ອີງຕາມການລາຍງານຈາກ ຂ່າວ ປກສ ໃຫ້ຮູ້ວ່າ ເຈົ້າໜ້າທີ່ຄະນະກໍາມະການປ້ອງກັນງານບຸນພຣະທາດຫຼວງ ເປີດເຜີຍວ່າ: ໃນປີນີ້, ເຖິງແມ່ນວ່າການຈັດງານຈະເປັນພຽງແຕ່ຮີດຄອງປະເພນີເທົ່ານັ້ນ, ແຕ່ກໍຄາດວ່າຈະມີມວນຊົນເຂົ້າມາທ່ຽວຊົມ ແລະ ກາບໄຫວ້ອົງພຣະທາດຫຼວງເປັນຈໍານວນຫຼວງຫຼາຍ ເຮັດໃຫ້ທາງເຂົ້າ-ອອກ ແລະ ສະຖານທີ່ຈັດງານມີຄວາມແອອັດ. ຕໍ່ກັບບັນຫານີ້, ອາດຈະມີມິດສາຊີບສວຍໂອກາດແຫກ-ລ່ວງກະເປົາຂອງຜູ້ທີ່ມາທ່ຽວງານກໍເປັນໄດ້.
ແຕ່ຢ່າງໃດກໍຕາມ, ເຖິງຈະມີເຈົ້າໜ້າທີ່ກໍາລັງ ປກຊ-ປກສ ເຮັດໜ້າທີ່ປ້ອງກັນອາດຈະເຮັດໜ້າທີ່ບໍ່ທົ່ວເຖິງໄດ້. ສະນັ້ນ, ຜູ້ທີ່ມາທ່ຽວ ຕ້ອງເປັນເຈົ້າການເພີ່ມສະຕິລະວັງຕົວໃຫ້ສູງ ເປັນຕົ້ນແມ່ນ ການພາຍກະເປົາຕ້ອງພາຍຢູ່ທາງໜ້າເອົາເສື້ອປົກປິດໄວ້ ແລະ ເອົາແຂນກອດໄວ້, ບໍ່ຄວນໃສ່ສາຍຄໍ ແລະ ນໍາວັດຖຸທີ່ມີລາຄາແພງມານໍາ. ນອກນັ້ນ, ໃຫ້ຫຼີກລ່ຽງບ່ອນແອອັດ; ສໍາລັບຜູ້ທີ່ມາພ້ອມລູກນ້ອຍແມ່ນໃຫ້ຂຽນເບີໂທຜູ້ປົກຄອງໃສ່ຖົງເສື້ອໃນກໍລະນີພັດຫຼົງ ຈຶ່ງສະດວກໃນການແຈ້ງຫາ.
ເຊິ່ງບຸນທາດຫຼວງໃນປີຜ່ານມາ, ກໍມີປະກົດການຫຍໍ້ທໍ້ເກີດຂຶ້ນເປັນຈໍານວນຫຼວງຫຼາຍ ເຊັ່ນ: ໃນປີ 2017, ມີປະກົດການຫຍໍ້ທໍ້ເກີດຂຶ້ນທັງໝົດຈໍານວນ 11 ເລື່ອງ; ໃນນີ້, ແຫກກະເປົາ 4 ເລື່ອງ ແລະ ລ່ວງກະເປົາ 7 ເລື່ອງ ມູນຄ່າຄວາມເສຍຫາຍ 11.350.000 ກີບ, ເງິນ 1.000 ບາດ, ໂທລະສັບ 7 ເຄື່ອງ, ບັດປະຈໍາຕົວ ແລະ ບັດເອທີເອັມ ຈໍານວນໜຶ່ງ.ປີ 2018, ມີປະກົດການຫຍໍ້ທໍ້ເກີດຂຶ້ນ 3 ເລື່ອງ; ໃນນີ້, ແຫກກະເປົາ 2 ເລື່ອງ ແລະ ລ່ວງກະເປົາ 1 ເລື່ອງ ມູນຄ່າຄວາມເສຍຫາຍ 1.900. 000 ກີບ, ເງິນ 5.800 ບາດ ແລະ ເຄື່ອງມີຄ່າຈໍານວນໜຶ່ງ.
ນອກນັ້ນ, ກໍຍັງມີເດັກນ້ອຍຫຼົງກັບ ພໍ່-ແມ່ຈໍານວນໜຶ່ງ. ສ່ວນປີ 2019 ຜ່ານມາ, ແມ່ນບໍ່ມີປະກົດ ການຫຍໍ້ທໍ້ເກີດຂຶ້ນ ສາມາດຮັບປະກັນໄດ້ຄວາມສະຫງົບ ແລະ ຄວາມປອດໄພ 100%; ແຕ່ສະພາບທີ່ພົ້ນເດັ່ນພາຍໃນງານກໍມີພຽງແຕ່ແຈ້ງຄົນພັດຫຼົງເທົ່ານັ້ນ ເຊັ່ນ: ພໍ່-ແມ່ຫຼົງກັນກັບລູກ, ໝູ່ຄູ່ຫຼົງກັນ ແລະ ຜູ້ເຖົ່າຜູ້ແກ່ທີ່ມາຈາກຕ່າງແຂວງ ຈໍານວນ 30 ກວ່າຄົນ.
ຮຽບຮຽງຂ່າວ: ພຸດສະດີ