ຕາມການລາຍງານຂອງປ້ອງກັນຄວາມສະຫງົບນະຄອນຫຼວງວຽງຈັນ ໃຫ້ຮູ້ວ່າ: ທ້າວ ສີວອນ ລີ ອາຍຸ 27 ປີ ກໍາມະກອນ ຢູ່ບ້ານໂພນໄຊ ເມືອງໄຊທານີ ນະຄອນຫຼວງວຽງຈັນ ຖືກເຈົ້າໜ້າທີ່ ປກສ ກຸ່ມເວີນຄໍາ ກັກຕົວ ເມື່ອວັນທີ 17 ຕຸລາ 2021, ຂໍ້ຫາ ຄາດຕະກໍາ ໃນຂັ້ນພະຍາຍາມນໍາໃຊ້ປືນດັດແປງ ຍິງໃສ່ຫູກ້ຳຊ້າຍດ້ານລຸ່ມ ເຮັດໃຫ້ ທ້າວ ຕູລີ ລໍ ໄດ້ຮັບບາດເຈັບສົມຄວນ. ພາຍຫຼັງເກີດເຫດ ປກສ ກຸ່ມເວີນຄໍາ ໄດ້ກັກຕົວ ແລ້ວນຳ ກອງບັນຊາການ ປກສ ເມືອງໄຊທານີ ດໍາເນີນຄະດີ.
ຜ່ານການສອບສວນ ຂອງເຈົ້າໜ້າທີ່ ຜູ້ກ່ຽວໃຫ້ການສາລະພາບວ່າ: ໃນວັນທີ 15 ຕຸລາ 2021 ທ້າວ ຕູລີ ລໍ ໄດ້ເຂົ້າໄປຫຼີ້ນແຄ້ມ ຈຸດເຮັດວຽກກໍ່ສ້າງເສັ້ນທາງລົດໄຟລາວ-ຈີນ ເຂດບ້ານ ໂຊກນ້ອຍ ເມືອງໄຊເສດຖາ ນວ, ເກີດມີປາກສຽງກັນ ເຮັດໃຫ້ຕົນບໍ່ພໍໃຈ ຕົກມາຮອດວັນທີ 16 ຕຸລາ ຈິ່ງໄດ້ກັບບ້ານໄປເອົາປືນດັດແປງທີ່ປະດິດຂຶ້ນມາເອງ ແລ້ວໄປເຮືອນຂອງ ທ້າວ ຕູລີ ລໍ ເມື່ອໄປຮອດເຫັນ ຜູ້ກ່ຽວກໍາລັງເອົາຫຍ້າໃຫ້ງົວກິນ ຕົນກໍໃຊ້ປືນຍິງໃສ່ຫູກ້ຳຊ້າຍດ້ານລຸ່ມ 1 ນັດ ເຮັດໃຫ້ໄດ້ຮັບບາດເຈັບສາຫັດ ຈາກນັ້ນ ຕົນຈິ່ງເອົາຕົວຫຼົບໜີ ຮອດວັນທີ 17 ຕຸລາ ກໍຖືກເຈົ້າໜ້າທີ່ກັກຕົວ.
ປັດຈຸບັນ, ກອງບັນຊາການ ປກສ ເມືອງໄຊທານີ ນໍາຕົວທ້າວ ສີວອນ ໄປກັກກັນ ຕາມມາດຕະການຄວບຄຸມ ການແຜ່ລະບາດຂອງພະຍາດໂຄວິດ-19 ພາຍຫຼັງຄົບ 14 ວັນຖ້າບໍ່ພົບເຊື້ອພະຍາດ ຈິ່ງຈະນໍາຕົວມາດໍາເນີນຄະດີຕາມກົດໝາຍ.
ຂໍ້ມູນ: ປ້ອງກັນຄວາມສະຫງົບນະຄອນຫຼວງວຽງຈັນ