ເວັບໄຊ The Hil ລາຍງານ: ບັນດາຫ້າງຮ້ານໃນເຄືອຊຸບເປີມາເກັດ ໃນປະເທດນິວຊີແລນ ໄດ້ຂົນຍ້າຍວັດຖຸແຫຼມຄົມປະເພດມີດ ແລະ ມີດຕັດອອກຈາກຮ້ານຊົ່ວຄາວ ພາຍຫຼັງມີການໂຈມຕີຮ້ານຄ້າແຫ່ງໜຶ່ງໃນມື້ວັນສຸກຜ່ານມາ ເຮັດໃຫ້ມີຜູ້ບາດເຈັບ 6 ຄົນ ໃນນັ້ນມີ 3 ຄົນໄດ້ຮັບບາດເຈັບສາຫັດ.
ຜູ້ຈັດການຮ້ານຊຸບເປີມາເກັດ Countdown ກ່າວວ່າ: ຈຸດປະສົງຂອງການປິດຂາຍວັດຖຸມີຄົມຊົ່ວຄາວດັ່ງກ່າວ ກໍເພື່ອເຮັດໃຫ້ທຸກຄົນ ໂດຍສະເພາະລູກຄ້າ ແລະ ທີມງານໃນຮ້ານຮູ້ສຶກປອດໄພ ເນື່ອງຈາກເຫດການລະທຶກຂວັນຍັງຄົງເປັນພາບບາດຕາທີ່ຍາກຈະລືມໄດ້ ຂະນະທີ່ທາງຮ້ານກຳລັງພິຈາລະນາວ່າຈະສືບຕໍ່ຂາຍວັດຖຸມີຄົມດັ່ງກ່າວຕໍ່ໄປ ຫຼື ບໍ່ໃນອະນາຄົດ.
ເຫດເກີດໃນວັນສຸກຂອງອາທິດຜ່ານມາ ເມື່ອມີອະດີດເຈົ້າໜ້າທີ່ປ້ອງກັນຄວາມສະຫງົບຂອງນິວຊີແລນ ສັນຊາດສີລັງກາ ໄດ້ເຂົ້າໄປໃນຮ້ານຊຸບເປີມາເກັດ Countdown ແລ້ວໃຊ້ມີດຢູ່ຊັ້ນວາງເຄື່ອງໃນຮ້ານໄລ່ແທງຜູ້ຄົນ ເຮັດໃຫ້ 6 ຄົນໄດ້ຮັບບາດເຈັບ ເຮັດໃຫ້ເຈົ້າໜ້າທີ່ຕຳຫຼວດຕັດສິນໃຈວິສາມັນຄົນຮ້າຍຜູ້ກໍ່ເຫດດັ່ງກ່າວ.
ຢ່າງໃດກໍຕາມ, ຈາກເຫດການທີ່ເກີດຂຶ້ນກັບຮ້ານດັ່ງກ່າວ ກໍມີບັນດາຫ້າງຮ້ານໃນເຄືອຊຸບເປີມາເກັດພາກັນທະຍອຍຂົນຍ້າຍຂອງມີຄົມອອກຈາກຮ້ານ ແລະ ປິດຂາຍວັດຖຸດັ່ງກ່າວເປັນການຊົ່ວຄາວ.