຮ່າງຂໍ້ຕົກລົງວ່າດ້ວຍ ການຄຸ້ມຄອງ ແລະ ພັດທະນາສະຖານທີ່ຈອດລົດ ເພື່ອວາງລະບຽບການຈອດລົດໃຫ້ເປັນລະບົບ...