ເນື່ອງຈາກສະພາບການລັກລອບເຂົ້າ-ອອກເມືອງຂອງບຸກຄົນຈາກປະເທດທີ່ມີການລະບາດຂອງເຊື້ອໄວຣັດໂຄວິດ-19 ພາຍໃນຊຸມຊົນຜ່ານແຂວງບໍ່ແກ້ວ ແລະ ແຂວງຫຼວງນໍ້າທາ ໃນວັນທີ 24 ພະຈິກ 2020 ຈາກຝັ່ງປະເທດມຽນມາ ກ່ອນຈະລັກກັບໄປປະເທດຈີນ ແລະ ຖືກຈັບ.
ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ທ່ານ ສົມດີ ດວງດີ ໄດ້ໃຫ້ທິດຊີ້ນໍາ ມື້ວັນທີ 6 ທັນວາ 2020 ທີ່ຜ່ານມາໃຫ້ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ແລະ ແຂວງຫຼວງນໍ້າທາ ເລັ່ງຕິດຕາມ 7 ຄົນ ທີ່ເປັນຜູ້ສໍາຜັດໃກ້ຊິດໂດຍກົງກັບຊາຍຈີນ 2 ຄົນດັ່ງກ່າວ ໃນ ຄະຂະນະທີ່ພັກເຊົາຢູ່ແຂວງບໍ່ແກ້ວ ແລະ ແຂວງຫຼວງນໍ້າທາ ກ່ອນທີ່ຈະລັກຂ້າມຊາຍແດນກັບ ໄປປະເທດຂອງຕົນ.
ທ່ານ ສົມດີ ຍັງໄດ້ຊີ້ນໍາໃຫ້ອໍານາດການປົກຄອງແຂວງ ບໍ່ແກ້ວ ປິດເມືອງຕົ້ນເຜິ້ງ ໂດຍບໍ່ອະນຸຍາດໃຫ້ຄົນເຂົ້າ-ອອກ ໃນໄລຍະ 14 ວັນ ແລະ ໃຫ້ປະຕິບັດມາດຕະການປ້ອງກັນການຕິດເຊື້ອ ແລະ ແຜ່ເຊື້ອຢ່າງເຂັ້ມງວດ ພ້ອມນັ້ນໃຫ້ເກັບຕົວຢ່າງທຸກຄົນທີ່ມີອາການທາງລະບົບຫາຍໃຈ ຫຼື ເປັນໄຂ້ ມາກວດວິເຄາະຫາເຊື້ອພະຍາດດັ່ງກ່າວ.
ສະເພາະແຂວງຫຼວງນໍ້າທາໃຫ້ປິດເຂດເສດຖະກິດພິເສດ ບໍ່ເຕັນ ໂດຍບໍ່ອະນຸຍາດໃຫ້ຄົນ ເຂົ້າ-ອອກ ໃນໄລຍະ 14 ວັນເຊັ່ນກັນ ແລະ ໃຫ້ເກັບຕົວຢ່າງທຸກຄົນທີ່ມີອາການທາງລະບົບຫາຍໃຈ ຫຼື ເປັນໄຂ້ ມາກວດວິເຄາະຫາເຊື້ອພະຍາດ ດັ່ງກ່າວ ແລະ ໃຫ້ ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງບໍ່ແກ້ວ ແລະ ແຂວງຫຼວງນໍ້າທາ ເພີ່ມມາດຕະການ ຕິດຕາມກວດກາຜູ້ຈະເດີນທາງເຂົ້າມາໃນແຂວງຂອງຕົນກວ່າເກົ່າ.
ຮຽບຮຽງຂ່າວ: ພຸດສະດີ