ໃນວັນທີ 27-28 ມິຖຸນາ 2022 ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດກອງບັນຊາການ ປກສ ເມືອງປາກງື່ມ ນະຄອນຫຼວງວຽງຈັນ ສາມາດຈັບກຸ່ມເປົ້າໝາຍຄ້າ-ຂາຍຢາເສບຕິດໄດ້ 5 ຄົນ ພ້ອມຂອງກາງຢາບ້າ 11.632 ເມັດ.
ພັທ ສິງຄຳ ລໍວັນໄຊ ຫົວໜ້າກອງບັນຊາການ ປກສ ເມືອງປາກງື່ມ ໃຫ້ຮູ້ວ່າ: ພາຍຫຼັງສືບຮູ້ວ່າມີການເຄື່ອນໄຫວຊື້-ຂາຍຢາເສບຕິດ ຈຶ່ງມອບໃຫ້ເຈົ້າໜ້າທີ່ວິຊາສະເພາະ ລົງແກ້ໄຂວັນທີ 27 ມິຖຸນາ, ສາມາດຈັບຕົວໄດ້ແກ່:
- ທ້າວ ກຽງຄຳ ອາຍຸ 45 ປີ ພ້ອມຂອງການຢາບ້າ 4.405 ເມັດ
- ທ້າວ ສຸກທະວີ ຫຼື ແຫຼ້ ອາຍຸ 36 ປີ ພ້ອມຂອງການຢາບ້າ 405 ເມັດ
- ທ້າວ ນິຄົມ ອາຍຸ 33 ປີ ພ້ອມຂອງການຢາບ້າ 27 ເມັດ
- ທ້າວ ບົວວັນ ຫຼື ແຫຼ້ ອາຍຸ 33 ປີ
- ທ້າວ ເຢຍຊົງ ອາຍຸ 30 ປີ ພ້ອມຂອງການຢາບ້າ 6.795 ເມັດ
ຜ່ານການສືບສວນ ທັງໝົດນີ້ ແມ່ນໄດ້ຂາຍຢາເສບຕິດ ແລະ ມີການກະທຳຜິດຄົບ 4 ອົງປະກອບຂອງການກະທຳຜິດທາງອາຍາ ທີ່ແຕະຕ້ອງຕໍ່ສະຖຽນລະພາບທາງເສດຖະກິດຂອງຊາດ ແລະ ສາຍພົວພັນສັງຄົມ. ເຈົ້າໜ້າທີ່ຈຶ່ງໄດ້ເກັບກຳຂໍ້ມູນ ແລະ ສະຫຼຸບສົ່ງໄອຍະການສັ່ງຟ້ອງສານຕັດສິນຕາມກົດໝາຍ.
ຂ່າວ-ພາບ: ຄວາມສະຫງົບ