ໃນໂອກາດທີ່ຄະນະການນຳທັງສອງກອງບັນຊາການທະຫານຊາຍແດນແຂວງກວາງຈິ ແລະ ກວາງບີ່ງ ສສ ຫວຽດນາມ ທີ່ເດີນທາງມາ ຮ່ວມກອງປະຊຸມພົບປະແລກປ່ຽນປະຈຳປີ 2022 ເຊິ່ງໄດ້ສຳເລັດລົງໃນຕອນເຊົ້າຂອງວັນທີ 17 ສິງຫານີ້.
ໃນຕອນບ່າຍຂອງວັນດຽວກັນ ນີ້ ຢູ່ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະເຂດ ຄະນະການນຳຂອງສອງກອງບັນຊາການ ນຳໂດຍສະຫາຍ ພັນເອກ ດິງຊວນຮຸ່ງ ຫົວໝ້າການເມືອງກອງບັນຊາການທະການແຂວງກວາງຈິພ້ອມດ້ວຍຄະນະ ໄດ້ເຂົ້າພົບປະຢ້ຽມຢາມ ແລະ ລາຍງານຜົນສຳເລັດກອງປະຊຸມ,ພົບປະແລກປຽ່ນປະຈຳປີ 2022 ໃຫ້ ທ່ານ ເຈົ້າແຂວງໄດ້ຮັບຊາບ.
ໂດຍສະເພາະສອງຝາຍໄດ້ມີການຈັດຕັ້ງປະຕິບັດໝ້າທີ່ວຽກງານຄຸ້ມຄອງຊາຍແດນ, ປ້ອງກັນຊາຍແດນ, ຮັກສາສະຖຽນລະພາບທາງດ້ານການເມືອງ,ຄວາມເປັນລະບຽບຮຽບຮ້ອຍທາງສັງຄົມ, ຕ້ານແລະສະກັດກັ້ນການຊື້ຂາຍຂົນສົ່ງ ສິນຄ້າຜິດກົດໝາຍ ແລະແກ້ໄຂບັນຫາເຫດການທີ່ເກີດຂື້ນ ໃນສອງເບື້ອງຊາຍແດນ, ປະຕິບັດແຜນການຕ້ານແລະສະກັດກັ້ນການແຜ່ລະບາດຂອງພະຍາດໂຄວິດ 19 ຕິດພັນກັບການສ້າງ,ປັບປຸງກຳລັງຊາຍແດນຂອງສອງຝ່າຍໃຫ້ມີຄວາມເຂັ້ມແຂງ, ມີແບບແຜນວິທີເຮັດວຽກທີ່ທັນສະໄໝຂື້ນກວ່າເກົ່າ ພ້ອມກັນນັ້ນ ສະຫາຍ ພັນເອກ ດິງຊວນຮຸ່ງ ຫົວໝ້າການເມືອງ ກອງບັນຊາການທະຫານຊາຍແດນແຂວງກວາງຈິ ກໍ່ອວຍພອນໄຊອັນປະເຊີດໃຫ້ແກ່ທ່ານ ເຈົ້າແຂວງຈົ່ງມີສຸຂະພາບແຂງແຮງ, ປະສົບຜົນສຳເລັດໃນໝ້າທີ່ວຽກງານຂອງທ່ານ ພ້ອມທັງຊີ້ນຳ ນຳພາແຂວງສະຫວັນນະເຂດກ້າວຂື້ນໄປເລື້ອຍໆ.
ໂອກາດດັ່ງກ່າວນີ້ ທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ ເຈົ້າແຂວງສະຫວັນນະເຂດ, ກໍ່ໄດ້ສະແດງຄວາມຂອບອົກຂອບໃຈຢ່າງສູງຕໍ່ການນຳຂອງສອງກອງບັນຊາການທະຫານຊາຍແດນແຂວງກວາງຈິ ແລະ ກອງບັນຊາການທະຫານຊາຍແດນແຂວງກວາງບີ່ງ ທີ່ມາຢຽ້ມຢາມ ດ້ວຍໄມຕີຈິດມິດຕະພາບທີດີ,ທັງເປັນການເສີມຂະຫຍາຍສາຍພົວພັນຮ່ວມມືຮອບດ້ານລະຫວ່າງ ແຂວງສະຫວັນນະຂດ ກັບ ສອງແຂວງ ກວາງຈິ ແລະແຂວງກວາງບີ່ງ ກໍ່ຄືສອງກອງບັນຊາການທະຫານຊາຍແດນ ໃຫ້ມີຄວາມແໝ້ນແຟ້ນຍິ່ງໆຂື້ນ.
ແຫຼ່ງຂ່າວ: MediaLAOS