ແຫຼ່ງຂ່າວ BBC ລາຍງານ: ທາງການເກຣັກເລັ່ງອົບພະຍົບປະຊາຊົນ ແລະ ນັກທ່ອງທ່ຽວ 2.000 ກວ່າຄົນທີ່ອາໄສຢູ່ໃນເກາະເອເວຍເຊິ່ງເປັນເກາະໃຫຍ່ອັນດັບສອງຂອງປະເທດໄປຍັງພື້ນທີ່ປອດໄພ ເນື່ອງຈາກເກີດໄຟໄໝ້ປ່າຮຸນແຮງໃນມື້ວານນີ້ ຂະນະທີ່ເຈົ້າໜ້າທີ່ດັບເພີງກຳລັງພະຍາຍາມຄວບຄຸມໄຟ ທີ່ຍັງຢູ່ໃນສະພາບທີ່ຄວບຄຸມໄດ້ຍາກຍ້ອນມີລົມພັດແຮງ ເຮັດໃຫ້ບ້ານເຮືອນຫຼາຍຫຼັງຖືກກືນເຂົ້າໄປພ້ອມກັບໄຟປ່າຄັ້ງນີ້.

ເຫດໄຟໄໝ້ດັ່ງກ່າວເນື່ອງມາຈາກເກີດຄື້ນຄວາມຮ້ອນຮຸນແຮງທີ່ສຸດໃນຮອບ 30 ປີ ຍ້ອນການປ່ຽນແປງຂອງສະພາບອາກາດ ເຮັດໃຫ້ອຸນຫະພູມສູງເຖິງ 45 ອົງສາ. ພ້ອມກັນນັ້ນ, ເຈົ້າໜ້າທີ່ດັບເພີງຫຼາຍຮ້ອຍຄົນ ພ້ອມທະຫານ ແລະ ເຮືອບິນເຮລີຄອບແຕ 17 ລຳຖືກສົ່ງໄປຍັງເກາະເອເວຍ.

ນາງ ວາຊີລີເກຍ, ປະຊາຊົນທີ່ອາໄສໃນເກາະເອເວຍກ່າວວ່າ: ທຸກຢ່າງມັນປ່ຽນແປງແບບຄາດບໍ່ເຖິງ, ເຮືອນຢູ່ກໍຖືກໄຟໄໝ້ບໍ່ເຫຼືອຫຍັງ ມັນເປັນຫາຍະນະຮ້າຍແຮງທີ່ຫາກໍເຄີຍພົບໃນຊີວິດ, ໝູ່ບ້ານຂອງພວກເຮົາຖືກໄຟກືນກິນໝົດເຫຼືອພຽງເສດຂີ້ເຖົ່າ.

ເຈົ້າໜ້າທີ່ຂອງລັດກ່າວວ່າ: ຄວາມສ່ຽງຈາກການເກີດອັກຄີໄພໃນຫຼາຍເຂດທົ່ວປະເທດຍັງມີສູງ ເນື່ອງຈາກ ເກຣັກອາດຈະປະເຊີນກັບ “ລະດູຮ້ອນຮຸນແຮງ” ເຊິ່ງເປັນຜົນເຮັດໃຫ້ເກີດໄຟໄໝ້ປ່າງ່າຍຂຶ້ນ. ຢ່າງໃດກໍຕາມ, ໃນຊ່ວງ 10 ວັນຜ່ານມາ, ພື້ນທີ່ປ່າໃນເກຣັກຈຳນວນ 56.000 ກວ່າເຮັກຕາຖືກໄຟໄໝ້. ປັດຈຸບັນຫຼາຍປະເທດໄດ້ຍື່ນມືເຂົ້າຊ່ວຍເຫຼືອເກຣັກໃນການຕໍ່ສູ້ຕ້ານອັກຄີໄພຄັ້ງນີ້ ເຊັ່ນ ສະຫະຣາຊະອານາຈັກອັງກິດ, ຝຣັ່ງເສດ, ໂຣມາເນຍ ແລະ ສະວິດເຊີແລນ.