ບໍລິສັດແຫ່ງໜຶ່ງໃນສະວີເດນ ໄດ້ເປີດຕົວອຸປະກອນໄມໂຄຣຊິບທີ່ຕັ້ງໂປຣແກຣມສຳລັບສະແດງໃບຢັ້ງຢືນການສີດວັກຊີນປ້ອງກັນໂຄວິດ-19 ຫຼື ພາສປອດວັກຊີນ ເພື່ອອຳນວຍຄວາມສະດວກສະບາຍ ແລະຊ່ວຍໃຫ້ການໃຊ້ຊີວິດງ່າຍຂຶ້ນ.

ການເຮັດວຽກຂອງອຸປະກອນໄມໂຄຣຊິບກໍບໍ່ມີຫຍັງຫຍຸ້ງຍາກ ເມື່ອຜູ້ທີ່ຝັງຊິບໃສ່ພື້ນຜິວໜັງທີ່ຢູ່ຫຼັງມື ຫຼື ແຂນ ຕ້ອງການເປີດຂໍ້ມູນໃບຢັ້ງຢືນການສີດວັກຊີນ ກໍພຽງແຕ່ແຕະໃສ່ບໍລິເວນຝັງຊິບແນບກັບສະມາດໂຟນ ເພື່ອເປັນການປົດລັອກຊິບໃຫ້ເປີດໄຟພີດີເອຟ (PDF) ຈາກນັ້ນເອກະສານຢັ້ງຢືນການສີດວັກຊີນກໍຈະປາກົດຢູ່ເທິງສະມາດໂຟນ ສ່ວນລາຄາຝັງຊິບແມ່ນປະມານ 100 ເອີໂຣ ຫຼື ປະມານ 1.260.000 ກີບ.

ເຈົ້າຂອງຜະລິດຕະພັນໄມໂຄຣຊິບ ຍັງເປີດເຜີຍຕື່ມວ່າ ອຸປະກອນດັ່ງກ່າວບໍ່ມີແບັດເຕີຣີ ເຮັດໃຫ້ບໍ່ສາມາດສົ່ງສັນຍານໄດ້ດ້ວຍຕົນເອງ ມັນຈິ່ງຢູ່ຢ່າງສະຫງົບໃນພື້ນຜິວໜັງທັງບໍ່ກໍ່ໃຫ້ເກີດຄວາມເຈັບປວດໃດໆ ແລະບໍ່ສາມາດບອກຕຳແໜ່ງຂອງຜູ້ໃຊ້ງານໄດ້, ພ້ອມເປີດໃຊ້ງານກໍເມື່ອມັນສຳຜັດກັບສະມາດໂຟນຂອງຜູ້ຝັງຊິບເທົ່ານັ້ນ. ຢ່າງໃດກໍຕາມ, ການຝັງຊິບລັກສະນະນີ້ຕ້ອງເປັນໄປດ້ວຍຄວາມສະໝັກໃຈ ແລະບໍ່ມີການບັງຄັບກັນແຕ່ຢ່າງໃດ.

ຂໍ້ມູນຈາກ: ໄທຣັດອອນລາຍ