ສຳນັກຂ່າວຕ່າງປະເທດລາຍງານໃນວັນທີ 5 ມິຖຸນາວ່າ ໂຮງຮຽນແຫ່ງໜຶ່ງໃນລັດອັສສຳຂອງອິນເດຍເກີດແນວຄວາມຄິດທີ່ຈະຊ່ວຍແກ້ບັນຫາໂລກຮ້ອນ ໂດຍໄດ້ສ້າງໂຄງການທີ່ມີຊື່ວ່າ “ເກັບຂີ້ເຫຍື້ອພລາສຕິກແລກກັບຄ່າຮຽນ”.
ທ່ານ ປາຣມິຕາ ຊາຣມາ ແລະ ທ່ານ ມາຊິນ ມຸກຕາຣ ສອງຜູ້ກໍ່ຕັ້ງ ແລະ ບໍລິຫານໂຮງຮຽນປະຖົມສຶກສາອັຄສຮາຣ ທາງຕາເວັນອອກສຽງເໜືອຂອງອິນເດຍໄດ້ເລີ່ມໂຄງການເກັບຂີ້ເຫຍື້ອພລາສຕິກແລກຄ່າຮຽນຫຼັງຈາກເກີດບັນຫາໂຮງຮຽນຖືກຄຸກຄາມຈາກຂີ້ເຫຍື້ອພລາສຕິກໃນພື້ນທີ່ເນື່ອງຈາກຊາວບ້ານຖິ້ມຂີ້ເຫຍື້ອຊະຊາຍ ລວມເຖິງໃຊ້ວິທີເຜົາຂີ້ເຫຍື້ອເພື່ອສ້າງຄວາມອົບອຸ່ນແກ່ຮ່າງ ກາຍໃນລະດູໜາວ.
ກໍລະນີດັ່ງກ່າວໄດ້ກໍ່ໃຫ້ເກີດຄວັນພິດຊຶ່ງເປັນອັນຕະລາຍຕໍ່ສຸຂະພາບຂອງນັກຮຽນລວມເຖິງປະຊາຊົນເອງ ດັ່ງນັ້ນ ຜູ້ບໍລິຫານທັງ ສອງຈຶ່ງຄິດຫາວິທີທາງໃນການປຸກລະດົມໃຫ້ປະຊາຊົນໃນພື້ນທີ່ມີສ່ວນຮ່ວມຮັກສາສະພາບແວດລ້ອມ ແລະ ກຳຈັດຂີ້ເຫຍື້ອພລາສຕິກຢ່າງຖືກວິທີ ດ້ວຍການເຊີນຊວນໃຫ້ຜູ້ປົກຄອງ ແລະ ເດັກນັກຮຽນຊ່ວຍກັນເກັບຂີ້ເຫຍື້ອພລາສຕິກທັງພາຍໃນເຮືອນ ແລະ ຊຸມຊົນແລ້ວນຳມາມອບໃຫ້ໂຮງຮຽນອາທິດລະບໍ່ຕ່ຳ ກວ່າ 20 ຢ່າງເພື່ອແລກກັບຄ່າຮຽນຂອງລູກຫຼານ ສ່ວນຂີ້ເຫຍື້ອພລາສຕິກທີ່ລວບລວມໄດ້ໂຮງຮຽນຈະນຳໄປຣີໄຊເຄິລດ້ວຍການນຳໃຊ້ເປັນວັດສະດຸກໍ່ສ້າງອາຄານຮຽນຫຼັງໃໝ່ ຫ້ອງສຸຂາ ຫຼື ທາງຍ່າງ ແລະ ອື່ນໆ.
ດັ່ງນັ້ນ ຈຶ່ງເວົ້າໄດ້ວ່າໂຄງການນີ້ໄດ້ສ້າງປະໂຫຍດໃຫ້ທັງ 2 ຝ່າຍຄື ນອກຈາກຈະຊ່ວຍປຸກລະດົມໃຫ້ຊາວບ້ານໃນຊຸມຊົນ ແລະ ເຍົາວະຊົນຮູ້ຈັກຈັດການກັບຂີ້ເຫຍື້ອພລາສຕິກ ແລ້ວ ຍັງເປັນການສົ່ງເສີມໃຫ້ເດັກ ແລະ ເຍົາວະຊົນໄດ້ເຂົ້າເຖິງການສຶກສາອີກດ້ວຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: Gallery