ສາຍການບິນແອຣນິວຊີແລນໄດ້ປະກາດຍົກເລີກກົດຄຳສັ່ງທີ່ເຄີຍຫ້າມພະນັກງານມີຮອຍສັກ (ສັກລາຍ) ພາຍຫຼັງທີ່ຖືກວິພາກວິຈານວ່າເປັນນະໂຍບາຍທີ່ເລືອກປະຕິບັດຕໍ່ຊາວເມົາຣີ.
ຄຣິສໂຕເຟີຣ ລັກຊອນ ປະທານເຈົ້າໜ້າທີ່ບໍລິຫານສາຍການບິນແອຣນິວຊີແລນໄດ້ຖະແຫຼງເມື່ອວັນທີ 10 ມິຖຸນາຜ່ານມາວ່າ ນັບຕັ້ງແຕ່ວັນທີ 1 ກັນຍາ 2019 ສາຍການບິນຈະຍົກເລີກກົດຫ້າມພະນັກງານມີຮອຍສັກ ແຕ່ຕ້ອງເປັນຮອຍສັກທີ່ບໍ່ກໍ່ໃຫ້ເກີດ ຄວາມຂັດແຍ່ງ ທັງນີ້ ການປ່ຽນກົດເລື່ອງນີ້ມາຈາກການເຮັດວິໄຈໃນຊ່ວງ 5 ເດືອນທີ່ຜ່ານມາກັບລູກຄ້າ ແລະ ພະນັກງານຂອງສາຍການບິນ ແລະ ຊາວນິວຊີແລນທັງທີ່ຢູ່ພາຍໃນ ແລະ ອາໄສຢູ່ຕ່າງປະເທດ.
ປັດຈຸບນມີການຍອມຮັບເລື່ອງຂອງຮອຍສັກເພີ່ມຂຶ້ນ ໂດຍສະເພາະກັບຮອຍສັກທີ່ເປັນການສະແດງອອກທາງວັດທະນະທຳ ທັງນີ້ ແອຣນິວຊີແລນໄດ້ເປີດເຜີຍຕື່ມວ່າ ຈາກການວິໄຈພົບວ່າ 1 ໃນ 5 ຂອງຜູ້ໃຫຍ່ຊາວນິວຊີແລນມີຮອຍສັກຢ່າງໜ້ອຍ 1 ແຫ່ງໃນຮ່າງກາຍ ແລະ ຫຼາຍກວ່າ 35% ທີ່ອາຍຸຕ່ຳກວ່າ 35 ປີແມ່ນຈະມີຮອຍສັກ.
ຂະນະທີ່ຊາວເມົາຣີທີ່ມີຮອຍສັກເທິງໃບໜ້າ ແລະ ແຂນ ແມ່ນສະແດງໃຫ້ເຫັນເຖິງລຳດັບວົງຕະກູນ ຊຶ່ງຖືເປັນຄວາມສັກສິດທາງວັດທະນະທຳ ຊຶ່ງຜູ້ຊາຍຈະສັກທົ່ວໜ້າ ຂະນະທີ່ແມ່ຍິງຈະສັກຢູ່ບໍລິເວນຄາງ ແຕ່ວ່າກົດເຄື່ອງແຕ່ງກາຍຂອງສາຍການບິນແຫ່ງນີ້ແມ່ນຫ້າມໃຫ້ພະນັກງານມີຮອຍສັກບໍລິເວນຮ່າງກາຍທີ່ສາມາດເບິ່ງເຫັນໄດ້ ໂດຍສະເພາະພະນັກງານຕ້ອນຮັບເທິງເຮືອບິນ ຊຶ່ງຖືກວິພາກວິຈານວ່າເປັນການເລືອກປະຕິບັດກັບເມົາຣີ ທັງທີ່ສາຍການບິນດັ່ງກ່າວນຳພາສີເມົາຣີມາໃຊ້ທຳການຕະຫຼາດ ແລະ ນຳຮູບຄ້າຍໃບເຟີຣນ ຫຼື ໂຄຣູ ຊຶ່ງເປັນສັນຍະລັກຂອງຊາວເມົາຣີມາໃຊ້ເປັນໂລໂກຂອງສາຍການບິນ ແລະ ຫາງຂອງເຮືອບິນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thaipost/AFP