ວັນທີ 01 ພະຈິກ 2022 ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ພ້ອມຄະນະໄດ້ລົງຕິດຕາມ ການກໍ່ສ້າງໂຄງການຊົນລະປະທານ ຢູ່ບ້ານຊຽງຫວາງ ເມືອງໜອງບົກ ເຊິ່ງໂຄງການດັ່ງກ່າວແມ່ນໄດ້ຮັບການຈັດແບ່ງທຶນຊ່ວຍເຫຼືອລ້າ ຈາກລັດຖະບານ ສສ ຫວຽດນາມ ແລະ ເປັນໂຄງການທີ່ມີຄວາມໝາຍ, ຄວາມສຳຄັນທາງດ້ານເສດຖະກິດ, , ວັດທະນະທຳ, ສັງຄົມ ແລະ ເປັນໜຶ່ງໃນບັນດາກິດຈະການກໍ່ສ້າງ ທີ່ເປັນເຄື່ອງໝາຍ ສະແດງໃຫ້ເຫັນເຖິງນໍ້າໃຈສາມັກຄີຮັກແພງ ຖານອ້າຍນ້ອງສອງຊາດ ລາວ-ຫວຽດນາມ ເປັນການປະກອບສ່ວນຮັດແໜ້ນ ແລະ ເພີ່ມທະວີສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ເວົ້າສະເພາະກໍ່ຄືສອງແຂວງ ຄຳມ່ວນ-ຮ່າຕິ່ງ. ເຊິ່ງໂຄງການດັ່ງກ່າວລວມມີມູນຄ່າທັງໝົດ 290 ຕື້ດົງ.

ໃນນີ້ແມ່ນທຶນຊ່ວຍເຫຼືອລ້າຈາກລັດຖະບານ ສສ ຫວຽດນາມ ຈຳນວນ 263 ຕື້ດົງ ແລະ ທຶນສົມທົບຂອງລັດຖະບານ ສປປ ລາວ ຈຳນວນ 27 ຕື້ດົງ. ເປັນໂຄງການກໍ່ສ້າງຄົບວົງຈອນ ແລະ ມີທ່າແຮງທີ່ຈະກ້າວໄປສູ່ການຜະລິດກະສິກຳທີ່ນໍາໃຊ້ເຕັກນິກອັນໃໝ່ໆ ເພື່ອຍົກສູງສະມັດຕະພາບການຜະລິດໃຫ້ສູງຂຶ້ນ ເພື່ອຄໍ້າປະກັນທາງດ້ານສະບຽງອາຫານ ແລະ ເປັນສິນຄ້າ. ໂຄງການດັ່ງກ່າວແມ່ນໄດ້ເລີ່ມລົງມືຈັດຕັ້ງປະຕິບັດກໍ່ສ້າງໃນເດືອນ ເມສາ 2022 ປະກອບມີ: ການກໍ່ສ້າງລະບົບຫົວງານຈັກສູບນໍ້າດ້ວຍໄຟຟ້າ, ການກໍ່ສ້າງປ້ອງກັນຕາຝັ່ງເຈື່ອນໃນເຂດຫົວງານ, ກໍ່ສ້າງຫ້ອງການກຸ່ມຜູ້ຊົມໃຊ້ນໍ້າ, ກໍ່ສ້າງຄອງ ເໝືອງແມ່ 1 ຄອງ ປະກອບມີ 2 ເສັ້ນ, ມີຄວາມຍາວ 2.996 ແມັດ, ກໍ່ສ້າງຄອງເໝືອງຂັ້ນ 2 ມີ 7 ເສັ້ນ ຄວາມຍາວ 20.665 ແມັດ ໂດຍກວມເອົນຈໍານວນ 4 ບ້ານຄື: ບ້ານສອງເໝືອງເໜືອ, ສອງເໝືອງໃຕ້, ກຸດຈັບ ແລະ ບ້ານຊຽງຫວາງ ເມືອງໜອງບົກ ລວມມີເນື້ອທີ່ 500 ເຮັກຕາ.

ໂດຍແມ່ນບໍລິສັດ ຫຸ້ນສ່ວນສະຖາປັດຕະຍະກໍາ ແລະ ການຄ້າ ເປັນຜູ້ຮັບເໝົາກໍ່ສ້າງ ເຊິ່ງມີໄລຍະເວລາໃນການຈັດຕັ້ງປະຕິບັດການກໍ່ສ້າງໃຫ້ສຳເລັດພາຍໃນ 655 ວັນ ນັບແຕ່ມື້ເລີ່ມລົງມືກໍ່ສ້າງ. ມາຮອດປະຈຸບັນການກໍ່ສ້າງແມ່ນປະຕິບັດໄດ້ປະມານ 15% ຖ້າທຽບໃສ່ໄລຍະ ແລະ ເວລາທີ່ຈັດຕັ້ງປະຕິບັດແມ່ນຍັງມີຄວາມຊັກຊ້າ ອັນເນື່ອງມາຈາກໄລຍະຂອງການລົງມືຈັດຕັ້ງປະຕິບັດໃນຊ່ວງໄລຍະຜ່ານມາແມ່ນຢູ່ໃນຊ່ວງລະດູຝົນ ເຮັດໃຫ້ການກໍ່ສ້າງມີຄວາມຫຍຸ້ງຍາກ.

ໂອກາດນີ້ ທ່ານເຈົ້າແຂວງຄຳມ່ວນ ໄດ້ມີຄຳເຫັນຊີ້ນຳ ໃຫ້ບໍລິສັດຜູ້ຮັບເໝົາແມ່ນໃຫ້ເລັ່ງການກໍ່ສ້າງໃນບັນດາ ໜ້າວຽກຕ່າງໆໃຫ້ມີຄວາມຄືບໜ້າ ພ້ອມທັງຮັບປະກັນທາງດ້ານຄຸນນະພາບ, ຄະນະຮັບຜິດຊອບທັງສອງຝ່າຍ ລາວ-ຫວຽດນາມ ສົມທົບກັບບໍລິສັດ, ອຳນາດການປົກຄອງ ແລະ ພາກສ່ວນທີ່ກ່ຽວຂ້ອງ ຮ່ວມປຶກສາຫາລືບັນຫາທີ່ສົ່ງຜົນກະທົບຕໍ່ປະຊາຊົນໃຫ້ໄດ້ຮັບການແກ້ໄຂ, ມີການກຳນົດເສັ້ນທາງນໍາໃຊ້ໃນການຂົນສົ່ງວັດຖຸອຸປະກອນ ໂດຍສະເພາະລົດບັນທຸກໜັກ ເພື່ອບໍ່ໃຫ້ເສັ້ນທາງມີການເປ່ເພຫຼາຍເສັ້ນ, ໂດຍມອບໃຫ້ຄະນະຮັບຜິດຊອບ ຊ່ວຍຕິດຕາມ, ຊຸກຍູ້ ແລະ ອຳນວຍຄວາມສະດວກໃນດ້ານຕ່າງໆແກ່ບໍລິສັດຜູ້ຮັບເໝົາ ເພື່ອເຮັດໃຫ້ໂຄງການດັ່ງກ່າວໄດ້ຮັບການຈັດຕັ້ງປະຕິບັດສຳເລັດຕາມແຜນການທີ່ວາງໄວ້.