ທະນາຄານໂລກ ແນະນຳໃຫ້ ສປປ ລາວ ຄວນລົງທຶນໃສ່ດ້ານການພັດທະນາມະນຸດ ເພື່ອເພີ່ມປະສິດທິພາບ ເນື່ອງຈາກວ່າຈະເປັນການສະໜັບສະໜູນການຂະຫຍາຍຕົວຂອງເສດຖະກິດໃນໄລຍະຍາວ ແລະ ເຮັດໃຫ້ຄວາມທຸກຍາກຫຼຸດລົງ. ຂະນະທີ່ທຽບໃສ່ບັນດາປະເທດທີ່ມີລະດັບລາຍຮັບໃກ້ຄຽງເຫັນວ່າຍັງຕໍ່າກວ່າເຂົາເຈົ້າຫຼາຍ.
ທ່ານ ນິໂຄລາ ພອນທາລາ ( Nicola Pontara ) ຫົວໜ້າຫ້ອງການທະນາຄານໂລກ ປະຈໍາ ສປປ ລາວ ກ່າວວ່າ: “ການຂະຫຍາຍຕົວຂອງເສດຖະກິດຢູ່ ສປປ ລາວ ຍັງເຂັ້ມແຂງ ເຊິ່ງລັດຖະບານມີຜົນງານໂດດເດັ່ນຫຼາຍຢ່າງໃນການປະຕິຮູບ ໂດຍສະເພາະການເກັບລາຍຮັບ, ນະໂຍບາຍການຮັດກຸມດ້ານການເງິນງົບປະມານໄດ້ມີການສືບຕໍ່ ເຖິງວ່າຈະຖືກຜົນກະທົບຈາກໄພພິບັດທໍາມະຊາດກໍຕາມ. ເມື່ອເບິ່ງໄປຂ້າງໜ້າ, ສປປ ລາວ ຄວນລົງທຶນໃສ່ການພັດທະນາດ້ານຊັບພະຍາກອນມະນຸດ ເພື່ອເພີ່ມຜະລິດຕະພາບ ໂດຍຖືເປັນກຸນແຈສຳຄັນຕໍ່ການສະໜັບສະໜູນການຂະຫຍາຍຕົວຂອງເສດຖະກິດໃນໄລຍະຍາວ ແລະ ເຮັດໃຫ້ຄວາມທຸກຍາກຫຼຸດລົງຕື່ມອີກ”.
ອີງຕາມບົດລາຍງານການຕິດຕາມເສດຖະກິດຂອງ ສປປ ລາວ ສະບັບຫຼ້າສຸດຂອງ ທະນາຄານໂລກທີ່ເຜີຍແຜ່ໃນວັນທີ 18 ມັງກອນ 2019 ທີ່ນະຄອນຫຼວງວຽງຈັນ ໃຫ້ຮູ້ວ່າ: ການຂະຫຍາຍຕົວເສດຖະກິດໃນ ສປປ ລາວ ຄາດວ່າຈະເຕີບໂຕໃນລະດັບ 6,5% ໃນປີ 2018 ຫຼຸດລົງຈາກ 6,9% ໃນປີ 2017 ເຊິ່ງມາຈາກຫຼາຍປັດໄຈພາຍໃນ ແລະ ພາຍນອກ ເຊັ່ນ: ຜົນກະທົບທາງລົບທີ່ເກີດຈາກບັນຫາໄພນໍ້າຖ້ວມໃນໄລຍະຜ່ານມາ ທີ່ໄດ້ສ້າງຄວາມເສຍຫາຍຢ່າງກ້ວາງຂວງ.
ບົດລາຍງານດັ່ງກ່າວ, ເນັ້ນໜັກໃຫ້ເຫັນຄວາມສໍາຄັນຂອງການລົງທຶນໃສ່ການສ້າງຄົນ, ເດັກທີ່ເກີດຢູ່ ລາວ ໃນປັດຈຸບັນ, ມີພຽງ 45% ຂອງທ່າແຮງເຕັມສ່ວນ ທີ່ສາມາດປະກອບສ່ວນຜະລິດຕະພາບໃຫ້ສັງຄົມໄດ້ ຫາກກຸ່ມຄົນເຫຼົ່ານັ້ນໄດ້ຮັບບໍລິການດ້ານການສຶກສາ ແລະ ສຸຂະພາບຢ່າງຄົບຖ້ວນ ເມື່ອທຽບໃສ່ບັນດາປະເທດທີ່ມີລະດັບລາຍຮັບໃກ້ຄຽງເຫັນວ່າ: ບັນຫາເດັກເຕ້ຍຢູ່ລາວ ຍັງສູງລື່ນເຂົາເຈົ້າ, ດ້ານອັດຕາການລອດຊີວິດຂອງເດັກເກີດໃໝ່ຫາອາຍຸ 5 ປີ ກໍເຫັນວ່າຕໍ່າກວ່າເຂົາເຈົ້າ, ທຽບໃສ່ຄຸນນະພາບຂອງການຮຽນຮູ້ເຫັນວ່າ: ເດັກນ້ອຍລາວ ສືບຕໍ່ຮຽນໃນໂຮງຮຽນໂດຍສະເລ່ຍພຽງແຕ່ 6,4 ປີ ເຖິງວ່າມີຈໍານວນປີສະເລ່ຍສະສົມຂອງການຮຽນໃນໂຮງຮຽນ ຈົນກວ່າເດັກຈະຮອດອາຍຸ 18 ປີ ຈະຢູ່ທີ່ 10,8 ປີກໍຕາມ.
ພ້ອມນັ້ນ, ການປັບປຸງຜົນໄດ້ຮັບດ້ານການພັດທະນາຊັບພະຍາກອນນາມະນຸດ ໃນວຽກງານກການສຶກສາ ແລະ ສາທາລະນະສຸກໃນລາວ ຕ້ອງປະສົມປະສານບັນດາກິດຈະກໍາແກ້ໄຂສະເພາະຂະແໜງການ ແລະ ການປະຕິຮູບລະບົບລວມ ຕົວຢ່າງ: ການລົງທຶນເພີ່ມຂຶ້ນ ແລະ ມີປະສິດທິພາບກວ່າເກົ່າ, ໃສ່ໃຈສຸຂະພາບຂອງແມ່ ແລະ ເດັກ ກໍ່ຄືໃສ່ໃຈຄຸນນະພາບການສຶກສາ ນັບແຕ່ການສຶກສາກ່ອນໄວຮຽນ ເພາະຈະຊ່ວຍເພີ່ມທ່າແຮງໃຫ້ຄົນຮຸ່ນໃໝ່ມີການຈະເລີນເຕີບໂຕ, ມີສຸຂະພາບແຂງແຮງ ແລະ ມີປະສິດທິພາບສູງ. ນະໂຍບາຍດັ່ງກ່າວ, ຍັງຄຽງຄູ່ກັບການປະຕິຮູບດ້ານສະຖາບັນ ເພື່ອປັບປຸງການບໍລິການສຶກສາ ແລະ ສາທາລະນະສຸກ ຈະຊ່ວຍຊຸກຍູ້ເສດຖະກິດຂອງປະເທດໃນໄລຍະຍາວ.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: laoedaily.com.la