ເມື່່ອເວົ້າເຖິງຂີ້ເຫຍື້ອຊະຊາຍຢູ່ຕາມສະຖານທີ່ຕ່າງໆ ຜູ້ຊົມໃຊ້ຍັງຖືເບົາໃນການເກັບມ້ຽນເສດຂີ້ເຫຍື້ອຂອງຕົນ ແລະ ເປັນບັນຫາທີ່ຍັງເກີດຂຶ້ນເປັນປະຈໍາ ແລ້ວກໍກາຍເປັນປະເດັນທີ່ມີຫຼາຍຫາງສຽງຫຼາຍແນວຄິດໄດ້ສະແດງອອກມາ, ຜູ້ໃຊ້ເຟສບຸກສ່ວນຕົວ Sangkhane Phachanthavong ໄດ້ເຜີຍແຜ່ວີດີໂອ ແລະ ຮູບພາບຂີ້ເຫຍື້ອຢັ່ງຢາຍຕາມເດີ່ນທີ່ມີການຈັດງານບຸນປະເພນີປະຈໍາປິ ໃນວັນທີ 11-12 ມັງກອນ 2019 (ວັນຈັດງານບຸນ), ທີ່ບ້ານ ໄຊສະຫວ່າງ ເມືອງ ຈັນທະບູລີ ນະຄອນຫຼວງວຽງຈັນ ອີງຕາມສັງຄົມບ້ານເມືອງຖືວ່າສັງຄົມລາວຍັງມີພຶດຕິກໍາແບບນີ້ເກີດຂຶ້ນຫຼາຍ ເຊັ່ນ: ງານບຸນປະເພນີປະຈໍາປີແຕ່ລະທ້ອງຖິ່ນ, ຄອນເສີດຫາລາຍໄດ້, ງານບຸນ ຫຼື ເທດສະການຕ່າງໆ ໃນລະດັບຊາດ, ແຂວງ, ເມືອງ ແລະ ບ້ານຕ່າງໆ ຍັງປາສະຈາກບັນຫານີ້ບໍ່ໄດ້ເທື່ອ ຍາມໃດກໍມີຫາງສຽງຈົ່ມວ່າໄປຕ່າງໆ ນາໆ.
Sangkhane Phachanthavong ໄດ້ເຜີຍແຜ່ຮູບພາບ ແລະ ວີດີໂອ ໃນເວລາ 8:54 ໂມງ ວັນທີ 13 ມັງກອນ 2019 ວ່າ: “ບຸນປະເພນີ ຫຼື ບຸນຫາລາຍໄດ້ ຈະມີ 3 ພາກສ່ວນຄື: ປະຊາຊົນຜູ້ເຂົ້າຮ່ວມ, ຜູ້ຈັດງານ, ເມືອງ. ໃນຮີດຄອງປະເພນີບ້ານເຮົາຈະເຫັນວ່າການເຮັດບຸນຕ່າງໆ ຈະໃຊ້ຖົງຢາງປຣາສຕິກ ກິນຢູ່ໃສກໍໍຖີ້ມຢູ່ຫັນ ຫຼື ຖີ້ມລົງກາງງານເລີຍ ແລ້ວຜົນອອກມາໃນຍາມເຊົ້າຈະເຫັນຂີ້ເຫຍື້ອຢູ່ຕາມເດີ່ນ ແນ່ນອນຄົນສ່ວນໜຶ່ງຕ້ອງບອກວ່າ: “ແລ້ວບຸນເຂົາກໍມີຄົນມາມ້ຽນເດ! ຈະເປັນເລື່ອງໃຫຍ່ເຮັດຫຍັງ?, ເຂົາກິນເຂົາຈ່າຍ ຫຼື ຈ່າຍຄ່າສະຖານທີ່ແລ້ວ ເຈົ້າຂອງສະຖານທີ່ຕ້ອງມ້ຽນຢູ່ແລ້ວ!” ນັ້ນເປັນເລື່ອງທີ່ເຮົາເຄີຍປະຕິບັດມາຄືວ່າ: “ຜູ້ທີ່ເຂົາໄປຮ່ວມງານກິນແລ້ວກໍຖີ້ມລົງທີ່ນັ້ນເລີຍໂດຍທີ່ບໍ່ຄິດຜິດຫຍັງ ຫຼື ບໍ່ມີໃຜເອົາຜິດຫຍັງ ເພາະຄິດວ່າມັນມີຄົນມາມ້ຽນຢູ່ແລ້ວ”. ນັ້ນເປັນຄວາມເຊື່ອທີ່ເຄີຍມີມາ ແຕ່ຄໍາຖາມມີຢູ່ວ່າ: ເຮົາຈະເຮັດແບບນີ້ໄປຕະຫຼອດບໍ?, ເຮົາບໍ່ສັງເກດເບິ່ງຕ່າງປະເທດແດ່ບໍເພີ່ນເຮັດແນວໃດ ບໍລິຫານຈັດການແນວໃດ?, ຜູ້ຮັບຜິດຊອບຈັດງານມີການຈັດການແນວໃດກັບຂີ້ເຫຍື້ອ?, ຜູ້ທີ່ເຂົ້າຮ່ວມງານ ຫຼື ຜູ້ຊົມໃຊ້ຖົງຢາງປຣາສຕິກເຮັດແນວໃດ?, ທາງເມືອງ-ແຂວງຄວນມີລະບຽບກົດໝາຍອອກມາບັງຄັບໃຊ້ໃຫ້ຜູ້ຈັດງານຫາລາຍໄດ້ບໍ?. ນີ້ກໍເປັນອີກຄໍາຖາມໜຶ່ງ, ຂ້າພະເຈົ້າເຊື່ອວ່າເປັນເລື່ອງທີ່ພວກເຮົາຄວນເບິ່ງນໍາກັນ.
