ນະຄອນຫຼວງວຽງຈັນ ໄດ້ສະຫຼຸບຜົນການເຄື່ອນໄຫວໃນປີ 2017 ຜ່ານມາ ມີອາຊະຍາກຳທາງອາຍາເກີດຂຶ້ນ 2.222 ເລື່ອງ ໃນນັ້ນ, ຫຼາຍກວ່າໝູ່ແມ່ນຄະດີລັກຊັບເກີດຂຶ້ນເຖິງ 1.183 ເລື່ອງ ແລະ ປີ 2018 ອາຊະຍາກຳທາງອາຍາຕ່າງໆ ຫຼຸດລົງ 386 ກໍລະນີ ເທົ່າກັບ 16,3%, ທີ່ກອງປະຊຸມສະຫຼຸບຖອດຖອນບົດຮຽນ, ການຫັນລົງຮາກຖານການເມືອງຕິດພັນກັບການຈັດສັນ ຄວາມເປັນລະບຽບຮຽບຮ້ອຍຂອງສັງຄົມປີ 2018 ແລະ ທິດທາງວຽກງານຈຸດສຸມປີ 2019.
ກອງປະຊຸມດັ່ງກ່າວ, ຈັດຂຶ້ນວັນທີ 29 ມັງກອນ 2019 ທີ່ຫ້ອງວ່າການປົກຄອງນະຄອນຫຼວງ, ໂດຍທ່ານ ພົຈວ ບຸບຜາ ສີພົມມາ ຫົວໜ້າກອງບັນຊາການ ປ້ອງກັນຄວາມສະຫງົບ ນະຄອນຫຼວງວຽກວຽງຈັນ ໄດ້ຂຶ້ນຜ່ານບົດສະຫຼຸບການເຄື່ອນໄຫວ ວ່າ: ຜ່ານການເຄື່ອນໄຫວວຽກງານຮາກຖານຄັ້ງນີ້ ສາມາດກຳແໜ້ນເປົ້າໝາຍປະເພດຕ່າງໆ ບັນດາຫົວໜ່ວຍທຸລະກິດບັນເທິງ, ການບໍລິການທີ່ເຄື່ອນໄຫວບໍ່ຖືກຕ້ອງຕາມລະບຽບຫຼັກການ ຊອກເຫັນໄດ້ບັນດາສາເຫດເງື່ອນໄຂພາໃຫ້ເກີດຄວາມບໍ່ສະຫງົບ, ຄວາມບໍ່ເປັນລະບຽບຮຽບຮ້ອຍຂອງສັງຄົມ ຈາກການຈັດຕັ້ງປະຕິບັດບັນດາມາດຕະການຕ່າງໆ ທາງດ້ານວິຊາສະເພາະ ສາມາດແກ້ໄຂບັນດາປາກົດການຫຍໍ້ທໍ້ທີ່ພົ້ນເດັ່ນຕາມນະໂຍບາຍ 3 ຫຼຸດ ໄດ້ດີກວ່າເກົ່າ ແລະ ໄດ້ຮັບການແກ້ໄຂຫຼຸດລົງ.
ເມື່ອທຽບໃສ່ສະຖິຕິປີ 2017 ມີອາຊະຍາກຳທາງອາຍາເກີດຂຶ້ນ 2.222 ເລື່ອງ ໃນນັ້ນ, ຊີງຊັບ 218 ເລື່ອງ, ລັກຊັບ 1.183 ເລື່ອງ ແລະ ສໍ້ໂກງຊັບ 264 ເລື່ອງ ແຕ່ປີ 2018 ອາຊະຍາກຳທາງອາຍາຕ່າງໆຫຼຸດລົງ 386 ກໍລະນີ ເທົ່າກັບ 16,3% ໃນນີ້, ຄະດີຊີງຊັບຫຼຸດລົງ 108 ເລື່ອງ ເທົ່າກັບ 49,6%, ລັກຊັບພົນລະເມືອງຫຼຸດລົງ 193 ເລື່ອງ ເທົ່າກັບ 16,4%, ບຸນພະທາດຫຼວງວຽງຈັນ ແລະ ບຸນອອກພັນສາປະວໍລະນາ ສາມາດຢັບຢັ້ງອາຊະຍາກຳຫຼຸດລົງ 12 ກໍລະນີ ເທົ່າກັບ 29,26%. ນອກນີ້, ສາມາດແກ້ໄຂໄດ້ເປົ້າໝາຍຄ້າຂາຍ-ຂົນສົ່ງ ແລະ ມົ້ວສຸມຢາເສບຕິດກັກໄດ້ຫຼາຍກວ່າປີຜ່ານມາຈຳນວນ 289 ຄົນ ເທົ່າກັບ 8,9%, ອຸບັດເຫດຕາມຖະໜົນຫຼຸດລົງ 324 ກໍລະນີ ເທົ່າກັບ 21%, ຜູ້ເສຍຊີວິດຫຼຸດລົງ 13 ຄົນ ເທົ່າກັບ 5,2%, ເຫດການອັກຄີໄພຫຼຸດລົງ 10 ກໍລະນີ ເທົ່າກັບ 20%, ລວມມູນຄ່າເສຍຫາຍທັງໝົດຫຼຸດລົງ 371 ຕື້ກີບ ເທົ່າກັບ 98,2%.
ສຳລັບທິດທາງແຜນວຽກຈຸດສຸມປີ 2019 ສືບຕໍ່ຈັດຕັ້ງປະຕິບັດມາດຕະການດ້ານວິຊາສະເພາະ ແລະ ກົດໝາຍ ເພື່ອສະກັດກັ້ນ ແລະ ຕ້ານອາຊະຍາກຳທາງດ້ານອາຍາທົ່ວໄປ, ຢາເສບຕິດ, ອັກຄີໄພ, ຈັດສັນຄວາມບໍ່ເປັນລະບຽບຮຽບຮ້ອຍ, ການສັນຈອນຕາມຖະໜົນ, ສະກັດກັ້ນການເກີດອຸບັດເຫດໃຫ້ຫຼຸດລົງ ແລະ ຊອກໃຫ້ເຫັນສາເຫດປັດໄຈທີ່ພາໃຫ້ເກີດ ພ້ອມກັບວິທີການແກ້ໄຂໃຫ້ທັນເວລາ ໂດຍສະເພາະ ປີ 2019 ເປັນປີທ່ອງທ່ອງລາວ-ຈີນ ທີ່ຈະມີນັກທ່ອງທ່ຽວຕ່າງປະເທດ ເຂົ້າມາທ່ອງທ່ຽວປະເທດລາວເຮົາຫຼາຍຂຶ້ນກວ່າປີຜ່ານມາ ດັ່ງນັ້ນ, ບັນຫາຄວາມສະຫງົບຈຶ່ງເປັນບັນຫາສຳຄັນ ເພື່ອຄວາມຮັບປະກັນທຸກດ້ານ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່
ຮູບພາບຈາກ: laoedaily.com.l