ສຳນັກຂ່າວໄທລັດລາຍງານໃຫ້ຮູ້ໃນວັນທີ 30 ສິງຫາ 2021 ວ່າ ເຈົ້າອາວາດວັດໃນເມືອງຊຽງໃໝ່ ໄດ້ຈັດງານລ້ຽງກິນຊີ້ນດາດກັບພະໃນວັດ ລວມທັງໝົດຈໍານວນ 6 ອົງ ແລະ ປະຊາຊົນອີກ 1 ຄົນ ເຊິ່ງຕອນທີ່ເຂົ້າຈັບກຸມ ພົບເຫັນປ໋ອງເບຍເຕັມຫ້ອງ, ເຈົ້າອາວາດ ແລະ ພະ ທຸກອົງ ໄດ້ຍອມຮັບວ່າໄດ້ດື່ມເບຍແທ້, ຕໍາຫຼວດຈຶ່ງໄດ້ນັດໄປຮັບຊາບຂໍ້ກ່າວຫາ “ມົ້ວສຸມ ຊຸມແຊວໃນລັກສະນະທີ່ມີຄວາມສ່ຽງຕໍ່ການແຜ່ລະບາດຂອງໂຣກ”
ກາງເດິກວັນທີ 29 ສິງຫາ 2021, ຕໍາຫຼວດຈາກສະຖານີຕໍາຫຼວດພູທອນພູພິງຣາຊະນິເວດ ເຂົ້າກວດສອບພາຍໃນວັດປັນເສົາ ຕໍາບົນ ສຣີພູມ ເມືອງ ຊຽງໃໝ່ ພາຍຫຼັງໄດ້ຮັບການຮ້ອງຮຽນວ່າພະໃນວັດຈັດງານລ້ຽງ ຕັ້ງວົງດື່ມເບຍຢ່າງມ່ວນຊື່ນ ສົ່ງສຽງດັງ ບໍ່ຢ້ານຕໍ່ການຜິດວິໄນສົງ ແລະ ຍັງເຂົ້າຄ່າຍຜິດກົດໝາຍ.
ເຈົ້າໜ້າທີ່ໄດ້ເຂົ້າກວດສອບຕາມທີ່ຮັບແຈ້ງ ແລະ ພົບເຈົ້າອາວາດ ແລະ ພະໃນວັດ ລວມທັງໝົດ 6 ອົງ ແລະ ປະຊາຊົນຈໍານວນ 1 ຄົນກຳລັງລ້ອມວົງກິນຊີ້ນດາດພາຍໃນກຸດຕິ ພົບເບຍ ເລະ ເຄື່ອງດື່ມແອວກໍຮໍອື່ນໆຫຼາຍກວ່າ 10 ປ໋ອງຢູ່ໃນຫ້ອງ. ພະທຸກອົງຍອມຮັບວ່າດື່ມແທ້, ເຈົ້າໜ້າທີ່ຈຶ່ງແຈ້ງໃຫ້ທັງໝົດຮັບຊາບຂໍ້ກ່າວຫາ ແລະ ໃຫ້ທຸກຄົນໃນທີ່ເກີດເຫດເປົ່າກວດຫາຄ່າແອວກໍຮໍ ແລະ ພົບວ່າມີຄ່າແອວກໍຮໍໃນກະແສເລືອດ ຈຶ່ງໃຫ້ເຂົ້າມາພົບເຈົ້າໜ້າທີ່ ເພື່ອຮັບຊາບຂໍ້ກ່າວຫາເຊົ້າວານນີ້.
ຫຼ້າສຸດ ໃນເວລາ 8 ໂມງເຊົ້າຂອງວັນທີ 30 ສິງຫາ 2021, ເຈົ້າອາວາດ ແລະ ພະ ທັງໝົດໄດ້ໄປພົບເຈົ້າໜ້າທີ່ສອບສວນຕາມນັດ ໂດຍມີການຫຼີກລ່ຽງນັກຂ່າວ ແລະ ກໍມີບຸກຄົນອ້າງໂຕເປັນຜູ້ໃກ້ຊິດພະຍາຍາມຂໍປິດຂ່າວ, ໂດຍມື້ວານນີ້ ເຈົ້າໜ້າທີ່ສອບສວນໄດ້ແຈ້ງຄວາມຜິດ ຂໍ້ຫາ ມົ້ວສຸມ ຊຸມແຊວ ໂດຍລັກສະນະທີ່ມີຄວາມສ່ຽງຕໍ່ການແຜ່ລະບາດຂອງໂລກ ຕາມພຣະຣາຊະບັນຍັດໂຣກຕິດຕໍ່ ໂດຍຍັງຢູ່ໃນຂັ້ນຕອນການສອບປາກຄວາມເພີ່ມຕື່ມ.