ຮອງປະທານປະເທດແຫ່ງ ສປປ ລາວ ໄດ້ກ່າວເນັ້ນໃຫ້ອົງການໄອຍະການປະຊາຊົນສູງສຸດ ແກ້ໄຂຄວາມບໍ່ໂປ່ງໃສຂອງພະນັກງານການນໍາ ແລະ ພະນັກງານ-ສະມາຊິກພັກຈໍານວນໜຶ່ງຂອງອົງກອນ, ພ້ອມທັງແກ້ໄຂເລື່ອງແນວຄິດລໍາອຽງ ໃນການຄົ້ນຄວ້າ ແລະພິຈາລະນາຄະດີ ທີ່ຕິດພັນກັບຍາດພີ່ນ້ອງ ແລະຜົນປະໂຫຍດຂອງສ່ວນບຸກຄົນ.
ທ່ານ ນາງ ປານີ ຢາທໍ່ຕູ້ ໄດ້ກ່າວໃນໂອກາດປິດກອງປະຊຸມໃຫຍ່ ສະມາຊິກພັກ ຂອງອົງຄະນະພັກ ອົງການໄອຍະການປະຊາຊົນສູງສຸດ ຄັ້ງທີ V ທີ່ຈັດຂຶ້ນໃນວັນທີ 9 ພະຈິກ 2021 ທີ່ນະຄອນຫລວງວຽງຈັນ ໂດຍການເປັນປະທານຂອງ ສະຫາຍ ໄຊຊະນະ ໂຄດພູທອນ, ຫົວໜ້າອົງການໄອຍະການປະຊາຊົນສູງສຸດ ມີບາງຕອນທ່ານໄດ້ເນັ້ນໜັກບາງບັນຫາ ທີ່ອົງການໄອຍະການປະຊາຊົນສູງສຸດ ຕ້ອງສຸມໃສ່ແກ້ໄຂ ເປັນຕົ້ນ ແກ້ໄຂຈຸດອ່ອນຂໍ້ຄົງຄ້າງໃນໄລຍະຜ່ານມາໃຫ້ຂາດຕົວ; ເອົາໃຈໃສ່ ສຶກສາອົບຮົມການເມືອງ- ແນວຄິດ ໃຫ້ສະມາຊິກພັກ-ພະນັກງານ ຢ່າງເປັນປົກກະຕິ, ແກ້ໄຂຄວາມບໍ່ໂປ່ງໃສຂອງພະນັກງານການນໍາ ແລະພະນັກງານ-ສະມາຊິກພັກຈໍານວນໜຶ່ງ, ແກ້ໄຂເລື່ອງແນວຄິດລໍາອຽງ ໃນການຄົ້ນຄວ້າ ແລະພິຈາລະນາຄະດີ ທີ່ຕິດພັນກັບຍາດພີ່ນ້ອງ ແລະຜົນປະ ໂຫຍດຂອງສ່ວນບຸກຄົນ ແລະ ອື່ນໆ; ເອົາໃຈໃສ່ຈັດຕັ້ງຜັນຂະຫຍາຍ ມະຕິກອງປະຊຸມວິສາມັນ ຂອງສະພາແຫ່ງຊາດ ຊຸດທີ IX ກ່ຽວກັບ 2 ວາລະແຫ່ງຊາດ ຄື: ການແກ້ໄຂຄວາມຫຍຸ້ງຍາກທາງດ້ານເສດ ຖະກິດ-ການເງິນ ແລະການແກ້ໄຂບັນຫາຢາເສບຕິດ ເຂົ້າໃສ່ແຜນພັດທະນາວຽກງານໄອຍະການປະຊາຊົນ ໃນ 5 ປີຕໍ່ໜ້າ.
ທ່ານຮອງປະທານປະເທດຍັງໄດ້ເນັ້ນໃຫ້ອົງການໄອຍະການປະຊາຊົນສູງສຸດ ຍົກສູງຄວາມຮັບຜິດຊອບ ແລະຄວາມສາມາດໃນການແກ້ໄຂຄະດີຢາເສບຕິດ, ຄະດີອາຊະຍາກໍາ, ຄະດີສໍ້ລາດບັງຫຼວງ ແລະຄະດີອື່ນໆ ຮ່ວມກັບກະຊວງທີ່ກ່ຽວຂ້ອງ ເພື່ອຮັບປະກັນຕາມທິດຊີ້ນໍາທີ່ວ່າ “ເຂັ້ມງວດລົງໂທດຕໍ່ຜູ້ກະທໍາຜິດ ຕາມກົດໝາຍກໍານົດ”.
ຂໍ້ມູນຈາກ: Lao National Radio