ສຳນັກຂ່າວສານປະເທດລາວ ລາຍງານວ່າ ຄວາມຄືບໜ້າການຈັດຕັ້ງປະຕິບັດ ໂຄງການກໍ່ສ້າງທາງລົດໄຟ ລາວ-ຈີນໄລຍະ 2 ແຕ່ສະຖານີໂດຍສານ ນະຄອນຫຼວງວຽງຈັນ ຫາສະຖານີສິນຄ້າວຽງຈັນໃຕ້ ທີ່ທ່ານາແລ້ງ ແມ່ນສໍາເລັດການປັກຫຼັກຂອບເຂດສະຖານີໂດຍສານ ໃນເນື້ອທີ່ 150 ເຮັກຕາ, ສໍາເລັດການປັກຫຼັກຂອບເຂດສະຫງວນທາງລົດໄຟ ຄວາມຍາວ 17 ກິໂລແມັດ, ສໍາເລັດການປັກຫຼັກຂອບເຂດສະຖານີສິນຄ້າວຽງຈັນໃຕ້ 2 ຈຸດ ໃນຈໍານວນ 3 ຈຸດ; ສ່ວນການມອບພື້ນທີ່ເພື່ອການກໍ່ສ້າງຂອງໂຄງການ ແມ່ນປະຕິບັດໄດ້ 100% ໃນ 409 ກິໂລແມັດ. ໂດຍລວມການຈັດຕັ້ງປະຕິບັດວຽກງານຕ່າງໆຂອງການກໍ່ສ້າງທາງລົດໄຟ ລາວ-ຈີນ ໄດ້ດໍາເນີນໄປຢ່າງຄ່ອງແຄ້ວວ່ອງໄວ, ຮັບປະ ກັນຄຸນນະພາບ, ສາມາດສໍາເລັດຕາມກຳນົດເວລາ ແລະ ເຮັດໃຫ້ໂຄງການນີ້ ກາຍເປັນໂຄງການປອດໃສ, ຂາວສະອາດຢ່າງແທ້ຈິງ.

ທ່ານ ຈັນຕຸລາ ພະນະລາສີ ຫົວໜ້າຄະນະຄຸ້ມຄອງໂຄງການກໍ່ສ້າງທາງລົດໄຟ ລາວ-ຈີນ ເປີດເຜີຍວ່າ: ຮອດທ້າຍເດືອນພຶດສະພາ 2020, ການປະຕິບັດໂຄງການກໍ່ສ້າງທາງລົດໄຟ ລາວ-ຈີນ ມີຄວາມຄືບໜ້າດີ ສາມາດບັນລຸ 89,43% ຂອງວຽກງານກໍ່ສ້າງພື້ນຖານໂຄງລ່າງ ທາງລົດໄຟ; ໃນນີ້, ໄດ້ຊີເຈາະໄດ້ 75 ອຸໂມງ, ຍາວ 223.600 ແມັດ ເຈາະທະລຸແລ້ວ 65 ອຸໂມງ, ກໍ່ສ້າງຂົວທັງໝົດ 164 ແຫ່ງ, ສ້າງເສົາຂົວສໍາເລັດ 1.959 ເສົາ ເທົ່າກັບ 98,10% ຂອງການອອກແບບທັງໝົດ, ສໍາເລັດການວາງຂາງຂົວ 746 ຊ່ວງເສົາ ກວມເອົາ 36,60%; ສ່ວນການວາງລາງແມ່ນເລີ່ມແຕ່ບ້ານຫ້ວຍນໍ້າເຢັນ ເມືອງນາຊາຍທອງ ນະຄອນ ຫຼວງວຽງຈັນ ຫາ ແຂວງຫຼວງພະບາງ ສໍາເລັດ 49,7 ກິໂລແມັດ ຂອງຄວາມຍາວທັງໝົດ 409 ກິໂລແມັດ.

ໂອກາດນີ້, ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ, ຮອງຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ(ຜູ້ປະຈໍການ) ຍັງໄດ້ຍົກໃຫ້ເຫັນຜົນສໍາເລັດຫຼາຍດ້ານ ເປັນຕົ້ນການປັບປຸງໂຄງຮ່າງການຈັດຕັ້ງຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ຄືນໃຫມ່, ການແບ່ງຄວາມຮັບຜິດຊອບໃຫ້ແຕ່ລະພາກສ່ວນ, ທັງສາມາດໄກ່ເກ່ຍສິ່ງກີດຂວາງທີ່ຍັງຄ້າງຄາໃນ 11 ຈຸດ, ແກ້ໄຂບັນຫາຫຍຸ້ງຍາກຂອງບັນດາບໍລິສັດຮັບເໝົາລູກຊ່ວງ ແລະ ບໍລິສັດແມ່, ສໍາເລັດການປຶກສາປາລື ແລະ ຍົກຍ້າຍສະຖານີວຽງຈັນໃຕ້ ແລະ ມອບພື້ນທີ່ໃຫ້ແກ່ການກໍ່ສ້າງສະຖານີຕ່າງໆ, ບັນລຸຄາດໝາຍການສະໜອງແຮງງານລາວເຂົ້າໃນໂຄງການ ແລະ ການນໍາໃຊ້ວັດສະດຸ, ພາຫະນະຂອງລາວເຂົ້າໃນໂຄງການ, ການຕິດຕາມ, ກວດກາການປະຕິບັດສັນຍາຂອງໂຄງການ ແລະ ວຽກງານອື່ນໆອີກ.

ຮຽບຮຽງຂ່າວ: ພຸດສະດີ