ດຳເນີນມາເປັນປີທີ 6 ແລ້ວສຳລັບໂຄງການ ລາວ ແຟເຊິນ ວີກ (Lao fashion week) ແມ່ນສັບປະດາແຫ່ງການສະແດງອາພອນລະດັບສາກົນທີ່ມີຄວາມສຳຄັນ ແລະ ຍິ່ງໃຫຍ່ທີ່ສຸດຂອງລາວ ຖືເປັນຄວາມພາກພູມໃຈທີ່ໄດ້ນຳເອົາຊື່ສຽງຂອງປະເທດລາວໄປຢູ່ໃນແຜນທີ່ແຟເຊິນລະດັບໂລກຢ່າງເຕັມຕົວ ແລະ ໄດ້ກາຍເປັນສ່ວນໜຶ່ງຂອງຄອບຄົວແຟເຊິນວີກຂອງໂລກ ຊຶ່ງພວກເຮົາມຸ່ງໝັ້ນທີ່ຈະສືບຕໍ່ເສີມຂະຫຍາຍສາຍພົວພັນການຮ່ວມມືອັນຍືນຍາວກັບບັນດາຄູ່ຮ່ວມການພັດທະນາທັງພາຍໃນ ແລະ ຕ່າງປະເທດ ເພື່ອການພັດທະນາທີ່ຍືນຍົງໃຫ້ແກ່ວົງການແຜ່ນແພ ແລະ ແຟເຊິນໃນ ສປປ ລາວ ສຳລັບງານໃນປີນີ້ແມ່ນຈະຈັດຂຶ້ນລະຫວ່າງວັນທີ 2-6 ກັນຍາ 2019 ທີ່ໂຮງແຮມແລນມາກ ແມ່ຂອງຣີເວີໄຊ ນະຄອນຫຼວງວຽງຈັນ ຊຶ່ງຈະມີຫຼາຍກວ່າ 50 ດີຊາຍເນີ້ເຂົ້າຮ່ວມ ໃນນັ້ນ ມີຫຼາຍກວ່າ 30 ດີຊາຍເນີ້ຊື່ດັງຈາກຕ່າງປະເທດທີ່ຈະມາຮ່ວມສະແດງຜົນງານ.
ສຳລັບໂຄງການສົ່ງເສີມນັກອອກແບບໜຸ່ມນ້ອຍຂອງລາວປະຈຳປີ 2019 ຊຶ່ງເປັນໂຄງການພັດທະນາຊັບພະຍາກອນບຸກຄົນຂອງ ລາວ ແຟເຊິນ ວີກ ແມ່ນໄດ້ສົ່ງບັນດາໄວໜຸ່ມລາວທີ່ມີພອນສະຫວັນ ແລະ ຮັກໃນການອອກແບບຈຳນວນ 5 ຄົນໄປຮ່ຳຮຽນ ແລະ ຝຶກຝົນໃນບັນດາສະຖາບັນແຟເຊິນທີ່ມີຊື່ສຽງລະດັບໂລກ ບໍ່ວ່າຈະເປັນສະຖາບັນເອັດສໂມດ ທີ່ມະຫານະຄອນປາຣີ ປະເທດຝຣັ່ງ ສະຖາບັນ ນານຢາງ ທີ່ສິງກະໂປ ສະຖາບັນລອນດອນຄອນເລດອອຟດີຊາຍ ແອນ ແຟເຊິນ ທີ່ຮ່າໂນຍ ສະຖາບັນແຟເຊິນຟິລິປີນທີ່ມະນີລາ ລວມເຖິງບັນດາຫ້ອງເສື້ອຊື່ດັງໃນບາງກອກ ປະເທດໄທ.
ຊຶ່ງໃນປີນີ້ ກໍໄດ້ຄັດເລືອກບັນດານ້ອງໆໄດ້ 5 ຄົນສຸດທ້າຍຊຶ່ງປະກອບມີ ທ. ອານຸສິດ ແພງຄຳພັດ ທ. ກອນວິໄຊ ສຸວັດດີ ທ. ມັງ ກອນ ໄຊຍະວົງ ນ. ມະນີທິບ ວົງພະຈັນ ທ. ສຸນັນທາ ພັນທະປັນຍາ ຊຶ່ງທັງ 5 ນ້ອງຈະໄດ້ຮັບທຶນຄົນລະ 3 ລ້ານກີບເພື່ອນຳໃຊ້ໃນການຜະລິດເສື້ອຜ້າຕົວຈິງ ແລະ ຈະຖືກນຳມາສະແດງໃນງານ ລາວ ແຟເຊິນ ວີກ 2019.
ພ້ອມນີ້ ລາວ ແຟເຊິນ ວີກ ກໍຈະເປີດຕົວໂຄງການ “ແຜ່ນແພລາວກ້າວສູ່ວົງການແຟເຊິນ” ຊຶ່ງຈະໄດ້ຈັດຂຶ້ນທຸກປີ ເພື່ອໃຫ້ນັກອອກແບບລຸ້ນໃໝ່ໄດ້ປ່ຽນຜ້າແພແບບດັ່ງເດີມໃຫ້ກາຍເປັນເສື້ອຜ້າແຟເຊິນທີ່ມີຄວາມທັນສະໄໝ ແລະ ນຳໄປສະແດງຜົນງານເທິງເວທີຕ່າງປະເທດ ເພື່ອສ້າງໂອກາດໃຫ້ທຸລະກິດຜ້າແພຂອງລາວສາມາດເປັນສ່ວນໜຶ່ງຂອງອຸດສາຫະກຳແຟເຊິນລະດັບສາກົນ ແລະ ລະດັບໂລກ.
ໂດຍ: ສະຫະລັດ ວອນທິວົງໄຊ