ງານເທສະການອາຫານລາວ ປະຈຳປີ 2019 ມີຫຼາຍກວ່າ 180 ຮ້ານວາງສະແດງຜະລິດຕະພັນສິນຄ້າທີ່ຂຶ້ນຊື່ເປັນອາຫານປະຈໍາທ້ອງຖິ່ນ-ແຂວງ ຂອງລາວ ແລະ ຕ່າງປະເທດ ມາໂຮມຢູ່ງານນີ້ທີ່ດຽວ! ນອກນັ້ນ, ຍັງມີການເຝິກອົບຮົມການປຸງແຕ່ງອາຫານພື້ນເມືອງລາວ, ເຂົ້າໜົມຫວານ, ຂໍ້ມູນກ່ຽວກັບການເຂົ້າເຖິງແຫຼ່ງທຶນ ແລະ ການລິເລີ່ມເຮັດທຸລະກິດຂະໜາດນ້ອຍ ເຊິ່ງງານດັ່ງກ່າວ, ຈັດຂຶ້ນຢູ່ທີ່ສວນເຈົ້າອະນຸວົງ ບ້ານວັດຈັນ ເມືອງຈັນທະບູລີ ນະຄອນຫຼວງວຽງຈັນ, ເລີ່ມແຕ່ວັນທີ 23-26 ມັງກອນ 2019, ເວລາ 8:00-22:00 ໂມງ.
ເທສະການດັ່ງກ່າວ, ຈັດຂຶ້ນໂດຍສູນກາງສະຫະພັນແມ່ຍິງລາວ ຮ່ວມກັບສະມາຄົມນັກທຸລະກິດແມ່ຍິງລາວ ໂດຍການເປັນປະທານຂອງທ່ານນາງ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ ໂດຍທ່ານໄດ້ກ່າວວ່າ: ເທສະການອາຫານລາວ ໄດ້ຈັດຂຶ້ນທຸກໆປີ ເພື່ອປະກອບສ່ວນອະນຸລັກຮີດຄອງປະເພນີ ແລະ ວັດທະນະທຳອັນດີງາມອັນເປັນເອກະລັກຂອງຄົນລາວ ໄວ້ຄູ່ຊາດລາວຕະຫຼອດໄປ ທັງເປັນການເຜີຍແຜ່ສິ່ງຍອດຍິ່ງຂອງລາວ ຕໍ່ນັກທ່ອງທ່ຽວໃນອາຊຽນ ແລະ ໃນໂລກ; ເພື່ອສ້າງໂອກາດໃຫ້ແມ່ຍິງ ຜູ້ປະກອບການຂະແໜງການປຸງແຕ່ງອາຫານຢູ່ທ້ອງຖິ່ນ ຕ່າງແຂວງ ແລະ ຜູ້ລົງທຶນ ສ້າງໂອກາດໃຫ້ແມ່ຍິງໄດ້ສະແດງຄວາມສາມາດ ຫົວຄິດປະດິດສ້າງໃນການປຸງແຕ່ງອາຫານລາວ; ສົ່ງເສີມແມ່ຍິງຜູ້ປະກອບການຂະແໜງການຜະລິດກະສິກຳ-ຫັດຖະກຳ ແລະ ອຸດສາຫະກຳປຸງແຕ່ງ ສ້າງຜະລິດຕະພັນຂອງຕົນໃຫ້ເປັນສິນຄ້າຕອບສະໜອງຄວາມຕ້ອງການຂອງຕະຫຼາດ ເພື່ອໃຫ້ບັນລຸເປົ້າໝາຍຫຼຸດພົ້ນຄວາມທຸກຍາກ.
ໃນງານຄັ້ງນີ້, ມີຮ້ານອາຫານຈໍານວນ 140 ຮ້ານ ຮ້ານຫັດຖະກຳ-ກະສິກຳ 20 ຮ້ານ, ຈາກປະເທດອາຊຽນ ແລະ ສະຖານທູດ 2 ຮ້ານ, ຈາກປະເທດໄທ 18 ຮ້ານ, ຄາດວ່າຈະມີຍອດເງິນໝູນວຽນ 4 ຕື້ກີບ ແລະ ຈະສາມາດດຶງດູດມວນຊົນເຂົ້າທ່ຽວຊົມ 80.000 ຄົນ. ນອກນີ້ ,ພາຍໃນງານຈະມີການເຝິກອົບຮົມການປຸງແຕ່ງອາຫານພື້ນເມືອງລາວ ເຂົ້າໜົມຫວານ ຄວາມຮູ້ກ່ຽວກັບການເຂົ້າເຖິງແຫຼ່ງທຶນ ແລະ ການລິເລີ່ມເຮັດທຸລະກິດຂະໜາດນ້ອຍ.
ຮຽບຮຽງ, ຮູບພາບໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: ໜັງສືພິມວຽງຈັນໃໝ່