ອີງຕາມການລາຍງານເພຈ໌ຂ່າວ Reuters ໄດ້ລາຍງານໃນວັນທີ 20 ມີນາ ໃຫ້ຮູ້ວ່າ: ໃນວັນອາທິດໄດ້ມີຜູ້ຊາຍສອງຄົນລົ້ມລົງ ແລະ ເສຍຊີວິດໃນຂະນະທີ່ລໍຖ້າຕໍ່ແຖວ ເພື່ອເຕີມນໍ້າມັນເຊື້ອໄຟທ່າມກາງລາຄາທີ່ເພີ່ມຂຶ້ນສູງ ເຊິ່ງນໍາໄປສູ່ອັດຕາເງິນເຟີ້ທີ່ສູງຂຶ້ນເປັນປະຫວັດຕິການ.
ທ່ານ ນາລິນ ທາດູວາ (Nalin Thalduwa) ໂຄສົກຕຳຫຼວດນະຄອນຫຼວງໂຄລອມໂບເປີດເຜີຍວ່າ: ຜູ້ຊາຍ ອາຍຸ 70 ປີ ໄດ້ເສຍຊີວິດ ໃນຂະນະທີ່ລໍຖ້າເຕີມນ້ຳມັນ ໃນສອງເຂດທີ່ແຕກຕ່າງກັນຂອງປະເທດ.
ທ່ານ ທາດູວາ ກ່າວວ່າ “ຜູ້ໜຶ່ງແມ່ນຄົນຂັບລົດສາມລໍ້ ອາຍຸ 70 ປີ ເປັນພະຍາດເບົາຫວານ ແລະ ຫົວໃຈ ໃນຂະນະທີ່ຄົນທີສອງ ອາຍຸ 72 ປີ, ທັງສອງໄດ້ຖ້າຄິວຢູ່ໃນແຖວປະມານ 4 ຊົ່ວໂມງເພື່ອເຕີມນ້ຳມັນເຊື້ອໄຟ.
ທ່ານ ອາໂຊກາ ແຣນວາລາ (Ashoka Ranwala) ປະທານສະຫະພັນພະນັກງານພີຣໂຕລຽມກ່າວວ່າ ໃນວັນອາທິດ ສີລັງກາໄດ້ໂຈະການດໍາເນີນງານຢູ່ໂຮງງານກັ່ນນໍ້າມັນພຽງແຕ່ແຫ່ງດຽວຫຼັງຈາກສະຕ໊ອກນ້ໍາມັນດິບຫມົດລົງ ແລະ ບໍ່ສາມາດຕິດຕໍ່ກະຊວງພະລັງງານໄດ້ໃນທັນທີເພື່ອຂໍຄວາມເຫັນ.
ການນຳໃຊ້ນ້ຳມັນກາຊວນເພີ່ມຂຶ້ນຫຼັງຈາກບັນດາຄອບຄົວທີ່ມີລາຍໄດ້ຕ່ຳເລີ່ມຫັນປ່ຽນຈາກການໃຊ້ແກສ໌ຫຸງຕົ້ມຍ້ອນການເພີ່ມຂຶ້ນຂອງລາຄາ. ສີລັງກາໄດ້ພະຍາຍາມຫາເງິນໂດລາເພື່ອຈ່າຍຄ່າຂົນສົ່ງນໍ້າມັນເຊື້ອໄຟທີ່ແພງຂຶ້ນເລື້ອຍໆນັບຕັ້ງແຕ່ເດືອນມັງກອນເປັນຕົ້ນມາ, ໂດຍຄັງສຳຮອງເງິນຕາຕ່າງປະເທດຫຼຸດລົງເຖິງ 2.31 ພັນລ້ານໂດລາສະຫະລັດໃນເດືອນກຸມພາ.
ໃນເດືອນກຸມພາ ອັດຕາເງິນເຟີ້ຂອງສີລັງກາ ໄດ້ບັນລຸເຖິງ 15.1%, ເຊິ່ງເປັນລະດັບສູງສຸດໃນອາຊີ, ໂດຍອັດຕາເງິນເຟີ້ດ້ານອາຫານເພີ່ມຂຶ້ນເຖິງ 25.7%, ຂໍ້ມູນຂອງຫຼ້າສຸດຂອງລັດຖະບານເປີດເຜີຍ.