ຖືເປັນຄວາມໂຊກດີຂອງເຈົ້າໜ້າທີ່ຕຳຫຼວດ ແຕ່ກໍກາຍເປັນໂຊກຮ້າຍຂອງຊາຍໜຸ່ມຄົນໜຶ່ງ ທີ່ເຂົ້າມາໃຫ້ເຈົ້າໜ້າທີ່ຕຳຫຼວດຈັບເຖິງທີ່ໂດຍບໍ່ຕ້ອງອອກແຮງຫຍັງເລີຍ!.
ເຫດການນີ້ເກີດຂຶ້ນຢູ່ທີ່ສະຖານີຕຳຫຼວດເມືອງແຮັກເກັດສທາວ ລັດນິວເຈີຣຊີ ອາເມຣິກາ ເມື່ອຕຳຫຼວດສາຍກວດສາມາດຈັບແມຍິງຄົນໜຶ່ງທີ່ມີຊື່ວ່າ ມໍຣແກນ ໂດແຣນ ອາຍຸ 21 ປີໃນຂໍ້ຫາ “ເມົາແລ້ວຂັບ” ແລ້ວກໍໄດ້ພາຜູ້ກ່ຽວກັບມາສະຖານີຕຳຫຼວດ.
ພາຍຫຼັງທີ່ເຈົ້າໜ້າທີ່ສືບສວນ ແລະ ລົງບັນທຶກປະຈຳວັນແລ້ວ ນາງ ມໍຣແກນ ກໍໄດ້ໂທລະສັບຫາ ທ້າວ ເຊບາສຕຽນ ຣີ ອາຍຸ 24 ປີ (ໝູ່ຂອງນາງ) ມາຮັບນາງທີ່ສະຖານີຕຳຫຼວດ ແຕ່ປາກົດວ່າ ເຊບາສຕຽນ ກໍຖືກເຈົ້າໜ້າທີ່ກັກຕົວ ແລະ ດຳເນີນຄະດີໃນຂໍ້ຫາ ດຽວກັນກັບ ມໍຣແກນ ນັ້ນກໍຄື “ເມົາແລ້ວຂັບ” ໂດຍບໍ່ທັນຕັ້ງໂຕ ພາຍຫຼັງທີ່ເຈົ້າໜ້າທີ່ໄດ້ກິ່ນທາດເຫຼົ້າຈາກ ເຊບາສຕຽນ ສຸດທ້າຍ ທັງສອງສ່ຽວກໍຕ້ອງໂທລະສັບໄປຫາໝູ່ອີກຄົນໜຶ່ງເພື່ອມາຮັບເຂົາເຈົ້າຢູ່ທີ່ສະຖານີຕຳຫຼວດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP