ນັກວິທະຍາສາດໄດ້ປະກາດແຈ້ງເຕືອນວ່າ ຍອດພູເອເວີເຣສຊຶ່ງເປັນຍອດພູທີ່ສູງທີ່ສຸດໃນໂລກ ລວມເຖິງຍອດພູສູງທີ່ຕັ້ງຢູ່ອ້ອມ ຮອບກຳລັງຜະເຊີນໄພຄຸກຄາມຈາກພາວະມົນລະພິດ ແລະ ສະພາບອາກາດທີ່ອຸ່ນຂຶ້ນ ຊຶ່ງສົ່ງຜົນໃຫ້ຫີມະ ແລະ ສາຍທານນ້ຳກ້ອນທີ່ປົກຄຸມອ້ອມຮອບລະລາຍໄວກວ່າເວລາອັນຄວນ ແລະ ຖືເປັນສັນຍານເຕືອນອັນຕະລາຍທີ່ເພີ່ມຂຶ້ນຕໍ່ບັນດານັກປືນພູໃນອະນາ ຄົດ.
ທັງນີ້ ທີມນັກວິໄຈຈາກມະຫາວິທະຍາໄລເວສເທິນວໍຊີງຕັນຂອງອາເມຣິກາໄດ້ກ່າວວ່າ ພາຍຫຼັງທີ່ທີມງານ ແລະ ນັກວິທະຍາສາດໄດ້ຂຶ້ນໄປສຳຫຼວດພື້ນທີ່ເທິງຍອດພູເອເວີເຣສເປັນເວລາຫຼາຍອາທິດ ຈຶ່ງພົບວ່າມົນລະພິດຈຳນວນຫຼາຍຝັງເລິກຢູ່ໃນຫີມະ ຊຶ່ງຫຼັງຈາກທີ່ໄດ້ເກັບຕົວຢ່າງຫີມະແລ້ວນຳມາຜ່ານຂະບວນການວິໄຈກໍພົບວ່າ ຫີມະມີສີດຳທີ່ຜິດປົກກະຕິ ແລະ ພົບວ່າຫີມະເກັບກັກມົນລະພິດໄວ້ຈວນຫຼາຍ.
ນອກຈາກນີ້ ສະພາບອຸນຫະພູມທີ່ສູງຂຶ້ນກໍກຳລັງເຮັດໃຫ້ສາຍທານນ້ຳກ້ອນ ແລະ ຫີມະທີ່ປົກຄຸມພື້ນທີ່ອ້ອມຮອບຍອດພູເອເວີເຣສລະລາຍຢ່າງໄວວາ ຊຶ່ງຖືເປັນສັນຍານທີ່ບໍ່ຄ່ອຍດີ ເນື່ອງຈາກພາວະໂລກຮ້ອນກຳລັງສົ່ງຜົນໃຫ້ນັກປືນພູຕົກຢູ່ໃນຄວາມສ່ຽງ ແລະ ອັນຕະລາຍເພີ່ມຂຶ້ນ.
ຂະນະທີ່ທີມນັກວິໄຈກຸ່ມນີ້ມີແຜນທີ່ຈະປືນຂຶ້ນໄປໃຫ້ເຖິງຍອດພູເອເວີເຣສ ແລະ ຍອດພູໂລຕເຊ ຊຶ່ງຕັ້ງຢູ່ຕິດກັນເພື່ອຈະເກັບຕົວຢ່າງຫີມະເທິງຍອດພູ ລວມເຖິງພືດພັນໄມ້ຢູ່ບໍລິເວນດັ່ງກ່າວເພື່ອມາສຶກສາ ແລະ ເຜີຍແຜ່ລາຍງານທີ່ຄົ້ນພົບຕໍ່ໄປ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: matichon