ຊາຍຊາວອາເມຣິກາໄດ້ປອມຕົວເປັນເຈົ້າຊາຍເຊື້ອພຣະວົງຊາອຸດິດອາຣະບີ ດ້ວຍຈຸດປະສົງຫຼອກລວງ ຕົວະຍົວະຊາວບ້ານດົນກວ່າ 30 ປີ ຊຶ່ງສາມາດສ້າງລາຍໄດ້ເຂົ້າກະເປົ໋າຢ່າງໜ້ອຍ 8 ລ້ານໂດລາ ແຕ່ກໍໜີບໍ່ມົ້ມໂລກແຫ່ງຄວາມເປັນຈິງເມື່ອຄວາມຈິງປາກົດຈຶ່ງຖືກສານຕັດສິນໃຫ້ຕິດຄຸກເປັນເວລາ 18 ປີໂທດຖານສໍ້ໂກງ.
ລາຍງານຂ່າວຕ່າງປະເທດໄດ້ລາຍງານເມື່ອບໍ່ດົນມານີ້ວ່າ ທ້າວ ແອນໂທນີ ເອັນຣິເກ ຈີແນັກ ອາຍຸ 48 ປີ ໄດ້ສ້າງສະຖານະການສຸດຫຼູລວງໂລກ ໂດຍໄດ້ປອມຕົວເປັນເຈົ້າຊາຍ ຄາຫຼິດ ບິນ ອັລ-ຊາອຸດ ແຫ່ງຣາຊະວົງຊາອຸດິດອາຣະບີ ຊຶ່ງທ້າວໄດ້ລົງທຶນເຊົ່າຄອນໂດສຸດຫຼູເທິງເກາະຟິຊເຊີຣ ໃນນະຄອນໄມອາມີ ລວມທັງຂັບລົດເຟີຣາຣີຕິດປ້າຍທະບຽນການທູດ (ປອມ) ພ້ອມດ້ວຍທີມບໍດີກາດຖືເອກະສານການທູດ (ປອມ).
ພຶດຕິກຳຂອງ ຈີແນັກ ແມ່ນຈະຫຼອກລວງນັກທຸລະກິດທີ່ຕ້ອງການລົງທຶນ ຫຼື ໄດ້ສຳປະທານໃນໂຄງການຂອງລັດຖະບານຊາອຸດິດອາຣະບີໃຫ້ໂອນເງິນເຂົ້າບັນຊີເງິນຝາກ ດ້ວຍຄຳເວົ້າຂີ້ໂມ້ໂອ້ອວດຊວນໃຫ້ຫຼົງເຊື່ອວ່າມີເຄືອຂ່າຍທຸລະກິດທົ່ວໂລກ ແລະ ມີເງິນ ຝາກໃນບັນຊີທະນາຄານປະມານ 600 ລ້ານໂດລາ ພ້ອມນີ້ ປະຕູຫ້ອງພັກກໍຕິດປ້າຍຄຳວ່າ “ສຸລະຕານ” ເພື່ອເພີ່ມຄວາມໜ້າເຊື່ອຖື.
ຂະນະທີ່ເຈົ້າຊາຍກຳມະລໍຖືກເຈົ້າໜ້າທີ່ຕຳຫຼວດກັກຕົວເມື່ອເດືອນພະຈິກ 2017 ທີ່ສະໜາມບິນແຫ່ງໜຶ່ງໃນນະຄອນນິວຢອກ ຫຼັງຈາກຫຼອກລວງກຸ່ມນັກລົງທຶນກະເປົ໋າໜັກເຖິງ 26 ຄົນ ລວມເປັນເງິນຫຼາຍລ້ານໂດລາ ດັ່ງນັ້ນ ຜູ້ພິພາກສາຂອງເມືອງໄມອາມີ ຈິ່ງມີຄຳພິພາກສາໃຫ້ລົງໂທດ ທ້າວ ຈີແນັກ ໃຫ້ຕິດຄຸກເປັນເວລາ 18 ປີ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: Miami Herald/ Miami Police