ກະຊວງປ້ອງກັນປະເທດ ສປປ ລາວ ໄດ້ເຊັນສັນຍາກັບບໍລິສັດລັດວິສາຫະກິດ ໂລສອາບາໂລ ເອັກສະປອດ ປະເທດລັດເຊຍ ຊື້ເຮືອບິນຝຶກແອບ-ສູ້ຮົບຍັກກ 130 ຈໍານວນ 4 ລໍາ ໂດຍມີພິທີມອບ-ຮັບເຮືອບິນດັ່ງກ່າວ, ໃນວັນທີ 21 ມັງກອນ 2019, ທີ່ເດີ່ນບິນທະຫານ 703 ນະຄອນຫລວງວຽງຈັນ. ຕາງໜ້າຝ່າຍລາວໃຫ້ກຽດຂຶ້ນຮັບໂດຍ ທ່ານ ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດ ແລະ ຕາງໜ້າຝ່າຍລັດເຊຍ ທ່ານ ອາແຈັກຊານເດີ ເມລິກດາວີດັອບ ຕົວແທນບໍລິສັດໂລສອາບາໂລ ເອັກສະປອດ ( ROSOBORON EXPORT ) ເປັນກຽດເຂົ້າຮ່ວມຂອງ ພົນເອກ ຈັນສະໝອນ ຈັນຍາລາດ ລັດຖະມົນຕີ ກະຊວງປ້ອງກັນປະເທດ, ທ່ານ ມີຄາອິນ ວາລາດີເມຍໂຣວິກ ບາລານນັອບ ເອກອັກຄະລັດຖະທູດຜູ້ມີອໍານາດເຕັມແຫ່ງສາທາລະນະລັດ ສະຫະພັນລັດເຊຍ ປະຈໍາລາວ.
ພົນຕີ ປະສິດ ທ່ຽງທໍາ ຮອງຫົວໜ້າກົມໃຫຍ່ເສນາທິການກອງທັບ ກະຊວງປ້ອງກັນປະເທດມີຄໍາເຫັນວ່າ: “ການມອບ-ຮັບເຮືອບິນຝຶກແອບ-ສູ້ຮົບຍັກ 130 ຈໍານວນ 4 ລໍາໃນຄັ້ງນີ້, ນອນຢູ່ໃນແຜນການຮ່ວມມືດ້ານເຕັກນິກການທະຫານ ແລະ ການຊ່ວຍເຫຼືອເຊິ່ງກັນ ແລະ ກັນ ທີ່ມີມູນເຊື້ອຍາວນານ, ການຈັດຕັ້ງປະຕິບັດສັນຍາການຈັດຊື້ເຮືອບິນຝຶກແອບ-ສູ້ຮົບຢັກ 130 ຈໍານວນ 4 ລໍາໄດ້ດໍາເນີນມາດ້ວຍຜົນສໍາເລັດ. ການໄດ້ຮັບເຮືອບິນຝຶກແອບຄັ້ງນີ້, ຈະເປັນການປະກອບອັນສໍາຄັນໃນການຍົກສູງລະດັບຄວາມສາມາດໃນການປະຕິບັດໜ້າທີ່ຂອງກອງທັບອາກາດ; ກອງທັບປະຊາຊົນລາວໃຫ້ສູງຂຶ້ນ ທັງເປັນການສ້າງຄວາມເຂັ້ມແຂງ ແລະ ເພີ່ມປະສິດທິພາບໃຫ້ແກ່ວຽກງານປັບປຸງກໍ່ສ້າງກອງທັບ ໃນການປົກປັກຮັກສາເຂດນໍ້າແດນດິນ ແລະ ນ່ານຟ້າຂອງລາວໄວ້ໄດ້ຢ່າງຄວາມໝັ້ນຄົງ”.
ພ້ອມນັ້ນ, ທ່ານໄດ້ກ່າວຄໍາໝັ້ນສັນຍາວ່າ: “ຈະເອົາໃຈໃສ່ຊີ້ນໍາການອົບຮົມ ແລະ ຝຶກແອບ ເພື່ອນໍາໃຊ້ເຮືອບິນຝຶກແອບ-ສູ້ຮົບຍັກ 130 ຈໍານວນ 4 ລໍານີ້ ໃຫ້ມີປະສິດທິຜົນສູງ, ເອົາໃຈໃສ່ບົວລະບັດຮັກສາຖືກຕ້ອງຕາມຫຼັກການດ້ານເຕັກນິກ ເພື່ອຮັບປະກັນການນໍາໃຊ້ເຮືອບິນໃຫ້ຍາວນານ ພ້ອມທັງເອົາໃຈໃສ່ບໍາລຸງ ແລະ ກໍ່ສ້າງບຸກຄະລາກອນ, ນັກວິຊາການ ເພື່ອຮອງຮັບການນໍາໃຊ້ເຮືອບິນດັ່ງກ່າວນີ້ໃຫ້ເກີດປະໂຫຍດສູງສຸດ”.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Lao National Radio