ປະເທດອັງກິດອອກກົດໝາຍສັ່ງຫ້າມການໂຄສະນາທີ່ມີເນື້ອຫາເໝົາລວມທາງເພດທີ່ເປັນອັນຕະລາຍຕໍ່ສັງຄົມ ຊຶ່ງມີຜົນບັງຄັບໃຊ້ນັບແຕ່ວັນທີ 14 ມິຖຸນາຜ່ານມາ ນັບເປັນກົດໝາຍທີ່ສົ່ງຜົນກະທົບຢ່າງກວ້າງຂວາງຕໍ່ກັບອຸດສາຫະກຳໂຄສະນາພາຍໃນປະເທດ.
ໜ່ວຍງານມາດຕະຖານການໂຄສະນາ (ASA) ຜູ້ກວດສອບເນື້ອຫາການໂຄສະນາຂອງປະເທດອັງກິດຈະຫ້າມການໂຄສະນາທີ່ມີເນື້ອຫາເໝົາລວມທາງເພດເຊັ່ນ ແມ່ຍິງຈອດລົດບໍ່ໄດ້ ຫຼື ຜູ້ຊາຍປ່ຽນຜ້າອ້ອມບໍ່ເປັນ ລວມເຖິງເດັກແມ່ຍິງຮຽນບໍ່ເກົ່າເທົ່າກັບເດັກຊາຍ ໂດຍກົດໝາຍດັ່ງກ່າວແມ່ນບໍ່ໄດ້ລວມເຖິງສະຖານະການເໝົາລວມບາງຢ່າງເຊັ່ນ ຖືກກຳນົດໄວ້ແລ້ວວ່າບໍ່ໄດ້ເປັນອັນ ຕະລາຍຄື ແມ່ຍິງເຮັດຄວາມສະອາດ ຫຼື ຜູ້ຊາຍເຮັດວຽກງານດີໄອວາຍ (DIY) ເຫຼົ່ານີ້ເປັນຕົ້ນ.
ທັງນີ້ ກົດໝາຍດັ່ງກ່າວມີເຫດຜົນເພື່ອຫຼຸດຄວາມບໍ່ເທົ່າທຽມໃນສັງຄົມທີ່ເກີດຈາກເນື້ອຫາເໝົາລວມທີ່ປາກົດຜ່ານສື່ໂຄສະນາ ແລະ ນັບເປັນການເລີ່ມຕົ້ນທີ່ດີເພື່ອຜົນປະໂຫຍດຂອງເພດຍິງ ແລະ ເພດຊາຍໃນສັງຄົມອັງກິດ ໂດຍໂຄສະນາທີ່ ASA ເຫັນວ່າເປັນບັນຫາກໍຄື ໂຄສະນາທາງໂທລະພາບເມື່ອປີ 2017 ຊຶ່ງເປັນໂຄສະນານົມເດັກຍີ່ຫໍ້ດັງທີ່ສະແດງໃຫ້ເຫັນເດັກແມ່ຍິງເຕີບໃຫຍ່ຂຶ້ນເປັນນັກເຕັ້ນບັນເລ ຂະນະທີ່ເດັກຊາຍໃຫຍ່ຂຶ້ນເປັນວິສະວະກອນ ແລະ ນັກປີນພູ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: matichon.co.th/AFP