ພວກເຮົາໄດ້ສະຫຼຸບຂ່າວທີ່ກ່ຽວຂ້ອງກັນການແຜ່ລະບາດຂອງພະຍາດໄວຣັສສາຍພັນໃໝ່ COVID-19 ໃນທ້າຍອາທິດທີ່ຜ່ານມາ ທັ້ງພາຍໃນແລະຕ່າງປະເທດໃຫ້ທ່ານໄດ້ອ່ານກັນໃນມື້ນີ້.
ຂ່າວພາຍໃນປະເທດ
- ນາຍົກລັດຖະມົນຕີທ່ານ ທອງລຸນ ສີສຸລິດ ແລະ ຄະນະໄດ້ລົງພື້ນທີ່ ຕິດຕາມການເຝົ້າລະວັງ ແລະ ປ້ອງກັນພະຍາດ COVID-19 ຢູ່ຂົວມິດຕະພາບລາວ-ໄທ 1, ທາງດ່ານໄດ້ໃຊ້ມາດຕະການຢ່າງເຄັ່ງຄັດ ໃນການກວດກາຄົນເຂົ້າ-ອອກເມືອງ
- ແຂວງ ອັດຕະປື ແລະ ແຂວງຫົວພັນ ສັ່ງປິດດ່ານເຂົ້າ-ອອກເມືອງຫຼາຍດ່ານ.
- ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງ COVID-19 ໄດ້ອອກໜັງສືສະເໜີໃຫ້ກະຊວງສຶກສາທິການ ແລະ ກິລາ ປິດໂຮງຮຽນລ້ຽງເດັກ ແລະ ອານຸບານຊົ່ວຄາວເພື່ອຍົກລະດັບມາດຕະການເຝົ້າລະວັງພະຍາດ COVID-19
- ໃນຂະນະນີ້ປະເທດລາວມີກໍລະນີຜູ້ຕິດເຊື້ອພະຍາດ COVID-19 78 ກໍລະນີ, ກວດບໍ່ພົບ 70 ກໍລະນີ, ລໍຖ້າຜົນກວດ 8 ກໍລະນີ ແລະ ບໍ່ມີກໍລະນີເສຍຊີວິດ.
ຂ່າວຕ່າງປະເທດ
- ປະເທດອິຕາລີທີ່ກຳລັງຢູ່ໃນວິກິດການແຜ່ລະບາດຂອງພະຍາດ ພົບຜູ້ປ່ວຍພະຍາດໄວຣັສ COVID-19 ລາຍໃໝ່ເປັນຈຳນວນ 3590 ຄົນ, ເສຍຊີວິດ 368 ຄົນພາຍໃນມື້ດຽວ ເຮັດໃຫ້ຍອດຜູ້ປ່ວຍໃນເວລານີ້ຮອດຈຳນວນ 20,000 ກວ່າຄົນ ກາຍເປັນຈຳນວນທີ່ສູງທີສຸດໃນໂລກ ແຊງໜ້າປະເທດຈີນ
- ເຢຍລະມັນກຽມປິດຊາຍແດນຝຣັ່ງ, ໂອຕຣິດ (Austria), ສະວິດເຊີແລນ ເພື່ອເປັນການແກ້ໄຂບັນຫາການແຜ່ລະບາດພະຍາດ COVID-19
- ທະນາຄານກາງຂອງສະຫະລັດອາເມລິກາມີມະຕິຫຼຸດດອກເບ້ຍນະໂຍບາຍ ຈາກ 1-1.25% ເຫຼືອ 0-0.25% ເພື່ອບັນເທົາຜົນກະທົບທາງເສດຖະກິດຈາກການແຜ່ລະບາດຂອງພະຍາດໄວຣັສ COVID-19
- ຜູ້ວ່າການຈັງຫວັດບູຣີຣັມ ປະເທດໄທ ສັ່ງປິດເມືອງເພື່ອຄວບຄຸບການແຜ່ລະບາດຂອງພະຍາດໄວຣັສ COVID-19
ຮຽບຮຽງຂ່າວ: ວະນິດາ