ສຳນັກຂ່າວ CNN ລາຍງານວ່າ ເສືອທີ່ຈັດສະແດງໃນສວນສັດ Bronx Zoo ໃນລັດ ນິວຍອກ ໄດ້ຖືກກວດຫາເຊື້ອພະຍາດໄວຣັສໂຄວິດ-19 ເຊິ່ງຜົນກວດອອກມາເປັນບວກ. ອີງຕາມລາຍງານຈາກກົມກະສິກຳຂອງອາເມລິກາ (USDA) ເສືອພັນມາລາຍັນ (Malayan) ເພດເມຍ ອາຍຸ 4 ປີທີ່ມີຊື່ວ່າ ນາເດຍ (Nadia) ໃນຖືກນຳເອົາຕົວຢ່າງໄປກວດຫາເຊື້ອພະຍາດ ຫຼັງຈາກມີອາການໄອແຫ້ງ, ພ້ອມກັນນີ້ຕົວຢ່າງຈາກເສືອ ແລະ ສິງຕົວອື່ນໆອີກ 5 ຕົວກໍ່ຖືກນຳໄປກວດ ຫຼັງຈາກທີ່ພົບວ່າມີອາການຄ້າຍຄືກັນ, ສັດຕົວອື່ນໆແມ່ນຍັງບໍ່ທັນສະແດງອາການ.
ທາງສວນສັດໄດ້ໃຫ້ຂໍ້ມູນວ່າ ບັນດາສັດທີ່ຕິດ ແລະ ເຂົ້າຄ່າຍ ແມ່ນມີອາການບໍ່ຢາກອາຫານ, ປົກກະຕິແລ້ວມັນຈະກະຕືລືລົ້ນກັບຜູ້ດູແລສັດ. ສວນສັດກໍ່ໄດ້ກ່າວເພີ່ມຕື່ມວ່າ ເຂົາເຈົ້າຍັງບໍ່ຮູ້ວ່າພະຍາດໄວຣັສດັ່ງກ່າວຈະມີຜົນກະທົບກັບບັນດາສັດທີ່ຕິດເຊື້ອແນວໃດ ເນື່ອງຈາກວ່າສັດຊະນິດຕ່າງໆມີປະຕິກີລິຍາຕໍ່ເຊື້ອພະຍາດແຕກຕ່າງກັນ, ຢ່າງໃດກໍ່ຕາມທາງສວນສັດຈະສັງເກດອາການ ແລະ ລໍຖ້າໃຫ້ມັນຫາຍເປັນປົກກະຕິ.
ສວນສັດໄດ້ປິດບໍລິການໃນວັນທີ 16 ມີນາທີ່ຜ່ານມາ. ກົມກະສິກຳກໍ່ໄດ້ໃຫ້ຄຳແນະນໍາວ່າ ຖ້າຜູ້ໃດຕິດເຊື້ອໄວຣັສ ແມ່ນໃຫ້ຫຼີກລ່ຽງການສຳຜັດກັບສັດ ລວມໄປເຖິງສັດລ້ຽງ ຈົນກວ່າຊິມີຂໍ້ມູນເພີ່ມຕື່ມກ່ຽວກັບພະຍາດໄວຣັສໂຄວິດ-19.
ກ່ອນໜ້ານີ້ ທີ່ເກາະຮົງກົງກໍ່ໄດ້ພົບວ່າມີແມວລ້ຽງທີ່ຕິດເຊື້ອພະຍາດໄວຣັສໂຄວິດ-19ຈາກເຈົ້າຂອງທີ່ມີເຊື້ອເຊັ່ນດຽວກັນ.
ຮຽບຮຽງໂດຍ: ວະນິດາ