ສົງຄາມການຄ້າທີ່ຍືດເຍື້ອ ແລະ ເຄັ່ງຕຶງລະຫວ່າງ ຮົວເຫວີຍ ແລະ ອາເມຣິກາ ຍິ່ງນັບມື້ຍິ່ງບໍ່ສົ່ງຜົນດີໃຫ້ທັງສອງຝ່າຍ ຫຼ້າສຸດ ແອນດຣິວ ວິລລຽມສັນ (Andrew Williamson) ຮອງປະທານາທິບໍດີຝ່າຍກົນລະຍຸດຂອງຮົວເຫວີຍໄດ້ອອກມາລະບຸວ່າ ພາກສົ່ງອອກຂອງອາເມຣິກາບໍ່ສະເພາະແຕ່ອຸດສາຫະກຳໄອທີເທົ່ານັ້ນ ແຕ່ສ່ວນອື່ນໆກໍຈະໄດ້ຜົນກະທົບກ່ຽວກັບລາຍຮັບຊຶ່ງລວມແລ້ວປະມານ 5,6 ໝື່ນລ້ານໂດລາ ນອກຈາກນີ້ ຍັງກະທົບກັບພະນັກງານໃນພາກອຸດສາຫະກຳອີກປະມານ 74.000 ຄົນ.
ວິລລຽມສັນ ລະກ່າວຕື່ມອີກວ່າ ຮົວເຫວີຍເປັນລູກຄ້າລາຍໃຫຍ່ຂອງບໍລິສັດເຕັກໂນໂລຊີໃນອາເມຣິກາ ເນື່ອງຈາກໃນແຕ່ລະປີຮົວເຫວີຍມີງົບປະມານລົງທຶນໃນອາເມຣິກາສູງເຖິງ 1,1 ໝື່ນລ້ານໂດລາ ຊຶ່ງໃນໄລຍະຍາວອາດສົ່ງຜົນເສຍຕໍ່ອາເມຣິກາຖ້າຫາກສະຖານະການຄວາມຂັດແຍ່ງທາງການຄ້າລະຫວ່າງສອງປະເທດຍັງບໍ່ຍຸຕິ ທັງນີ້ ຮົວເຫວີຍກໍພ້ອມທີ່ຈະລົງທຶນໃນການວິໄຈ ແລະ ພັດທະນາກັບປະເທດທີ່ຕ້ອນຮັບເຂົາເຈົ້າໂດຍບໍ່ຕ້ອງລັງເລ.
ຊຶ່ງສຸດທ້າຍແລ້ວຜູ້ບໍລິໂພກກໍຄືຜູ້ທີ່ໄດ້ຮັບຜົນກະທົບຫຼາຍທີ່ສຸດ ເນື່ອງຈາກມາດຕະການຄວ້ຳບາດ ແລະ ຂຶ້ນພາສີນຳເຂົ້າສິນຄ້າຈະເຮັດໃຫ້ສິນຄ້າລາຄາແພງຂຶ້ນ ນອກຈາກນີ້ ຫາກປະເທດໃດທີ່ເດີນຕາມມາດຕະການຄວ້ຳບາດຮົວເຫວີຍກໍຈະເຂົ້າເຖິງເຕັກໂນໂລຊີ 5G ໄດ້ຊ້າກວ່າກຳນົດ 18-24 ເດືອນເປັນຢ່າງໜ້ອຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: sanook