ແຫຼ່ງຂ່າວ CNN ລາຍງານ: ນາງ ຊາມາຢາ ລິນ, ໄວ 21 ປີ ອາໄສຢູ່ໃນລັດຟໍຣິດາ, ສະຫະລັດອາເມລິກາ ຖືກເດັກນ້ອຍໄວສາມປີເຊິ່ງແມ່ນລູກຂອງນາງເອງຍິງເຂົ້າທີ່ຫົວເຮັດໃຫ້ເສຍຊີວິດຄາທີ່ ຂະນະກຳລັງປະຊຸມເລື່ອງວຽກທາງອອນລາຍ.
ເຈົ້າໜ້າທີ່ຕຳຫຼວດໃນລັດຟໍຣິດາກ່າວວ່າ: ເຫດການດັ່ງກ່າວເກີດຂຶ້ນໃນອາທິດຜ່ານມາ, ພາຍຫຼັງໄດ້ຮັບແຈ້ງຈາກພົນລະເມືອງທ່ານໜຶ່ງຜ່ານສາຍດ່ວນ 911, ທາງເຈົ້າໜ້າທີ່ໄດ້ຮີບຮ້ອນເດີນທາງໄປຍັງຈຸດເກີດເຫດທັນທີ ພ້ອມພະຍາຍາມໃຫ້ຄວາມຊ່ວຍເຫຼືອແມ່ຍິງຜູ້ເຄາະຮ້າຍ ແຕ່ກໍບໍ່ສາມາດຢື້ເອົາຊີວິດນາງໄວ້ໄດ້, ຂະນະທີ່ຜູ້ເຂົ້າຮ່ວມປະຊຸມອອນລາຍຮ່ວມກັບຜູ້ເຄາະຮ້າຍກໍຢືນຢັນເປັນສຽງດຽວກັນວ່າ ພວກຕົນໄດ້ຍິນສຽງປືນດັງຂຶ້ນໜຶ່ງນັດ ແລ້ວນາງ ຊາມາຢາ ລິນ ກໍລົ້ມລົງກັບພື້ນແລ້ວພາບຂອງເດັກນ້ອຍໄວສາມປີກໍປາກົດຕົວຢູ່ເບື້ອງຫຼັງຂອງຜູ້ເຄາະຮ້າຍ.
ເຈົ້າໜ້າທີ່ຕຳຫຼວດຄາດການວ່າ ເດັກນ້ອຍຄົນດັ່ງກ່າວອາດຈະຄົ້ນຫາເຄື່ອງຫຼິ້ນກ່ອນຈະພົບປືນທີ່ບັນຈຸລູກປືນປະໄວ້ໃນຈຸດໃດໜຶ່ງ ຂອງຫ້ອງພັກກ່ອນຈະເກີດເຫດການບໍ່ຄາດຄິດນັ້ນ, ຂະນະທີ່ເຈົ້າໜ້າທີ່ໄອຍະການຍັງບໍ່ສາມາດໃຫ້ຄວາມເຫັນໃດໆກ່ຽວກັບການສືບສວນ-ສອບສວນທີ່ກຳລັງດຳເນີນການຢູ່.