ພິທີສະເຫລີມສະຫລອງ ວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ(ສນຫລ) ຄົບຮອບ 20 ປີ ໄດ້ຈັດຂຶ້ນໃນວັນທີ 9 ກັນຍາ ທີ່ສະໂມສອນໃຫຍ່ການເມືອງກອງທັບ ໂດຍເປັນກຽດເຂົ້າຮ່ວມຂອງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສ ປປ ລາວ, ປະທານກິດຕິມະສັກ ສະຫະພັນນັກຮົບເກົ່າແຫ່ງຊາດລາວ, ພາຍໃຕ້ການເປັນປະທານຂອງ ສະຫາຍ ພົນໂທ ແສງນວນ ໄຊຍະລາດ ເລຂາຄະນະບໍລິຫານງານພັກ, ປະທານ ສນຫລ, ສະຫາຍ ພັນເອກ ພິເສດ ຫວໍວັນຖົງ ທີ່ປຶກສາທູດຝ່າຍປ້ອງກັນຊາດ ສສ ຫວຽດນາມປະຈໍາ, ມີບັນດາ ສະຫາຍ ກຳມະການກົມການເມືອງສູນກາງພັກ, ກຳມະການສູນກາງພັກ ແລະ ແຂກຖືກເຊີນເຂົ້າຮ່ວມ.

ສະຫາຍ ພົນໂທ ແສງນວນ ໄຊຍະລາດ ໄດ້ກ່າວວ່າ: ຜົນງານທີ່ພົ້ນເດັ່ນຂອງ ສນຫລ ໃນຕະຫລອດໄລຍະ 20 ປີຜ່ານມາ, ຄະນະນຳສະຫະພັນນັກຮົບເກົ່າແຕ່ລະຂັ້ນໄດ້ຖືສຳຄັນ ແລະ ເອົາໃຈໃສ່ເຮັດໜ້າທີ່ວຽກງານສຶກສາອົບຮົມການເມືອງ-ນຳພາແນວຄິດ ຕໍ່ບັນດາສະຫາຍນັກຮົບເກົ່າ, ພະນັກງານ-ລັດຖະກອນດ້ວຍຫລາຍຮູບຫລາຍວິທີ; ກ່ອນອື່ນໝົດແມ່ນໄດ້ຫັນລົງຮາກຖານ, ເກັບກຳສະພາບການເມືອງແນວຄິດ, ຮັບຟັງຄຳຄິດຄຳເຫັນຂອງແຕ່ລະເປົ້າໝາຍ; ຈັດຕັ້ງເຜີຍແຜ່ເຊື່ອມຊຶມແນວທາງແຜນນະໂຍບາຍ, ມະຕິ, ຄຳສັ່ງຂອງພັກ, ລະບຽບກົດໝາຍຂອງລັດ; ຈັດຕັ້ງປາຖະກະຖາມູນເຊື້ອ, ເຜີຍແຜ່ສະ ພາບການ, ໂຮມຊຸມນຸມສະເຫລີມສະຫລອງ ວັນປະຫວັດສາດສຳຄັນຂອງຊາດ, ຂອງພັກ-ລັດ, ຂອງກຳ ລັງປະກອບອາວຸດ ແລະ ຂອງອົງການຕົນ; ຈັດຕັ້ງເຊື່ອມຊຶມມະຕິ, ຄຳສັ່ງ, ກົດລະບຽບຂອງສະຫະພັນນັກຮົບເກົ່າແຫ່ງຊາດລາວຢ່າງທົ່ວເຖິງ, ທຸກໆວັນບຸນຂອງພັກ, ຂອງລັດ, ກຳລັງປະກອບອາວຸດ ແລະ ນັກຮົບເກົ່າ ກໍຄືວັນສຳຄັນຕ່າງໆ. ສະຫະພັນນັກຮົບເກົ່າແຕ່ລະຂັ້ນ ໄດ້ຈັດພະນັກງານການນຳຂອງຕົນລົງປາຖະກະຖາຢູ່ບັນດາກະຊວງ, ສະຖາບັນ, ວິທະຍາຄານ, ໂຮງຮຽນ, ໂຮງໝໍ ແລະ ກົມກອງຕ່າງໆ ເພື່ອຫວນຄືນມູນເຊື້ອ ແລະ ຜົນງານອັນໂດດເດັ່ນທີ່ມີເນື້ອໃນ, ມີຄວາມໝາຍສຳຄັນ ແລະ ເປັນການສຶກສາອົບຮົມແນວຄິດໃຫ້ແກ່ພະນັກງານ, ລັດຖະກອນໄດ້ເຊື່ອມຊຶມກຳແໜ້ນ ແລະ ສືບຕໍ່ຮໍ່າຮຽນ, ສືບທອດເອົາມູນເຊື້ອທີ່ພໍ່ແມ່, ອາວອາ, ປ້າລຸງ ໄດ້ສ້າງໃນໄລຍະຜ່ານມາ, ໄດ້ຊຸກຍູ້ຂະບວນການແຂ່ງຂັນ 3 ດີ 6 ຮັກສາ ຂອງສະຫະພັນນັກຮົບເກົ່າຕິດພັນກັບການແຂ່ງຂັນ “ຮັກຊາດ ແລະ ພັດທະນາ” ປະຕິບັດວຽກງານ 3 ສ້າງ ຫັນລົງຊຸກຍູ້ຮາກຖານຢ່າງເປັນຂະບວນການຟົດຟື້ນ ເຮັດໃຫ້ມີນັກຮົບເກົ່າ 3 ດີ 6 ຮັກສາ 16 ພັນກວ່າຄົນ, ກວມ 32%. ສະຫະພັນນັກຮົບເກົ່າ 3 ດີ 6 ຮັກສາ ຂັ້ນບ້ານ, ຂັ້ນເມືອງ, ຂັ້ນແຂວງ ກໍນັບມື້ນັບເພີ່ມຂຶ້ນເລື້ອຍໆ.

ສະຫາຍ ພົນໂທ ແສງນວນ ໄຊຍະລາດ ກ່າວຕື່ມວ່າ: ເພື່ອສືບຕໍ່ເສີມຂະຫຍາຍທາດແທ້ມູນເຊື້ອ ແລະ ຜົນງານ ສນຫລ ທີ່ຍາດມາໄດ້ໃນຕະຫລອດ 20 ປີ ຜ່ານມາ, ທັງຈັດຕັ້ງຜັນຂະຫຍາຍເນື້ອໃນຈິດ ໃຈມະຕິກອງປະຊຸມໃຫຍ່ຄັ້ງທີ XI ຂອງພັກ ແຜນພັດທະນາເສດຖະກິດ-ສັງຄົມຂອງລັດ ຕິດພັນກັບມະຕິກອງປະຊຸມຜູ້ແທນນັກຮົບເກົ່າທົ່ວປະເທດ ຄັ້ງທີ IV ຂອງຕົນ; ປະກອບສ່ວນໃນການປົກປັກຮັກສາ ແລະ ພັດທະນາປະເທດຊາດໃຫ້ຈະເລີນຫງອກງາມຍິ່ງໆຂຶ້ນ, ຕໍ່ໜ້າສະຫະພັນນັກຮົບເກົ່າທຸກຂັ້ນ ຈະສຸມໃສ່ປະ ຕິບັດໜ້າທີ່ຕົ້ນຕໍດັ່ງນີ້: ເພີ່ມທະວີເອົາໃຈໃສ່ສຶກສາອົບຮົມມູນເຊື້ອ, ທາດແທ້ປະຕິວັດຂອງພະນັກງານນັກ ຮົບເກົ່າ, ກໍຄືຂອງສະຫະພັນນັກຮົບເກົ່າ ໃຫ້ທະຫານ, ຕຳຫລວດ, ພະນັກງານ-ລັດຖະກອນ ແລະ ປະ ຊາຊົນບັນດາເຜົ່າ ໃຫ້ເລິກເຊິ່ງ, ກ້ວາງຂວາງ ຕິດພັນກັບການເຊື່ອມຊຶມ; ຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ຄັ້ງທີ IV ໃຫ້ເປັນຂະ ບວນການ ແລະ ມີໝາກຜົນຕົວຈິງ; ສືບຕໍ່ຫັນລົງກໍ່ສ້າງຮາກຖານຢ່າງແຂງແຮງ ເຊີດຊູຄວາມຮັບຜິດຊອບໃນການພັດທະນາ ສະຫະພັນນັກຮົບເກົ່າຕິດພັນກັບວຽກງານ 3 ສ້າງ; ພ້ອມກັນສ້າງຂະບວນການແຂ່ງ ຂັນ “ຮັກຊາດ ແລະ ພັດທະນາ” ໄປຄຽງຄູ່ກັບການປະຕິບັດ 7 ແຜນງານ, 31 ໂຄງການ, ເນື້ອໃນຂໍ້ແຂ່ງຂັນ 3 ດີ 6 ຮັກສາ ຂອງສະຫະພັນນັກຮົບເກົ່າ ແຕ່ນີ້ຮອດປີ 2025 ໃຫ້ປະກົດຜົນເປັນຈິງ.

ໃນໂອກາດນີ້ ສະຫາຍ ທອງລຸນ ສີສຸລິດ ກໍໄດ້ໂອ້ລົມຕໍ່ພິທີທີ່ມີຄວາມໝາຍສໍາຄັນ ວ່າ: ເພື່ອສືບຕໍ່ຮັກສາ ແລະ ເສີມຂະຫຍາຍມູນເຊື້ອອັນດີງາມຂອງນັກຮົບເກົ່າ, ຍູ້ຂະບວນການແຂ່ງຂັນ “ຮັກຊາດ ແລະ ພັດທະນາ” ໃຫ້ແຂງແຂງ, ຕໍ່ເນື່ອງ ຮຽກຮ້ອງມາຍັງສະຫະພັນນັກຮົບເກົ່າແຕ່ລະຂັ້ນ ແລະ ບັນດານັກຮົບເກົ່າທຸກສະຫາຍ ໃຫ້ສືບຕໍ່ເສີມຂະຫຍາຍທາດແທ້ມູນເຊື້ອປະຕິວັດອັນດີງາມຂອງຕົນ, ເພີ່ມທະວີຄວາມສາ ມັກຄີ ຮັກແພງພາຍໃນຖັນແຖວ ແລະ ສາມັກຄີກັບທຸກຊັ້ນຄົນໃນສັງຄົມ, ປະກອບສ່ວນເຂົ້າໃນການສ້າງກ້ອນກໍາລັງມະຫາສາມັກຄີ, ອັນເປັນປຶກແຜ່ນຂອງປວງຊົນລາວຢູ່ອ້ອມຂ້າງພັກ-ລັດ, ບັນດາສະຫາຍນັກ ຮົບເກົ່າ ລ້ວນແຕ່ເປັນນັກຮົບປະຕິວັດ, ໄດ້ຜ່ານການທົດສອບໃນແປວໄຟສົງຄາມ ແຫ່ງການຕໍ່ສູ້ກູ້ຊາດ ໃນເມື່ອກ່ອນ ກໍຄືນັກຮົບປ້ອງກັນຊາດ-ປ້ອງກັນຄວາມສະຫງົບ ໃນພາລະກິດປົກປັກຮັກສາ ແລະ ພັດ ທະນາປະເທດຊາດ, ເປັນຜູ້ຕັ້ງຕໍ່ບໍລິສຸດຕໍ່ພັກ, ຕໍ່ລັດ, ຕໍ່ປະເທດຊາດ ແລະ ຕໍ່ປະຊາຊົນລາວບັນດາເຜົ່າ. ເຖິງວ່າມາໃນໄລຍະໃໝ່ນີ້, ໄດ້ຖືກຜົນກະທົບຈາກສະພາບແວດລ້ອມ ແລະ ສິ່ງທ້າທາຍທົດສອບນາໆປະການກໍຕາມ, ແຕ່ຂໍໃຫ້ບັນດາສະຫາຍສືບຕໍ່ຮັກສາໄວ້ມູນເຊື້ອປະຕິວັດອັນດີງາມ ແລະ ກຽດສັກສີອັນສູງສົ່ງຂອງຕົນ ເຊິ່ງແມ່ນສິ່ງທີ່ປະເສີດເລີດລໍ້າ ແລະ ມີຄວາມໝາຍສໍາຄັນຕໍ່ພາລະກິດປະຕິວັດໃນໄລຍະໃໝ່, ເພີ່ມທະວີການສຶກສາອົບຮົມການເມືອງ-ນໍາພາແນວຄິດ, ມີສະຕິລະວັງຕົວ, ສາມາດກໍາໄດ້ບັນຫາ, ຕີຖອຍຖ້ອຍທໍານອງບິດເບືອນໃສ່ຮ້າຍປ້າຍສີ ແລະ ໃຫ້ສະເຫນີຄວາມຄິດຄວາມເຫັນ ດ້ວຍຄວາມບໍລິສຸດໃຈ ແລະ ສ້າງສັນ ຕໍ່ການນໍາຂັ້ນຕ່າງໆ ເພື່ອໄດ້ນໍາໄປພິຈາລະນາແກ້ໄຂຕາມທາງຄວນ.

ສືບຕໍ່ໝູນໃຊ້ບົດຮຽນປະສົບການອັນອຸດົມສົມບູນໃນການຊີ້ນໍານໍາພາ ແລະ ບັນຊາ ໃນການກໍ່ສ້າງຮາກຖານການເມືອງ, ຂົນຂວາຍປຸກລະດົມປະຊາຊົນ ແລະ ກໍ່ສ້າງກໍາລັງ ເພື່ອນໍາໃຊ້ເຂົ້າໃນການຈັດຕັ້ງປະຕິບັດແນວທາງ, ນະໂຍບາຍຂອງພັກ ໃນໄລຍະໃໝ່ ໂດຍສະເພາະແມ່ນການຈັດຕັ້ງປະຕິບັດຜັນຂະ ຫຍາຍມະຕິກອງປະຊຸມໃຫ່ຍຄັ້ງທີ XI ຂອງພັກ ແລະ ແຜນພັດທະນາ ເສດຖະກິດ-ສັງຄົມ ຂອງລັດ; ການຈັດຕັ້ງປະຕິບັດນະໂຍບາຍ 3 ສ້າງ ກໍຄື ທິດທາງ, ໜ້າທີ່ວຽກງານ ຂອງສະຫະພັນນັກຮົບເກົ່າ ໃຫ້ເກີດຜົນຕົວຈິງ; ເອົາໃຈໃສ່ສືບຕໍ່ປັບປຸງແບບແຜນ, ເນື້ອໃນ, ຮູບການ ແລະ ວິທີການ ເຄື່ອນໄຫວຂອງຕົນ ໃຫ້ແທດເຫມາະກັບແຕ່ລະເປົ້າຫມາຍ; ອັນສໍາຄັນທີ່ສຸດ ແມ່ນຕ້ອງສ້າງເງື່ອນໄຂໃຫ້ມະຫາຊົນ, ພະ ນັກງານທີ່ກະສຽນບໍານານແລ້ວ ແຕ່ບໍ່ໄດ້ເປັນສະມາຊິກຂອງສະຫະພັນ ມີບ່ອນດໍາເນີນຊີວິດ ແລະ ໄດ້ຮັບຂໍ້ມູນຂ່າວສານ ກ່ຽວກັບແນວທາງນະໂຍບາຍຂອງພັກ ແລະ ແຜນພັດທະນາເສດຖະກິດ-ສັງຄົມ ຂອງລັດ, ຈາກນັ້ນ ກໍເຮັດໜ້າທີ່ ໂຄສະນາປຸກລະດົມ ເພື່ອຈັດຕັ້ງນໍາພາມະຫາຊົນ ເຂົ້າຮ່ວມຈັດຕັ້ງປະຕິບັດທຸກໜ້າທີ່ ວຽກງານຂອງພັກ ແລະ ລັດ ວາງອອກໃຫ້ເກີດໝາກຜົນຕົວຈິງ, ເຕົ້າໂຮມຖັນແຖວນັກຮົບເກົ່າ ກໍຄືປວງຊົນລາວບັນດາເຜົ່າ, ບັນດາຊັ້ນຄົນໃນສັງຄົມ, ເພດໄວເຂົ້າ ໃນການປະຕິບັດສອງໜ້າທີ່ຍຸດທະສາດ ແລະ ຍົກລະດັບຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ດີຂຶ້ນ ຢ່າງບໍ່ຢຸດຢັ້ງ.

