ໃນອາທິດຜ່ານມາ, ຜູ້ອຳນວຍການໃຫຍ່ຂອງ ບໍລິສັດ ລ້ານຊ້າງ ມິເນໂຣນສ໌ ລິມິເຕັດ (LXML) ບໍ່ຄຳ-ທອງ ເຊໂປນ, ທ່ານ ສະໝານ ອະເນກາ ໄດ້ມອບ 80 ລ້ານກີບ ໃຫ້ແກ່ ທ່ານ ດາວວອນ ພະຈັນທະວົງ, ຮອງປະທານກິຕິມະສັກ ຂອງ ສະພາການຄ້າ ແລະ ອຸດສາຫະກຳແຫ່ງຊາດ ລາວ (ສຄອຊ).
ທ່ານ ສະໝານ ອະເນກາ ຜູ້ອຳນວຍການໃຫຍ່ LXML ໄດ້ກ່າວວ່າ: “ການປະກອບສ່ວນນີ້ຈະສືບຕໍ່ສະໜັບສະໜູນການສ້າງຄວາມອາດສາມາດ ແລະ ສົ່ງເສີມພາກທຸລະກິດ ຢູ່ໃນ ສປປ ລາວ ໂດຍສະເພາະ ໃນໄລຍະການຟື້ຟູຈາກ ຜົນກະທົບຂອງການລະບາດພະຍາດ COVID-19.”
ປີນີ້ເປັນປີທີ 9 ທີ່ LXML ໄດ້ປະກອບສ່ວນຕໍ່ LNCCI ໃນຖານະທີ່ເປັນສະມາຊິກ ເພື່ອສະໜັບສະໜູນຄວາມອາດສາມາດຂອງພາກທຸລະກິດໃນ ສປປ ລາວ.
LXML ບໍ່ຄຳ-ທອງເຊໂປນ ເປັນທຸລະກິດຂະໜາດໃຫຍ່ໃນ ສປປ ລາວ ທີ່ ດຳເນີນການຂຸດຄົ້ນ-ປຸງແຕ່ງ-ຜະລິດແຮ່ທອງ-ຄຳ ແບບບໍ່ເປີດໜ້າດິນ ຢູ່ໃນແຂວງສະຫວັນນະເຂດ ຕັ້ງແຕ່ປີ 2003. ໃນສອງທົດສະວັດຜ່ານມາ, LXML ໄດ້ປະກອບສ່ວນຫຼາຍກວ່າ US$1,6 ຕື້ ເປັນລາຍຮັບໂດຍກົງໃຫ້ແກ່ລັດຖະບານລາວ ຜ່ານການຈ່າຍພາສີອາກອນ ແລະ ຄ່າຊັບພະຍາກອນແຮ່ທາດ, ຫຼາຍຮ້ອຍລ້ານໂດລາເປັນຜົນປະໂຫຍດທາງອ້ອມ ຜ່ານການພັດທະນາຊຸມຊົນ, ການສ້າງວຽກເຮັດງານທຳ ແລະ ການຝຶກອົບຮົມສ້າງສີມືແຮງງານ.
ໃນຊຸມຊົນເມືອງວິລະບູລີ ໄດ້ມີປະຊາຊົນກວ່າ 40.000 ຄົນ ທີ່ໄດ້ຮັບຜົນປະໂຫຍດຈາກ ໂຄງການພັດທະນາຊຸມຊົນ ຂອງໂຄງການຄຳ-ທອງເຊໂປນ ລວມມູນຄ່າ US$13 ລ້ານ ແລະ ລາຍໄດ້ຂອງກຸ່ມທຸລະກິດທ້ອງຖິ່ນກໍໄດ້ທະວີຄູນຂຶ້ນເປັນ US$47 ລ້ານ.
ໃນຕົ້ນເດືອນນີ້, LXML ໄດ້ສະເຫຼີມສະຫຼອງການເປີດອຸມົງທາງເຂົ້າເພື່ອເຈາະສຳຫຼວດບໍ່ແຮ່ໃຕ້ດິນຢູ່ພາກສະໜາມບໍ່ຄຳ-ທອງ ເຊໂປນ. ໂຄງການດັ່ງກ່າວແນໃສ່ສ້າງບໍ່ແຮ່ໃຕ້ດິນທີ່ທັນສະໄໝແຫ່ງທຳອິດຢູ່ໃນ ສປປ ລາວ. ການພັດທະນາໃໝ່ນີ້ ຈະຍືດອາຍຸຂອງບໍ່ຄຳ-ທອງ ເຊໂປນ ດ້ວຍອຸປະກອນທີ່ທັນສະໄໝ ແລະ ເຕັກນິກການຂຸດຄົ້ນບໍ່ແຮ່ທີ່ນຳໜ້າໃນໂລກ.
LXML ໄດ້ຮັບໃບຍ້ອງຍໍປະເພດ A+ ຈາກລັດຖະບານລາວ ຢ່າງສະເໝີມາເປັນໄລຍະ 10 ປີ ແລະ ທັງໄດ້ຮັບລາງວັນຫຼາຍປະເພດ ທີ່ຮັບຮູ້ ການປະກອບສ່ວນຂອງບໍລິສັດເຂົ້າໃນການພັດທະນາ ເສດຖະກິດ ແລະ ສັງຄົມ ຂອງ ສປປ ລາວ ລວມທັງ: ລາງວັນຜູ້ນຳທຸລະກິດດີເດັ່ນໃນການປ້ອງກັນ COVID-19 ໃນ ສປປ ລາວ, ລາງວັນທຸລະກິດອາຊຽນ 2020 ສຳລັບການສະກັດກັ້ນ COVID-19, ແລະ ລາງວັນ “ອາຊຽນ” ດີເດັ່ນດ້ານແຮ່ທາດ ໃນປີ 2019 ແລະ 2017.
LXML ໝາຍໝັ້ນສ້າງເປັນບໍລິສັດບໍ່ແຮ່ຕົວແບບທີ່ດີເລີດ ແລະ ເປັນຄູ່ຮ່ວມພັດທະນາ ຢູ່ໃນ ສປປ ລາວ.