ຂ່າວຕ່າງປະເທດລາຍງານໃນວັນທີ 27 ມິຖຸນາ 2019 ວ່າ ຕຳຫຼວດແອັດສະປາຍໄດ້ກັກຕົວນາຍທະຫານຄົນໜຶ່ງຂອງກອງທັບອາກາດບຣາຊິນ ຊຶ່ງລັກລອບຂົນຢາເສບຕິດປະເພດໂຄເຄນຈຳນວນ 3 ຖົງມານຳເຮືອບິນຂອງກອງທັບຊຶ່ງເດີນທາງມາແວະພັກເຄື່ອງທີ່ເມືອງເຊວິລຂອງແອັດສະປາຍ ກ່ອນໜ້າທີ່ເຮືອບິນປະຈຳຕຳແໜ່ງຂອງຜູ້ນຳບຣາຊິນຈະເດີນທາງມາເຖິງ.
ໂດຍເຈົ້າໜ້າທີ່ຕຳຫຼວດແອັດສະປາຍໄດ້ເປີດເຜີຍວ່າ ຢາເສບຕິດດັ່ງກ່າວມີນ້ຳໜັກລວມ 39 ກີໂລກຣາມຊຶ່ງຖືກເຊື່ອງຢູ່ໃນກະເປົ໋າເດີນທາງ 3 ໜ່ວຍເທິງເຮືອບິນຂອງກອງທັບອາກາດບຣາຊິນ ພາຍຫຼັງທີ່ມີລາຍງານດັ່ງກ່າວທສາງດ້ານຜູ້ນຳບຣາຊິນກໍໄດ້ອອກຖະແຫຼງ ການວ່າ ການກະທຳຂອງນາຍທະຫານຄົນດັ່ງກ່າວບໍ່ມີສ່ວນກ່ຽວຂ້ອງກັບຂະນະເດີນທາງຂອງຕົນເອງ ເຖິງແມ່ນວ່າຈະເດີນທາງມາພ້ອມກັບຄະນະເດີນທາງຂອງຕົນກໍຕາມ ພ້ອມນີ້ ທ່ານກໍລະບຸອີກວ່າການກະທຳນີ້ຖືເປັນການກະທຳທີ່ໜ້າອາຍ ແລະ ໄດ້ສັ່ງໃຫ້ກະຊວງປ້ອງກັນປະເທດເລັ່ງດຳເນີນການສືບສວນເລື່ອງດັ່ງກ່າວ ແລະ ຈະໃຫ້ຄວາມຮ່ວມມືກັບເຈົ້າໜ້າທີ່ຂອງແອັດສະ ປາຍເຕັມທີ່ເພື່ອລົງໂທດນາຍທະຫານຄົນນີ້ຕາມກົດໝາຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday