ໃນວັນພະຫັດທີ 10 ມີຖຸນາ 2021 ທີ່ຜ່ານມາສໍານັກຂ່າວຕ່າງປະເທດໄດ້ລາຍງານວ່າ: ຫຼັງຈາກທີ່ຄະນະກໍາມະການຕໍ່ຕ້ານການສໍ້ລາດບັງຫຼວງຂອງມຽນມາໄດ້ດໍາເນີນການສືບສວນຂໍ້ກ່າວຫາຫຼາຍຢ່າງຂອງທ່ານນາງ ອ່ອງຊານ ຊູຈີ ພວກເຂົາກໍເຫັນວ່າອະດີດຜູ້ນໍາປະເທດຄົນນີ້ໄດ້ໃຊ້ຕໍາແໜ່ງໜ້າທີ່ໃນການສໍ້ລາດບັງຫຼວງ ເຮັດໃຫ້ທ່ານນາງ ອ່ອງຊານ ຊູຈີ ຖືກຕັ້ງຂໍ້ຫາຕາມກົດໝາຍຕໍ່ຕ້ານການສໍ້ລາດບັງຫຼວງມາດຕາທີ 55 ເຊິ່ງຫາກເຫັນວ່າການຕັ້ງຂໍ້ຫາດັ່ງກ່າວນັ້ນເປັນຄວາມຈິງທ່ານນາງ ອ່ອງຊານ ຊູຈີ ອາດຕິດຄຸກສູງເຖິງ 15 ປີ.

ຄະນະກໍາມະການຕໍ່ຕ້ານການສໍ້ລາດບັງຫຼວງໄດ້ຕັ້ງອີກໜື່ງຂໍ້ຫາກໍຄືທ່ານນາງອ່ອງຊານ ຊູຈີ ໄດ້ໃຊ້ອໍານາດແບບບໍ່ເປັນທໍາໃນການໃຫ້ເຊົ່າທີ່ດິນໃນເມືອງຫຼວງເນປິດໍ ແລະ ສ້າງອາຄານເພື່ອເປີດເປັນສໍານັກງານໃຫຍ່ຂອງມູນລະນິທິ “ດໍ ຂິ່ນ ຈີ”  ແລະ ຄະນະກໍາມະການຍັງກ່າວຫາວ່າທ່ານນາງອ່ອງຊານ ຊູຈີ ໄດ້ຮັບເງິນ ແລະ ຄໍາ ມູນຄ່າລວມຫຼາຍກວ່າ 600,000 ດອລລ້າແບບບໍ່ຖືກຕ້ອງຕາມກົດໝາຍ.