ຫ້ອງການອຸດສາຫະກຳ ແລະ ການຄ້ານະຄອນຫຼວງພະບາງ ໄດ້ອອກແຈ້ງການ ສະບັບເລກທີ 041/ອຄ.ນຫຼບ, ລົງວັນທີ 18 ມີນາ 2019 ວ່າດ້ວຍການກຳນົດລາຄາສິນຄ້າ ແລະ ຄ່າບໍລິການຢ່າງສົມເຫດສົມຜົນ ເພື່ອຮອງຮັບປີທ່ອງທ່ຽວລາວ-ຈີນ 2019.
ຫ້ອງການອຸດສາຫະກຳ ແລະ ການຄ້າ ນະຄອນຫຼວງພະບາງ ຂໍແຈ້ງມາຍັງອຳນາດການປົກຄອງບ້ານ, ບໍລິສັດ, ນັກທຸລະກິດ, ເຮືອນພັກ, ໂຮງແຮມ, ຣີສອດ, ຮ້ານ ກິນດື່ມ-ຮ້ານອາຫານ, ຫ້າງຮ້ານ, ຜູ້ຮັບຜິດຊອບສະຖານທີ່ທ່ຽວຕ່າງໆ, ພະນັກງານ, ທະຫານຕຳຫຼວດ ແລະ ປະຊາຊົນບັນດາເຜົ່າ, ໃນທົ່ວນະຄອນຫຼວງພະບາງຊາບທົ່ວເຖິງກັນວ່າ ຜູ້ປະກອບການ ຫຼື ຜູ້ສະໜອງສິນຄ້າ ແລະ ຜູ້ໃຫ້ບໍລິການດ້ານຕ່າງໆ ຕ້ອງວາງລາຄາສິນຄ້າ ແລະ ຄ່າບໍລິການ ບໍ່ໃຫ້ມີການເອົາລັດເອົາປຽບໂດຍບໍ່ເໝາະສົມ ຫຼື ບໍ່ເປັນທຳຕໍ່ສັງຄົມ ໃຫ້ພາກສ່ວນທີ່ກ່ຽວຂ້ອງ ຫຼື ພາກສ່ວນລຸ່ມນີ້ກຳນົດ ແລະ ຊ່ວຍຄຸ້ມຄອງການກຳນົດລາຄາສິນຄ້າ – ການບໍລິການຕ່າງໆ ຢ່າງສົມເຫດສົມຜົນ.
- ບ້ານພັກ, ຣີສອດ ແລະ ໂຮງແຮມຕ່າງໆໃຫ້ກຳນົດຄ່າຫ້ອງພັກ ແລະ ບໍລິການເສີມຕ່າງໆກັບທຸລະກິດທີ່ກ່ຽວພັນ.
- ບັນດາຮ້ານ ອາຫານ – ຮ້ານກິນດື່ມ, ສະຖານທີ່ທ່ອງທ່ຽວຕ່າງໆ.
- ການບໍລິການຄ່າລົດໂດຍສານ, ລົດໃຫ້ເຊົ່າ ແລະ ຝາກລົດຕ່າງໆ.
- ພາກລັດ ຫຼື ຜູ້ສຳປະທານ ຄ່າເຂົ້າຊົມສະຖານທີ່ແຫຼ່ງທ່ອງທ່ຽວດ້ານວັດທະນະທຳ – ທຳມະຊາດ ແລະ ການຄຸ້ມຄອງຄ່າບໍລິການອື່ນໆ ທີ່ຕິດພັນກັບການທ່ອງທ່ຽວ.
- ທຸກໆພາກສ່ວນໃນການຈັບຈ່າຍຊື້ສິນຄ້າ ແລະ ຄ່າບໍລິການ, ການຊຳລະຄ່າສິນຄ້າ, ຄ່າບໍລິການ, ຕ້ອງຕິດລາຄາ ແລະ ໂຄສະນາເປັນເງິນກີບ.
- ຫ້າມບໍ່ໃຫ້ຂຶ້ນລາຄາສິນຄ້າ ແລະ ຄ່າບໍລິການ ທີ່ຂະແໜງການກ່ຽວຂ້ອງກຳນົດໄວ້ ບໍ່ວ່າຈະນອນຢູ່ໃນລາຍການຄວບຄຸມລາຄາ ຫຼື ບໍ່ກໍ່ຕາມ.
ຮຽບຮຽງຂ່າວ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: ຫ້ອງການອຸດສາຫະກຳ ແລະ ການຄ້ານະຄອນຫຼວງພະບາງ