ໄວລຸ້ນຍິງຊາວ ໂລມາເນຍ ຈັບແອນ້ອຍຫາກໍ່ເກີດໃສ່ເຕົາແລ້ວເຜົາ ເພື່ອປົກປິດບໍ່ໃຫ້ພໍ່ ແລະ ແມ່ຕົນເອງຮູ້ວ່າຕົນເອງມີລູກ ສຳນັກຂ່າວ Mirror ລາຍງານວ່າ ຍິງໄວລຸ້ນອາຍຸ 17 ປີ ເກີດລູກຕອນເດິກທີ່ເຮືອນ ແລະ ຢ້ານວ່າພໍ່ແມ່ນາງຈະຮູ້ວ່ານາງຖືພາ ຈຶ່ງໄດ້ນຳໝອນອັດໜ້າ ລູກທີ່ຫາກໍ່ເກີດ ຈົນລູກຂາດອາກາດຫາຍໃຈຕາຍ ຈາກນັ້ນຈຶງໂຍນຮ່າງລູກໃສ່ລົງໄປໃນເຕົາເຜົາໄມ້ ແລະ ຈຸດໄຟ
ທັງນີ້ ຫລັງຈາກທີ່ຍິງໄວລຸ້ນຄົນນີ້ຈັດການທຸກຢ່າງສຳເລັດແລ້ວ ນາງໄດ້ໂທລະສັບຫາເພື່ອນ ແລະ ເລົ່າໃຫ້ຟັງໂດຍຫລັງຈາກນັ້ນບໍ່ດົນນາງກໍຖືກເຈົ້າຫນ້າທີ່ຕຳລວດເຂົ້າຈັບກຸມ ເພື່ອນ ຂອງຍິງໄວລຸ້ນ ກ່າວວ່າ ບໍ່ມີໃຜຮູ້ເລີຍວ່ານາງນັ້ນຖືພາ ບໍ່ມີໃຜເບິ່ງອອກ ແລະ ນາງເອງກໍບໍ່ໄດ້ບອກເລື່ອງນີ້ກັບໃຜ ພວກເຮົາຮັບຮູ້ຫລັງຈາກທີ່ນາງມາໂຮງຮຽນໃນມື້ຖັດມາ ແລະ ນາງກໍເລົ່າທຸກຢ່າງທີ່ນາງເຮັດໃຫ້ພວກເຮົາຟັງ ໃນຕອນທຳອິດພວກເຮົາຄິດວ່າມັນເປັນເລື່ອງຕະຫລົກເທົ່ານັ້ນ ແຕ່ພໍໄລຍະໜື່ງນາງເລີ່ມລົງລາຍລະອຽດເຫດການຫລາຍຂຶ້ນ ເຮົາກໍຮັບຮູ້ໄດ້ທັນທີວ່າມັນຄືເລື່ອງແທ້ ຫລັງຈາກນັ້ນເຮົາຈຶ່ງໄດ້ໄປບອກອາຈານ ແລະ ອາຈານກໍໄດ້ໂທແຈ້ງເຈົ້າຫນ້າທີ່ຕຳລວດ
ດ້ານ ຍິງໄວລຸ້ນກ່າວວ່າ ຫລັງຈາກທີ່ນາງໃຫ້ກຳເນີດລູກມາ ນາງກໍໄດ້ຕັດສິນໃຈທີ່ຈະຂ້າລູກ ແລະ ຈຸດໄຟເຜົາທັນທີ ເພາະນາງຢ້ານວ່າພໍ່ແມ່ຈະຮູ້ວ່າຖືພາ ແລະ ຈະຮ້າຍນາງຢ່າງໃດກໍຕາມ ຫລັງຈາກເຈົ້າຫນ້າທີ່ຕຳລວດພິສູດຫລັກຖານ ແລະ ສືບພະຍານຈົນຄົບ ກໍໄດ້ແຈ້ງຂໍ້ຫາຄາດຕະກຳ ແລະ ສານໄດ້ຕັດສິນໃຫ້ຍິງໄວລຸ້ນຄົນນີ້ຈຳຄຸກຕະຫລອດຊີວິດ