ພາຍຫຼັງທີ່ປະທານາທິບໍດີໂຈ ໄບເດນ ກ່າວຕອນໜຶ່ງໃນການໃຫ້ສຳພາດກັບເຄືອຂ່າຍສະຖານີໂທລະພາບ ABC News ໂດຍອ້າງຂໍ້ມູນຈາກໜ່ວຍງານສືບລັບວ່າ ປະທານາທິບໍດີວາລາດີເມຍ ປູຕິນ ມີສ່ວນພົວພັນກັບການວາງຢາພິດທ່ານ ອາເລັກ ນາວັລນີ ອະດີດຜູ້ນຳຝ່າຍຄ້ານຄູ່ກໍລະນີຜູ້ນຳຣັດເຊຍ ໂດຍພິທີກອນໄດ້ຖາມທ່ານ ໄບເດນວ່າ ທ່ານເບິ່ງປູຕິນເປັນ “ຄາດຕະກອນ” ຜູ້ວາງຢານາວັລນີ ຫຼື ບໍ່ ແລ້ວທ່ານ ໄບເດນ ກໍ່ຕອບພິທີກອນວ່າ “ແມ່ນແລ້ວຂ້ອຍກໍ່ຄິດແນວນັ້ນ”.
ໃນຂະນະດຽວກັນ, ທ່ານ ໂຈ ໄບເດນ ຍັງກ່າວອ້າງຂໍ້ມູນຈາກຝ່າຍຄວາມໝັ້ນຄົງອີກວ່າ ຣັດເຊຍມສ່ວນຮ່ວມໃນຄວາມພະຍາຍາມທີ່ຈະແຊກແຊງການເລືອກຕັ້ງປະທານາທິບໍດີສະຫະລັດໃນເດືອນພະຈິກທີ່ຜ່ານມາເຊິ່ງຈະເປັນຜົນປະໂຫຍດຕໍ່ໄຊຊະນະໃນການເລືອກຕັ້ງຄັ້ງທີສອງຂອງປະທານາທິບໍດີ ໂດນັລ ທຣໍ້າ, ເຊິ່ງຜູ້ນຳ ອາເມລິກາກ່າວວ່າ “ຣັດເຊຍຈະຕ້ອງຊົດເຊີຍ.” ທີ່ພະຍາຍາມທຳລາຍການເລືອກຕັ້ງພວກເຮົາຈະໄດ້ເຫັນກັນໃນໄວໆນີ້. “
ພຽງເວລາບໍ່ດົນຫຼັງຈາກທ່ານ ໄບເດນ ກ່າວໃຫ້ສຳພາດລັດຖະບານຣັດເຊຍໄດ້ຮຽກຕົວທ່ານ ອານາໂຕລີ ອັນໂຕນອຟ ເອກອັກຄະລັດຖະທູດປະຈຳວໍຊິງຕັນດີຊີ ເດີນທາງກັບປະເທດທັນທີ ໂດຍຣັດເຊຍລະບຸວ່າ “ເພື່ອທົບທວນ ແລະ ປຶກສາຫາລືທິດທາງຂອງການພົວພັນສາກົນກັບສະຫະລັດອາເມລິກາ ແລະ ວິເຄາະວ່າຈະມີມາດຕະການຫຍັງຕໍ່ໄປ “.
ເລື່ອງດັ່ງກ່າວໄດ້ສົ່ງຜົນໃຫ້ຝ່າຍ ປະທານາທິບໍດີ ປູຕິນ ອອກມາຕອບໂຕ້ຜູ້ນຳອາເມລິກາ ຈາກການຖືກກ່າວຫາວ່າເປັນຄາດຕະກອນທີ່ມີສ່ວນກ່ຽວຂ້ອງໃນການລັກລອບວາງຢາພິດ ທ່ານ ນາວັລນີ ໂດຍທ່ານ ປູຕິນ ໄດ້ກ່າວວ່າ ທ່ານຕ້ອງການເຊີນປະທານາທິບໍດີ ໂຈ ໄບເດນ ຫາລືຜ່ານວິດີໂອຄອນຟຣີເຣນ ເພື່ອຫາລືຄວາມສຳພັນແບບພາຄີ.
ຜູ້ນຳຣັດເຊຍຍັງກ່າວເຖິງກໍລະນີຜູ້ນຳອາເມລິກາກ່າວຫາຕົນວ່າເປັນຄາດຕະກອນນັ້ນ ໂດຍໄດ້ແນະນຳວາ ເຮົາຄວນລົມກັນແບບຕົວຕໍ່ຕົວຢ່າງເປີດເຜີຍຕໍ່ສາທາລະນະຢ່າງຮີບດ່ວນ ເນື່ອງຈາກຄຳເວົ້າຂອງທ່ານ ໄບເດນ ເປັນທີ່ໜ້າສົນໃຈຢ່າງຍິ່ງຂອງປະຊາຊົນຣັດເຊຍ ແລະ ອາເມລິກາ ເພາະເລື່ອງນີ້ເຮັດໃຫ້ຄວາມສຳພັນຂອງທັງສອງຊາດສັ່ນຄອນອີກຄັ້ງ.
ທ່ານ ປູຕິນ ໄດ້ກ່າວເຖິງຜູ້ນຳອາເມລິກາກໍລະນີເປັນຄາດຕະກອນວ່າ “ເຂົາບໍ່ໄດ້ດີກວ່າຂ້ອຍ” ຜູ້ນຳຣັດເຊຍ ຖາມທ່ານ ໄບເດນ ກັບຄືນໄປວ່າ ໃນປະຫວັດສາດຂອງອາເມລິກາມີການປະຕິຮູບຕໍ່ກຸ່ມເຊື້ອຊາດອິນເດຍແດງ ແລະ ຄົນເຊື້ອສາຍແອຟຣິກາແນວໃດ ລວມໄປເຖິງກໍລະນີສົງຄາມໂລກຄັ້ງທີສອງ ຖີ້ມລະເບີດປະລະມານູ 2 ລູກໃສ່ຍີ່ປຸ່ນນັ້ນ ຜູ້ ນຳ ຣັດເຊຍກ່າວວ່າ, ພວກເຂົາ (ສະຫະລັດ) ຄິດວ່າພວກເຮົາຄືກັນ. ແຕ່ຕົວຈິງແລ້ວພວກເຮົາແຕກຕ່າງກັນ ເພາະວ່າພວກເຮົາມີລະຫັດພັນທຸກຳທາງວັດທະນະທຳ ແລະ ສິນລະທຳທີ່ບໍ່ຄືກັບເຂົາເຈົ້າ.
ຮຽບຮຽງຂ່າວ: ພຸດສະດີ