ກອງທັບຊູດານເຮັດລັດຖະປະຫານ, ຍຸບລັດຖະບານ, ແລະຈັບກຸມນາຍົກລັດຖະມົນຕີພ້ອມການນຳລະດັບສູງຫຼາຍຄົນ ຂະນະທີ່ປະຊາຊົນຈຳນວນຫຼາຍຄັດຄ້ານພ້ອມພາກັນອອກມາປະທ້ວງຕໍ່ຕ້ານການຢຶດອຳນາດຂອງກອງທັບໃນຄັ້ງນີ້.
ເຫດການກໍ່ລັດຖະປະຫານຂອງກອງທັບຊູດານເລີ່ມຂຶ້ນໃນວັນທີ 25 ຕຸລາ 2021 ຜ່ານມາ ເຊິ່ງທາງກອງທັບໄດ້ອອກຄຳສັ່ງຍຸບລັດຖະສະພາພາຍຫຼັງຈັບກຸມນາຍົກລັດຖະມົນຕີ ເຮັດໃຫ້ປະຊາຊົນລາຍພັນຄົນອອກມາລວມຕົວກັນປະທ້ວງໃນເມືອງຄາທູມ ແລະອອມເດິມານ ຂະນະທີ່ທາງກອງທັບກໍໄດ້ໃຊ້ແກ໊ສນໍ້າຕາເພື່ອສະຫຼາຍການຊຸມນຸມ ເຊິ່ງມີຜູ້ໄດ້ຮັບບາດເຈັບຫຼາຍສິບຄົນຈາກເຫດການປະທະຄັ້ງນີ້.
ພົນເອກ ອັບເດລ-ຟັດຕໍ ເບີຮານ ຜູ້ນຳກອງທັບຊູດານປະກາດຜ່ານສະຖານີໂທລະພາບແຫ່ງຊາດຊູດານ ເລື່ອງການຍຸບລັດຖະສະພາ ພ້ອມອ້າງເຖິງເຫດຜົນຂອງການກໍ່ລັດຖະປະຫານວ່າ ຍ້ອນຄວາມຂັດແຍ່ງຂອງກຸ່ມນັກການເມືອງທີ່ບໍ່ລົງລອຍກັນ ຈິ່ງເຮັດໃຫ້ກອງທັບຊູດານຕັດສິນໃຈເຂົ້າແຊກແຊງ ພ້ອມກຽມຈັດຕັ້ງລັດຖະບານໂດຍກຸ່ມນັກວິຊາການເພື່ອນຳພາປະເທດໄປສູ່ການເລືອກຕັ້ງໃໝ່ ເຊິ່ງຈະມີຂຶ້ນໃນເດືອນກໍລະກົດ 2023 ພ້ອມຢືນຢັນຊັດເຈນວ່າ ທາງກອງທັບຈະຍັງຄົງເປັນຜູ້ຄອງອຳນາດຕໍ່ໄປ.
ຂໍ້ມູນຈາກ: ໄທຣັດອອນໄລນ໌