ຣັດເຊຍໄດ້ຍິງຂີປະນາວຸດສອງລູກໃສ່ນະຄອນຫຼວງຂອງຢູເຄຣນໃນຂະນະທີ່ເລຂາທິການໃຫຍ່ອົງການສະຫະປະຊາຊາດກໍາລັງຢູ່ໃນລະຫວ່າງການຢ້ຽມຢາມຢູເຄຣນເພື່ອຫວັງຢຸດຕິຄວາມຄັດແຍ່ງລະຫວ່າງຣັດເຊຍ ແລະ ຢູເຄຣນ.
ເຈົ້າຄອງນະຄອນຫຼວງຄຽບຂອງຢູເຄຣນ ໄດ້ຂຽນຂໍ້ຄວາມລົງທວີດວ່າ ມື້ວານນີ້ຣັດເຊຍໄດ້ຍິງຂີປະນາວຸດສອງລູກໃສ່ນະຄອນຫຼວງຄຽບ ໂດຍຂີປະນາວຸດລູກໜຶ່ງຕົກເຂົ້າໄປໃນອາຄານທີ່ຢູ່ອາໄສແຫ່ງໜຶ່ງ ເຊິ່ງໄດ້ເຮັດໃຫ້ມີຄົນໄດ້ຮັບບາດເຈັບຢ່າງໜ້ອຍ 3 ຄົນ. ສ່ວນອີກໜ່ວຍໜຶ່ງຕົກຢູ່ໃກ້ຕຶກອາຄານອີກແຫ່ງໜຶ່ງ ແຕ່ບໍ່ມີລາຍງານຜູ້ທີ່ໄດ້ຮັບບາດເຈັບ ຫຼື ເສຍຊີວິດ.
ການໂຈມຕີດັ່ງກ່າວຂອງຣັດເຊຍໃນຢູເຄຣນຄັ້ງນີ້ ເກີດຂຶ້ນໃນລະຫວ່າງ ທ່ານ ແອນໂຕນິໂອ ກູເຕີເຣສ໌ ເລຂາທິການໃຫຍ່ຂອງອົງການສະຫະປະຊາຊາດກໍາລັງຢ້ຽມຢາມຢູເຄຣນເພື່ອປຶກສາຫາລືກັບປະທານາທິບໍດີ ວໍໂລດີເມຍ ເຊເລນສກີ ກ່ຽວກັບແນວທາງການອົບພະຍົບປະຊາຊົນທີ່ຍັງຕິດຢູ່ໃນເມືອງມາຣິອູປໍ ເຊິ່ງຕົກຢູ່ພາຍໃຕ້ການຍຶດຄອງຂອງຣັດເຊຍ ລວມທັງມີການປຶກສາຫາລືກ່ຽວກັບແນວທາງການຢຸດຕິຄວາມຂັດແຍ່ງກັນລະຫວ່າງຣັດເຊຍ ແລະ ຢູເຄຣນໂດຍສັນຕິວິທີ.
ພາຍຫຼັງການປຶກສາຫາລືດັ່ງກ່າວ ທ່ານ ກູເຕີເຣສ໌ ໄດ້ອອກມາຖະແຫຼງຂ່າວຮ່ວມກັບປະທານາທິບໍດີ ເຊເລນສກີ ຂອງຢູເຄຣນ ໂດຍຍອມຮັບວ່າ ສະພາຄວາມໝັ້ນຄົງສະຫະປະຊາຊາດ ປະສົບຄວາມຫຼົ້ມເຫຼວໃນການປ້ອງກັນ ຫຼື ຢຸດຕິສົງຄາມໃນຢູເຄຣນ. ຢ່າງໃດກໍ່ຕາມ ທ່ານ ກູເຕີເຣສ໌ ຍັງໄດ້ກ່າວວ່າ ການມາຢ້ຽມຢາມຢູເຄຣນຄັ້ງນີ້ເພື່ອເປັນການບອກຜູ້ນໍາ ແລະ ບັນດາປະຊາຊົນຢູເຄຣນວ່າ ລາວຈະບໍ່ຍອມແພ້ ແລະ ຈະສືບຕໍ່ພະຍາຍາມຊອກຫາມາດຕະການອື່ນໆຕໍ່ໄປ.
ນອກນັ້ນ ກໍ່ຍັງມີຂ່າວລາຍງານວ່າ ທ່ານ ໂຈ ໄບເດນ ປະທານາທິບໍດີສະຫະລັດ ໄດ້ຮຽກຮ້ອງໃຫ້ລັດຖະສະພາແຫ່ງສະຫະລັດເລັ່ງການລະດົມທຶນຊ່ວຍເຫຼືອຈໍານວນ 33 ຕື້ໂດລາ ເພື່ອສະໜັບສະໜູນການຕໍ່ສູ້ຂອງຢູແຄຣນໃນການປ້ອງກັນຕົນເອງຈາກຣັດເຊຍ.
ການຮ້ອງຂໍເງິນທຶນດັ່ງກ່າວ ລວມເຖິງເງິນຈໍານວນຫຼາຍກວ່າ 20 ຕື້ໂດລາສະຫະລັດໃນການຊ່ວຍເຫຼືອດ້ານທະຫານໃຫ້ກັບຢູເຄຣນ ແລະ ໃນຄວາມພະຍາຍາມຂອງສະຫະລັດອາເມລິກາໃນການເພີ່ມທະວີຄວາມໝັ້ນຄົງຂອງເອີຣົບໃນການຮ່ວມມືກັບປະເທດພັນທະມິດທີ່ເປັນສະມາຊິກຂອງອົງການສົນທິສັນຍາປ້ອງກັນອັດລັງຕິກເໜືອ (NATO) ແລະ ພັນທະມິດອື່ນໆໃນພາກພື້ນ.
ແຫຼ່ງທີ່ມາ: EURACTIV