ບໍ່ເຄີຍຝັນຢາກເປັນນາງງາມລະດັບໂລກ ແຕ່ຢາກໄດ້ຕຳແໜ່ງແມ່ຍິງທີ່ມີຜົມຍາວທີ່ສຸດໃນໂລກ ຊຶ່ງຍັງບໍ່ຮູ້ວ່າຈະໄດ້ດັ່ງທີ່ຫວັງ ຫຼື ບໍ່? ແຕ່ຄົນເຮົາກໍຕ້ອງຢູ່ຢ່າງມີຄວາມຫວັງເພື່ອເປັນພະລັງ ແລະ ແຮງຂັບເຄື່ອນໃນການດຳເນີນຊີວິິດ.
ເຊັ່ນດຽວກັບຍິງສາວຊາວເປຣູ ນັ້ນກໍຄື ໂນເອມິ ອາລິຊາເບທ ໂຣເມໂຣ ຮົວແມນ ໄວ 24 ປີ ກຳລັງໃຊ້ຊີວິດຢ່າງມີຄວາມຫວັງວ່າຄັ້ງໜຶ່ງໃນຊີວິດຕົນເອງຈະຖືກບັນທຶກຊື່ລົງໃນກິນເນສບຸ໊ກໃນຖານະ “ແມ່ຍິງທີ່ມີຜົມຍາວທີ່ສຸດໃນໂລກ” ຂະນະທີ່ປັດຈຸບັນ ໂນເອມິ ມີເສັ້ນຜົມທີ່ຍາວປະມານ 176 ຊັງຕີແມັດ.
ໂນເອມິ ຫຼື ຣາພັນເຊລແຫ່ງເປຣູ ໄດ້ກ່າວວ່າ ຕົນເອງຈົ່ງຜົມຍາວມາຕັ້ງແຕ່ຈື່ຄວາມໄດ້ ແລະ ແມ່ຍິງທຸກຄົນໃນຕະກູນຂອງນາງນິຍົມຈົ່ງຜົມຍາວທຸກຄົນ ປັດຈຸບັນ ນາງກໍຫວັງວ່າ ນາງຈະສາມາດຊິງຕຳແໜ່ງ ຫຼື ໂຄ່ນລົ້ມແມ່ຍິງທີ່ມີຜົມຍາວທີ່ສຸດໃນໂລກຄົນປັດຈຸບັນ ນັ້ນກໍຄືຍິງສາວຊາວອັກຊັງຕິນທີ່ຄອງສະຖິຕິຢູ່ໃນຂະນະນີ້.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: Ruptly and www.rt.com