ປະຫວັດສາດທີ່ຜ່ານມາຂອງດາວອັງຄານເປັນສິ່ງທີ່ນັກວິທະຍາສາດດ້ານດວງດາວໃຫ້ຄວາມສົນໃຈທີ່ສຸດ ຊຶ່ງຫຼ້າສຸດນັກວິທະຍາສາດຈາກມະຫາວິທະຍາໄລເທັກຊັສ ໃນເມືອງອອສຕິນ ແລະ ມະຫາວິທະຍາໄລອະຣິໂຊນາ ໃນອາເມຣິກາໄດ້ເປີດເຜີຍວ່າ ອາດພົບຫົນທາງທີ່ຈະໄຂປະຕູສູ່ອະດີດຂອງດາວເຄາະສີແດງ (ດາວອັງຄານ) ດວງນີ້ໄດ້.
ພາຍຫຼັງທີ່ຍານສຳຫຼວດມາຣສ ຣີຄອນເນສຊອງ ອໍຣບິເຕີ (Mars Reconnaissance Obiter-MRO) ຂອງອົງການບໍລິຫານການບິນ ແລະ ອະວະກາດແຫ່ງສະຫະລັດອາເມຣິກາ ຫຼື ອົງການນາຊາຊຶ່ງຄົ້ນພົບຊັ້ນນ້ຳກ້ອນຂະໜາດໃຫຍ່ແຫ່ງໃໝ່ ຈິ່ງສາມາດເວົ້າໄດ້ວ່ານີ້ອາດຈະເປັນເສດຊາກນ້ຳກ້ອນຂວັ້ນໂລກຈາກຍຸກບູຮານ ແລະ ອາດເປັນໜຶ່ງໃນແຫຼ່ງເກັບນ້ຳທີ່ໃຫຍ່ທີ່ສຸດຂອງດາວອັງຄານກໍເປັນໄດ້ ທີ່ສຳຄັນກໍຄື ຊັ້ນນ້ຳກ້ອນນີ້ເປັນໂຕທີ່ບັນທຶກສະພາບອາກາດທີ່ຜ່ານມາເທິງດາວອັງຄານໃນແບບດຽວກັບວົງແຫວນຕົ້ນໄມ້ທີ່ເປັນຕົວບັນທຶກສະພາບອາກາດໃນອະດີດເທິງດາວໂລກ.
ພ້ອມນີ້ ນັກວິທະຍາສາດຍັງລະບຸຕື່ມວ່າ ການສຶກສາດັ່ງກ່າວໄດ້ໃຫ້ຂໍ້ມູນທີ່ສຳຄັນກ່ຽວກັບການແລກປ່ຽນນ້ຳກ້ອນລະຫວ່າງຂວັ້ນດາວ ແລະ ເຂດໃຈກາງຂອງດາວອັງຄານ ຊຶ່ງການສຶກສາຮູບຊົງ ແລະ ອົງປະກອບຂອງຊັ້ນນ້ຳກ້ອນຂອງດາວອັງຄານກໍສາມາດບອກໄດ້ວ່າສະພາບພູມີອາກາດເມື່ອສະໄໝບູຮານໄດ້ເອື້ອອຳນວຍຕໍ່ສິ່ງມີຊີວິດທີ່ອາໄສຢູ່ ຫຼື ບໍ່?.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: thairath