ໜັງສືພິມວຽງຈັນໃໝ່ ລາຍງານວ່າ ຫ້ອງການກະສິກຳ ແລະ ປ່າໄມ້ ເມືອງ ໃໝ່ ແຂວງ ຜົ້ງສາລີ ແຈ້ງໃຫ້ຮູ້ວ່າ: ນັບແຕ່ທ້າຍເດືອນ ມິຖຸນາ 2020 ນີ້, ໄດ້ມີຝູງຕັກກະແຕນໄມ້ປ່ອງ ລະບາດທໍາລາຍເຂົ້າໄຮ່ ແລະ ພຶດກະສິກໍາອື່ນໆ ຂອງປະຊາຊົນຢູ່ບ້ານ ເພຍລໍໃໝ່ ເມືອງໃໝ່ ແຂວງ ຜົ້ງສາລີ, ຖຶກເສຍຫາຍຫຼາຍກວ່າ 4 ເຮັກຕາ ທີ່ເປັນເນື້ອທີ່ເຂົ້າໄຮ່ ແລະ ເນື້ອທີ່ປູກພຶດຂອງປະຊາຊົນຈຳນວນ 20 ຄອບຄົວ.
ປະຈຸບັນນີ້, ທາງອໍານາດການປົກຄອງເມືອງ ໂດຍສົມທົບກັບ ຫ້ອງການກະສິກຳ ແລະ ປ່າໄມ້ ເມືອງໃໝ່ ໄດ້ລົງຕິດຕາມຜົນເສຍຫາຍ ແລະ ໄດ້ແຈກຢາຍຢາພົ່ນສີດເພື່ອປ້ອງກັນຝຸງຕັກກະແຕນດັ່ງກ່າວໃຫ້ພໍ່ແມ່ປະຊາຊົນ ຈໍານວນ 1.000 ຖົງ, 1 ຖົງໃສ່ນໍ້າໄດ້ 20 ລິດ.
ໃນທຸກໆປີ, ພໍຮອດລະດູຝົນ ຈະມີຝູງຕັກກະແຕນໄມ້ປ່ອງອອກມາທໍາລາຍພືດຜັກຂອງປະຊາຊົນຢູ່ເຂດພາກເໜືອ, ໂດຍສະເພາະແມ່ນຢູ່ແຂວງ ຜົ້ງສາລີ, ຫົວພັນ, ຫຼວງພະບາງ ແລະ ຫຼວງນໍ້າທາ.
ຮຽບຮຽງຂ່າວ: ພຸດສະດີ