ອິນເດຍອອກມາດຕະການສັ່ງຫ້າມໃຊ້ພລາສຕິກແບບໃຊ້ເທື່ອດຽວແລ້ວຖິ້ມ ເຊິ່ງເລີ່ມຕັ້ງແຕ່ວັນທີ 1 ກໍລະກົດ ທີ່ຜ່ານມານີ້ ເພື່ອກຳຈັດບັນຫາແມ່ນ້ຳທີ່ເຕັມໄປດ້ວຍຂີ້ເຫຍື້ອ ແລະ ການສ້າງອັນຕະລາຍແກ່ສັດປ່າ, ແຕ່ຜູ້ຊ່ຽວຊານຂອງອິນເດຍໄດ້ກ່າວວ່າ ຈະປະເຊີນບັນຫາຈາກທີ່ຜູ້ຜະລິດທີ່ບໍ່ກຽມພ້ອມ ແລະ ຜູ້ບໍລິໂພກທີ່ບໍ່ໃຫ້ຄວາມຮ່ວມມື.
ອ້າງອີງຈາກສຳນັກຂ່າວ ຣອຍເຕີ ໄດ້ລາຍງານຈາກອິນເດຍ ລາຍງານວ່າ: ໃນວັນທີ 1 ກໍລະກົດ ອິນເດຍອອກຄຳສັ່ງຫ້າມໃໝ່ເພື່ອຄວບຄຸມເຖິງການຜະລິດ ການນຳເຂົ້າ ແລະ ການຈຳໜ່າຍສິ່ງຂອງເຄື່ອງໃຊ້ເຊັ່ນ: ຫຼອດ ຫຼື ແກ້ວທີ່ເຮັດມາຈາກພລາສຕິກ ແລະ ພລາສຕິກທີ່ຫຸ້ມກັບຢາສູບ, ໃນຂະນະທີ່ຖົງພລາສຕິກໃນບາງແບບ ຍັງຖືກຍົກເວັ້ນຢູ່.
ຕອນນີ້ລັດຖະບານອິນເດຍມີການສັ່ງຫ້າມ ແຕ່ສະພາບແຫຼ່ງນ້ຳ ແລະ ເຂດຖົມຂີ້ເຫຍື້ອ ມັນເຮັດໃຫ້ເຫັນວ່າ ນະໂຍບາຍດັ່ງກ່າວນັ້ນບໍ່ມີປະສິດທິຜົນປານໃດ ເນື່ອງຈາກວ່າບໍລິສັດອຸດສາຫະກຳພລາສຕິກຫຼາຍແຫ່ງ ກ່າວວ່າ ວັດສະດຸທີ່ຈະຜະລິດໃນການຊ່ວຍອະນຸລັກສິ່ງແວດລ້ອມນັ້ນມີລາຄາແພງຫຼາຍ ພ້ອມຮຽກຮ້ອງໃຫ້ລັດຖະບານເລື່ອນມາດຕະການຫ້າມນີ້ອອກໄປກ່ອນ.
ປະຈຸບັນ ອິນເດຍເປັນປະເທດທີ່ຜະລິດຂີ້ເຫຍື້ອພລາສຕິກປະມານ 4 ລ້ານໂຕນຕໍ່ປີ, ໃນນັ້ນປະມານ 1/3 ຂອງຈຳນວນດັ່ງກ່າວບໍ່ສາມາດນຳເອົາພລາສຕິກມາໃຊ້ຄືນໃໝ່ໄດ້, ວິທີການກໍາຈັດແມ່ນປົກກະຕິແລ້ວ ມັກຖິ້ມລົງໃນນ້ຳ ແລະ ການຂຸດຝັງຂີ້ເຫຍື້ອ ທີ່ລ້ວນແຕ່ສ້າງມົນລະພິດທາງອາກາດ.