ເຈົ້າໜ້າທີ່ໜ່ວຍງານປົກປັກຮັກສາຊາຍຝັ່ງ ຕູນິເຊຍ ເລັ່ງເຂົ້າໃຫ້ຄວາມຊ່ວຍເຫຼືອລູກເຮືອບັນທຸກນ້ຳມັນກາຊວນຫຼາຍກວ່າ 1,000 ໂຕນລຳໜຶ່ງ ທີ່ອອກເດີນທາງຈາກປະເທດ ອີເຄວທໍຮຽວ ກິນີ ໄປທາງປະເທດມອລຕາ ເກີດອຸບັດຕິເຫດຈົມຢູ່ນອກຊາຍຝັ່ງເມືອງເກບ (Gabes) ທາງຕອນໃຕ້ຂອງປະເທດ ຕູນິເຊຍ ໂດຍທາງເຈົ້າໜ້າທີ່ສາມາດຊ່ວຍລູກເຮືອໄດ້ທັງໝົດ 7 ຄົນໄດ້ຢ່າງປອດໄພ.
ເຮືອໄດ້ຈົມລົງໃນຕອນເຊົ້າ ໃນເຂດນ່ານນ້ຳຕູນິເຊຍ ທາງດ້ານໂຄສົກຂອງສານທ້ອງຖິ່ນ ໂມຮາເມັດ ຄາເຣ ກ່າວວ່າ: ຄະນະກໍາມະການປ້ອງກັນໄພພິບັດຈະປະຊຸມກັນເພື່ອຕັດສິນໃຈກ່ຽວກັບມາດຕະການທີ່ຈະປະຕິບັດ. ເຮືອບັນທຸກນ້ຳມັນດັ່ງກ່າວມີຄວາມຍາວ 58 ແມັດ ແລະ ກວ້າງ 9 ແມັດ
ແນວໃດກໍຕາມພົບວ່າມີນ້ຳມັນຫລາຍເຖິງ 1,000 ໂຕນຮົ່ວໄຫລ ແລະ ລອຍໄປທົ່ວບໍລິເວນນັ້ນ ເຊິ່ງສ້າງຄວາມເສຍຫາຍຕໍ່ສະພາບແວດລ້ອມຢ່າງຫຼວງຫຼາຍ ດ້ານກອງທັບເຮືອ ຕູນີເຊຍ ເປີດເຜິີຍວ່າຈະເຮັດວຽກຮ່ວມກັບປະເທດຕ່າງໆ ທີ່ປາຖະໜາຈະໃຫ້ການຊ່ວຍເຫລືອ ເຊິ່ງທາງອີຕາລີ ໄດ້ສະເໜີໃຫ້ສົ່ງເຮືອເດີນທະເລທີ່ຊ່ຽວຊານດ້ານການຈັດການໄພພິບັດທາງທະເລມາຊ່ວຍແກ້ໄຂປັນຫາທີ່ເກີດຂຶ້ນໃນຄັ້ງນີ້.
ທັງນີ້ໂຄງສ້າງພື້ນຖານເມືອງເກບປະສົບກັບບັນຫາສະພາບອາກາດທີ່ຮ້າຍແຮງໂດຍອົງກອນດ້ານສິ່ງແວດລ້ອມກ່າວວ່າໂຮງງານອຸດສາຫະກຳໄດ້ຖິ້ມຂີ້ເຫຍື້ອລົງທະເລໂດຍກົງຈົນເຮັດໃຫ້ພື້ນທີ່ບໍລິເວນດັ່ງກ່າວມີປັນຫາດ້ານສິ່ງແວດລ້ອມມາໂດຍຕະຫຼອດ.