ໃນຖານະເປັນອົງການຈັດຕັ້ງການເມືອງ-ສັງຄົມ ຢູ່ໃນລະບົບການເມືອງຂອງລະບອບ ປະຊາທິ ປະໄຕປະຊາຊົນ, ສະຫະພັນນັກຮົບເກົ່າທຸກຂັ້ນ ຕ້ອງເພີ່ມທະວີການປະສານສົມທົບກັບບັນດາອົງ ການ ຈັດຕັ້ງພາຄີ ແລະ ເພື່ອປະກອບສ່ວນຢ່າງຕັ້ງໜ້າ ເຂົ້າໃນການປັບປຸງບູລະນະ ລະບົບການເມືອງ, ເສີມຂະຫຍາຍສິດ ປະຊາທິປະໄຕ ຂອງປະຊາຊົນ, ເຂົ້າຮ່ວມໃນການປັບປຸງກໍ່ສ້າງພັກ ໃຫ້ປອດໃສ ເຂັ້ມແຂງ ໜັກແໜ້ນ; ສ້າງລັດໃຫ້ລັດເປັນລັດແຫ່ງກົດໝາຍ ລັດຂອງປະຊາຊົນ ໂດຍປະຊາຊົນ ແລະ ເພື່ອຜົນປະ ໂຫຍດຂອງ ປະຊາຊົນຢ່າງແທ້ຈິງ; ເອົາໃຈໃສ່ຮ່ວມກັບອົງການຈັດຕັ້ງພັກ-ລັດຂັ້ນຕ່າງໆ ສຶກສາອົບຮົມໃຫ້ປະຊາຊົນ ມີ ການປະກອບສ່ວນຢ່າງເປັນເຈົ້າການ ເຂົ້າໃນການສ້າງສາພັດທະນາປະເທດຊາດອັນແທ້ຈິງ, ປະຕິບັດບັນດາແນວທາງແຜນນະໂຍບາຍຂອງພັກ-ລັດ, ເຮັດໃຫ້ປະຊາຊົນຮູ້ເສີມຂະຫຍາຍສິດເປັນເຈົ້າຂອງປະເທດຊາດ ຕິດພັນກັບການເຊີດຊູຄວາມຮັບຜິດຊອບ ໃນການປະຕິບັດສິດ ແລະ ພັນທະມົນລະເມືອງ ເປັນຕົ້ນແມ່ນ ຮູ້ເຄົາລົບ ແລະ ດໍາລົງຊີວິດໄປຕາມລະບຽບກົດໝາຍຂອງບ້ານເມືອງຢ່າງເຂັ້ມງວດ.

ໃນພິທີທີ່ມີຄວາມໝາຍສໍາຄັນ ສະຫາຍ ທອງລຸນ ສີສຸລິດ ໄດ້ປະດັບຫລຽນໄຊພິລະອາດຫານ ຊັ້ນ I ໃຫ້ແກ່ ສະຫະພັນນັກຮົບເກົ່າແຫ່ງຊາດລາວ.

ແຫຼ່ງຂ່າວ ປະເທດລາວ