ຍິງຊາວຍີ່ປຸ່ນທີ່ຕິດພະຍາໂຄວິດ-19 ໄດ້ຮັບການປ່ຽນຖ່າຍປອດຈາກຜູ້ບໍລິຈາກທີ່ຍັງມີຊີວິດຢູ່ ແລະ ຖືວ່າເປັນຄັ້ງທໍາອິດຂອງໂລກ ທີ່ລາວຍັງສາມາດກັບໄປໃຊ້ຊີວິດໄດ້ປົກກະຕິໄດ້ພາຍໃນໄລຍະເວລາ 3 ເດືອນ.
ຍິງຄົນນີ້ໄດ້ຖືກຜ່າຕັດປ່ຽນຖ່າຍປອດຈາກທີມໝໍໃນໂຮງໝໍກຽວໂຕ ໂດຍປອດທັງສອງຂ້າງຂອງຍິງຄົນນີ້ໄດ້ຮັບຄວາມເສຍຫາຍຮຸນແຮງຈາກການຕິດເຊື້ອໂຄວິດ-19 ໃນຊ່ວງກາງປີ 2020 ທີ່ຜ່ານມາ.
ທີມໝໍທີ່ຜ່າຕັດໄດ້ກ່າວວ່າ: ການຜ່າຕັດໃນຄັ້ງນີ້ແມ່ນການຜ່າຕັດປ່ຽນຖ່າຍປອດຄັ້ງທໍາອິດຂອງໂລກ ທີ່ໄດ້ຮັບບໍລິຈາກປອດຂອງຄົນທີ່ຍັງມີຊີວິດຢູ່ ເຊິ່ງໂດຍປົກກະຕິແລ້ວຜູ້ປ່ວຍທີ່ປອດໄດ້ຮັບຄວາມຄວາມເສຍຫາຍຈາກໂຄວິດ-19 ມັກຈະໄດ້ຮັບບໍລິຈາກປອດ ຈາກຜູ້ທີ່ເສຍຊີວິດຍ້ອນມີອາການສະໝອງຕາຍ ແຕ່ໃນກໍລະນີນີ້ແມ່ນໄດ້ຮັບບໍລິຈາກຈາກຄົນທີ່ຍັງມີຊີວິດຢູ່.
ໃນກໍລະນີຂອງຍິງຊາວຍີ່ປຸ່ນຄົນນີ້ມີອາການຫາຍໃຈຍາກກ່ອນທີ່ອາການຈະຮຸນແຮງຂື້ນ ຍິງຄົນນີ້ຕ້ອງໄດ້ໃຊ້ເຄື່ອງຊ່ວຍຊີວິດທີ່ເຮັດໜ້າທີ່ເປັນປອດທຽມດົນກວ່າ 3 ເດືອນ. ໝໍບອກວ່າເຖິງລາວຈະເຊົາຈາກການເປັນພະຍາດໂຄວິດ-19 ແລ້ວແຕ່ປອດຂອງລາວກໍບໍ່ກັບມາເປັນຄືເກົ່າ ທາງທີມແພດເລີຍສະເໜີທາງເລືອກດຽວໃຫ້ລາວກໍຄື: ການປ່ຽນຖ່າຍປອດໃໝ່ ໂດຍຜົວ ແລະ ລູກຂອງລາວຈຶ່ງໄດ້ອາສາບໍລິຈາກປອດໃຫ້ກັບຍິງຄົນດັ່ງກ່າວ, ເຊິ່ງຜົວບໍລິຈາກປອດເບື້ອງຊ້າຍ ແລະ ລູກຊາຍບໍລິຈາກປອດເບື້ອງຂວາ.
ໃນຕອນນີ້ທີມແພດໄດ້ຄາດວ່າອີກສອງເດືອນຍິງຄົນດັ່ງກ່າວກໍຈະສາມາດອອກໂຮງໝໍໄດ້ ແລະ ກັບມາໃຊ້ຊີວິດປົກກະຕິໃນອີກສາມເດືອນຂ້າງໜ້າ.