ໄທສົ່ງອອກໝາກໄມ້ໄປຈີນດ້ວຍເສັ້ນທາງລົດໄຟລາວ-ຈີນ ເປັນຄັ້ງທຳອິດເພື່ອຂົນສົ່ງໝາກໄມ້ຈາກໄທໄປຈີນ

ອີງຕາມການລາຍງານຂອງ The Nation ໄທໃນວັນຈັນທີ່ຜ່ານມາ: ຕູ້ຄອນເທນເນີ 2 ຕູ້ ບັນທຸກໝາກຖົ່ວລຽນ ຈໍານວນ 40 ໂຕນ ແລະ ອີກ 1 ຕູ້ ບັນຈຸໝາກພ້າວ ຈໍານວນ 20 ໂຕນຈາກແຂວງລະຍອງໄດ້ເດີນທາງມາເຖິງສະຖານີລົດໄຟທານາແລ້ງຂອງລາວ ແລະ ເຂົ້າສູ່ປະເທດຈີນດ້ວຍລົດໄຟໃນວັນອາທິດ.

ທ່ານ ສົມກຽດ ໝັ້ນສິຣິພິບູນ ຜູ້ຈັດການ ບໍລິສັດຂົນສົ່ງລົດໄຟເກົາຈະເລີນ ທີ່ດໍາເນີນງານທາງລົດໄຟລາວ-ຈີນ ໄດ້ກ່າວໃນ The Nation ວ່າ ທາງລົດໄຟເບິ່ງຄືວ່າຈະເປັນເສັ້ນທາງຂົນສົ່ງທີ່ໄວທີ່ສຸດ, ໂດຍກ່າວຕື່ມວ່າ ຈະໃຊ້ເວລາ ປະມານ 4 ຫຼື 5 ມື້ ເທົ່ານັ້ນໃນການຂົນສົ່ງສິນຄ້າຈາກລະຍອງສູ່ຄຸນໝິງປະເທດຈີນ. ​ເຖິງ​ແມ່ນວ່າ​ຍັງ​ມີ​ບາງ​ບັນຫາ​ໃນ​ການ​ສົ່ງ​ໝາກ​ໄມ້​ຂອງ​ໄທ​ໄປ​ຈີນ ​ຍ້ອນ​ວິ​ກິດ​ການ​ໂຄ​ວິດ-19, ​ແຕ່​ ທ່ານ​ ສົມ​ກຽດ ​ກ່າວ​ວ່າ, ກຳລັງດໍາເນີນການ​ເພື່ອ​ຜ່ານ​ຜ່າ​ຄວາມ​ຫຍຸ້ງຍາກ​ດັ່ງກ່າວ.

ທ່ານ​ກ່າວ​ຍັງກ່າວຕື່ມອີກວ່າ: ໜ່ວຍງານ​ທີ່​ກ່ຽວຂ້ອງ​ພວມ​ດຳ​ເນີນ​ການ​ແກ້​ໄຂ​ບັນຫາ​ເຫຼົ່າ​ນີ້​ ແລະ​ ເລັ່ງລັດ​ການ​ຂົນ​ສົ່ງ​ສິນຄ້າ​ໄປ​ຈີນ​ໂດຍ​ໄວ ​ແລະ ຍັງກ່າວເສີມອີກວ່າ ​ກໍາລັງ​ພະຍາຍາມ​​ຫຼຸດ​ຄ່າ​ສົ່ງ​ສິນຄ້າ​ໄປ​ຈີນ ​ແລະ ​ເຮັດ​ໃຫ້​ຂະ​ບວນການ​ດັ່ງກ່າວ​ມີ​ປະສິດທິ​ພາບຫຼາຍຂື້ນ.

ໃນ​ເດືອນ​ມັງກອນ​ປີ​ນີ້, ການ​ຂົນ​ສົ່ງ​ເຂົ້າສານ​ໄທ 1,000 ​ໂຕນ ​ຄັ້ງ​ທຳ​ອິດ​ໄດ້ຖືກ​ສົ່ງ​ໄປ​ຈີນ​ໂດຍ​ທາງ​ລົດ​ໄຟ​ລາວ-ຈີນ. ໄທ​ມີ​ຄວາມ​ກະ​ຕືລື​ລົ້ນ​ທີ່​ຈະ​ນຳ​ໃຊ້​ທາງ​ລົດ​ໄຟ​ເພື່ອ​ສົ່ງ​ຜະ​ລິດ​ຕະ​ພັນ​ກະ​ສິ​ກຳ, ໂດຍ​ສະ​ເພາະ​ແມ່ນ​ກ້ວຍ​ໄມ້, ຢາງ​ພາ​ລາ, ມັນ​ຕົ້ນ, ນ້ຳ​ມັນ​ປາມ, ຜະ​ລິດ​ຕະ​ພັນ​ການ​ປະ​ມົງ ແລະ​ ຜະລິດຕະພັນສັດ​ໄປ​ຈີນ.

ໝາກ​ໄມ້​ຂອງ​ໄທ​ທີ່​ສົ່ງ​ໂດຍ​ທາງ​ລົດ​ໄຟ​ສາມາດ​ໄປ​ເຖິງ​ນະຄອນ​ຊຽງ​ໄຮ້​ໃນ​ເວລາ​ພຽງ 1-2 ມື້ ໂດຍທາງລົດໄຟລາວ-ຈີນ ເປີດໃຫ້ບໍລິການໃນເດືອນທັນວາປີກາຍນີ້ເຊິ່ງໄດ້ເປີດໂອກາດທີ່ຈະຂະຫຍາຍເສັ້ນທາງການສົ່ງອອກໄປຍັງອາຊີກາງ, ຕາເວັນອອກກາງ, ຣັດເຊຍ ແລະ ເອີຣົບ.