“ໃນແນວຄິດການແກ້ໄຂສໍາລັບຂ້າພະເຈົ້າຄິດວ່າ: ຕ້ອງເວົ້າເຖິງຈິດສໍານຶກຂອງຜູ້ເຂົ້າຮ່ວມງານເປັນຫຼັກ ຖ້າຜູ້ເຂົ້າຮ່ວມງານກິນແລ້ວຕ້ອງເກັບໄວ້ເອົາໄປຖີ້ມຢູ່ບ່ອນທີ່ເພີ່ນຈັດສັນໄວ້ ຖ້າຫາກວ່າຜູ້ຈັດງານບໍ່ມີບ່ອນຖີ້ມຂີ້ເຫຍື້ອ, ບໍ່ມີການບໍລິຫານຈັດການຖົງຢາງປຣາສຕິກ, ຖ້າທາງເມືອງບໍ່ມີລະບຽບກົດໝາຍອອກມາວ່າຄວນເປັນແບບໃດ, ຖ້າເກີດຂື້ນແລ້ວຈະເຮັດແນວໃດ ຈະຖືກປັບໃໝ ຫຼື ວ່າຈະເປັນແບບນີ້ຕະຫຼອດໄປ ແລ້ວສິ່ງທີ່ເກີດຂຶ້ນຈະເປັນແນວໃດ? ຖ້າມີລົມຫົວກຸດມາ, ລົມພາຍຸ ຄິດເບິ່ງວ່າຖົງຢາງຈະຢູ່ຄືເກົ່າບໍ່ ມັນອາດຈະບໍ່ມີ ແຕ່ມັນປີວຢັ່ງຢາຍໄປທຸກບ່ອນ. ມັນເຖິງເວລາແລ້ວທາງພາກລັດຕ້ອງມີກົດລະບຽບກົດໝາຍອອກມາ ເພື່ອບັງຄັບໃຊ້, ຜູ້ຈັດງານຕ້ອງມີການບໍລິຫານຈັດການທີ່ດີ. ປະຊາຊົນ ແລະ ລູກຫຼານທີ່ເຝິກຝົນຮຽນມາກໍ່ຕ້ອງປະຕິບັດຕົວຈິງຕໍ່ສັງຄົມ. ນັ້ນບໍ່ໝາຍຄວາມວ່າໄດ້ຮຽນມາແລ້ວ, ອາຈານສອນດີແລ້ວ ພໍ່ແມ່ພັດອີກແນວໜຶ່ງມັນກໍ່ເກີດຄວາມສັບສົນຂຶ້ນມາໃນການຮຽນ ແລະ ປະຕິບັດຕົວຈິງ ເຊິ່ງຂ້າພະເຈົ້າເຊື່ອວ່າ ຖ້າຫຼາຍພາກສ່ວນເອົາໃຈໃສ່ຊ່ວຍກັນເປັນເຈົ້າການຮ່ວມກັນ ເຊື່ອວ່າບັນຫານີ້ສາມາດແກ້ໄຂໄດ້ “, ທິດສີ ກ່າວ.
ພາຍຫຼັງທີ່ຮູບພາບ ແລະ ວີດີໂອໄດ້ເຜີຍແຜ່ຜ່ານສື່ອອນລາຍນ໌ (ເຟສບຸກ) ຜູ້ຊົມໃຊ້ສື່ດັ່ງກ່າວ, ເຂົ້າມາສະແດງຄວາມຄິດເຫັນຕ່າງໆ ນາໆ ໂດຍມີທັງຄົນເຫັນດີ ແລະ ບໍ່ເຫັນດີເປັນຈໍານວນຫຼວງຫຼາຍ. ທີມງານລາວໂພສ ໄດ້ຄັດຈ້ອນເອົາບາງຄວາມຄິດທີ່ຄິດວ່າມັນອາດຈະເຮັດໃຫ້ພາກສ່ວນກ່ຽວຂ້ອງຮັບຮູ້ ແລະ ໃຫ້ທ່ານໄດ້ອ່ານ ເຊັ່ນວ່າ:
ແນວດໃດກໍດີ, ບັນຫາດັ່ງກ່າວອັນໄດ້ເກີດຂຶ້ນມາຍາວນານ ແລະ ຍັງບໍ່ມີວີ່ແວວວ່າຈະມີການແກ້ໄຂໄດ້ຢ່າງຂາດຮອຍ ດັ່ງນັ້ນ, ຮຽກຮ້ອງໃຫ້ພາກສ່ວນທີ່ກ່ຽວຂ້ອງເອົາໃຈໃສ່ບັນຫາດັ່ງກ່າວ ຄວນມີການອອກມາດຕະການ ຫຼື ລະບຽບກົດໝາຍ ເພື່ອບັງຄັບໃຊ້ ກ່ຽວກັບການຖີ້ມຂີ້ເຫຍື້ອໃນສະຖານທີ່ຕ່າງໆ ເພື່ອຄວາມເປັນລະບຽບ ແລະ ຄວາມສະອາດງາມຕາຂອງບ້ານເມືອງໃຫ້ຈົບງາມ. ທັງນີ້ທັງນັ້ນ, ທຸກຄົນຕ້ອງເປັນເຈົ້າການຕົນເອງ, ມີຈິດສໍານຶກຮ່ວມກັນ ເມື່ອມີການນໍາໃຊ້ແລ້ວກໍຕ້ອງເກັບມ້ຽນຂີ້ເຫຍື້ອຂອງຕົນນໍາໄປຖີ້ມບ່ອນທີ່ກໍານົດໄວ້.
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນ, ຮູບພາບຈາກ: Sangkhane Phachanthavong