ໃນວັນທີ 9 ເມສາ ອົງການສະຫະປະຊາຊາດ (UN) ໄດ້ອອກມາເຕືອນວ່າ ການແຜ່ລະບາດຂອງໄວຣັສໂຄວິດ-19 ທີ່ເຮັດໃຫ້ເຄິ່ງໜຶ່ງຂອງປະຊາກອນໂລກຕ້ອງຢູ່ບ້ານ ຕາມມາດຕະການປິດເມືອງ-ປະເທດ (Lockdown) ຈະເຮັດໃຫ້ໂລກເກີດວິກິດຖົງຢາງອະນາໄມຂາດແຄນ ຫຼັງບັນດາໂຮງງານຜະລິດຖົງຢາງອະນາໄມຫຼາຍບ່ອນທົ່ວໂລກພາກັນປິດໂຮງງານ ໃນຊ່ວງມາດຕະການ Lockdown.
ທ່ານ Goh Miah Kiat ຜູ້ບໍລິຫານ “Karex” ຜູ້ຜະລິດຖົງຢາງອະນາໄມລາຍໃຫຍ່ຂອງມາເລເຊຍ ເຊິ່ງເປັນ 1 ໃນ 5 ໂຮງງານຜະລິດຖົງຢາງອະນາໄມລາຍໃຫຍ່ຂອງໂລກ ຜະລິດຖົງຢາງອະນາໄມອອກຈຳໜ່າຍ ແລະ ຜະລິດສົ່ງໃຫ້ກັບໂຄງການຄຸມກຳເນີດຂອງລັດຖະບານ ແລະ ອົງກອນບໍ່ຫວັງຜົນກຳໄລຕ່າງໆ ເປີດເຜີຍວ່າໄດ້ປິດໂຮງງານໄປ 3 ບ່ອນ ແລະ ຫຼຸດການຜະລິດຖົງຢາງອະນາໄມລົງ 200 ລ້ານອັນໃນຊ່ວງກາງເດືອນມີນາ ເຖິງ ກາງເດືອນເມສານີ້ ຕາມມາດຕະການ Lockdown ຂອງລັດຖະບານມາເລເຊຍ. ນອກຈາກນີ້ ວິກິດຖົງຢາດຂາດຕະຫຼາດ ຍັງເກີດຈາກບັນຫາຂົນສົ່ງທີ່ຢຸດຊະງັກທົ່ວໂລກ.
ມາເລເຊຍເປັນປະເທດຜູ້ຜະລິດຢາງທຳມະຊາດລາຍໃຫຍ່ທີ່ສຸດໃນໂລກ ແລະ ເປັນປະເທດຜູ້ຜະລິດຖົງຢາງອະນາໄມລາຍໃຫຍ່ ຂະນະນີ້ຢູ່ໃນມາດຕະການ Lockdown ເພື່ອປ້ອງກັນການແຜ່ລະບາດຂອງໂຄວິດ-19 ໂດຍມາດຕະການນີ້ຈະມີໄປເຖິງວັນທີ 14 ເມສາ.
ຮຽບຮຽງໂດຍ: ວະນິດາ