ເປັນເລື່ອງລາວຂອງແມ່ຍິງຊາວຈີນທີ່ຍອມເສຍເງິນເຖິງ 200.000 ຢວນສຳລັບຊື້ບ່ອນຈອດລົດທີ່ສະດວກສະບາຍໂດຍທີ່ບໍ່ເຄີຍໄປເບິ່ງສະຖານທີ່ຕົວຈິງເລີຍ ແລະ ເມື່ອນາງໄດ້ຍ້າຍເຂົ້າໄປຢູ່ທີ່ພັກໃໝ່ (ຄອນໂດ) ຊຶ່ງຕັ້ງຢູ່ໜານໜິງ ຊຶ່ງເປັນເມືອງເອກຂອງພູມີພາກເຂດປົກຄອງຕົນເອງກວ່າງສີຈ້ວງ ທາງຕອນໃຕ້ຂອງ ສປ ຈີນ ກໍພົບວ່າເນື້ອທີ່ຊຶ່ງນາງໄດ້ຊື້ໄວ້ສຳລັບຈອດລົດນັ້ນຄັບ ແຄບເກີນໄປພຽງພໍແຕ່ຈອດລົດໄດ້ເທົ່ານັ້ນ ແລະ ທີ່ໂຫດຮ້າຍໄປກວ່ານັ້ນກໍຄື ນາງສາມາດຈອດລົດແຕ່ບໍ່ສາມາດເປີດປະຕູລົດໄດ້ ຂະນະທີ່ທາງອອກທາງດຽວທີ່ນາງຈະອອກຈາກລົດໄດ້ກໍຄື ນາງຕ້ອງອອກທາງຫຼັງຄາລົດ (ຫຼັງຄາແບບຊັນຣູຟ) ແທນທີ່ຈະອອກທາງປະຕູລົດ.
ທັງນີ້ ນາງຈິ່ງຮຽກຮ້ອງໃຫ້ເຈົ້າຂອງສະຖານທີ່ດັ່ງກ່າວ (ເຈົ້າຂອງຄອນໂດ) ຄືນເງິນຈຳນວນດັ່ງກ່າວໃຫ້ນາງ ແຕ່ກໍຖືກປະຕິເສດ ໂດຍທາງເຈົ້າຂອງໄດ້ອ້າງວ່າໄດ້ດຳເນີນເລື່ອງກັບກົມພາສີ-ອາກອນຮຽບຮ້ອຍແລ້ວ ພ້ອມກັບແນະນຳໃຫ້ນາງຂາຍເນື້ອທີ່ດັ່ງກ່າວໃຫ້ຄົນອື່ນ.
ຫຼ້າສຸດ ນາງກໍໄດ້ເຮັດເລື່ອງຂຶ້ນຟ້ອງສານ ເນື່ອງຈາກລະບຽບກົດໝາຍທີ່ກ່ຽວຂ້ອງໄດ້ລະບຸວ່າ ພື້ນທີ່ຈອດລົດຄວນມີພື້ນທີ່ຫວ່າງອ້ອມຮອບຢ່າງໜ້ອຍ 60 ຊັງຕີແມັດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: Youtube