ຈີນລະງັບການອອກວີຊ່າໄລຍະສັ້ນໃຫ້ກັບຜູ້ເດີນທາງຈາກເກົາຫຼີໃຕ້ ແລະ ຍີ່ປຸ່ນ ເພື່ອຕອບໂຕ້ການຈຳກັດດ້ານໂຄວິດຂອງ 2 ປະເທດທີ່ເຮັດຕໍ່ນັກທ່ອງທ່ຽວຈີນ.
ສຳນັກຂ່າວ abc australia news ໄດ້ລາຍງານວ່າ: ສະຖານທູດຈີນປະຈຳກຸງໂຊ ເກົາຫຼີໃຕ້ ລະບຸວ່າ ໄດ້ລະງັບການອອກວີຊ່າສຳລັບຄົນເກົາຫຼີໃຕ້ທີ່ຈະເດີນທາງເຂົ້າຈີນ ໂດຍທາງຍີ່ປຸ່ນກໍລາຍງານວ່າຈີນໄດ້ບັງຄັບໃຊ້ມາດຕະການນີ້ຄືກັນ.
ທັ້ງນີ້ ກໍເພື່ອເປັນການຕອບໂຕ້ ເຊິ່ງລັດຖະບານຈີນກ່າວວ່າ ມາດຕະການນີ້ຈະຍັງຢູ່ຕໍ່ໄປຈົນກວ່າຈະມີການຍົກເລີກຂໍ້ຈຳກັດການເຂົ້າປະເທດທີ່ເລືອກປະຕິບັດຕໍ່ຈີນ.
ໃນອາທິດແລ້ວນີ້ ເກົາຫຼີໃຕ້ໄດ້ຢຸດຕິການອອກວີຊ່ານັກທ່ອງທ່ຽວສຳລັບຜູ້ທີ່ມາຈາກຈີນ ເຊິ່ງກະຊວງການຕ່າງປະເທດຈີນກໍບໍ່ພໍໃຈກັບມາດຕະການນີ້.
ທາງດ້ານຍີ່ປຸ່ນອະນຸຍາດໃຫ້ນັກທ່ອງທ່ຽວຈີນເຂົ້າປະເທດໄດ້ແລ້ວ ຖ້າຜົນກວດໂຄວິດເປັນລົບ.
ໜ່ວຍງານຄວບຄຸມ ແລະ ປ້ອງກັນພະຍາດຂອງເກົາຫຼີໃຕ້ໄດ້ລາຍງານວ່າ ຈຳນວນ 1 ສ່ວນ 3 ຂອງຜູ້ເດີນທາງມາຈາກຈີນທັງໝົດແມ່ນຖືກກວດພົບວ່າຕິດເຊື້ອໂຄວິດ-19 ກ່ອນທີ່ຈະມີການອອກມາດຕະການຄວບຄຸມໂຄວິດ.
ມາດຕະການນີ້ຈະຖືກນຳໃຊ້ຢ່າງໜ້ອຍຈົນສິ້ນສຸດເດືອນນີ້ ເຊິ່ງເຮັດໃຫ້ນັກວິທະຍາສາດວິເຄາະສາຍພັນໃໝ່ທີ່ອາດຈະມາຈາກຈີນ.
ໃນຂະນະນີ້ ເກົາຫຼີໃຕ້ກໍອະນຸຍາດໃຫ້ພຽງແຕ່ນັກທຸລະກິດ ຫຼື ນັກການທູດຈາກຈີນເທົ່ານັ້ນທີ່ເຂົ້າປະເທດໄດ້ເຊິ່ງພວກເຂົາກໍຕ້ອງໄດ້ຮັບການກວດໂຄວິດເປັນລົບກ່ອນ.