ປະທານາທິບໍດີ ສີ ຈິ້ນ ຜິງ ພ້ອມສະໜັບສະໜູນ ຄິມ ຈອງ ອຶນ ຜູ້ນໍາເກົາຫຼີເໜືອໃນການພົບກັບ ໂດນັລ ທຣໍ້າ ປະທານາທິບໍດີ ອາເມລິກາ ເປັນຄັ້ງທີ 2, ດ້ານຜູ້ນໍາເກົາຫຼີເໜືອໃຫ້ການສັນຍາໃນເລື່ອງການປົດອາວຸດນິວເຄຣຍ ແລະ ການພະຍາຍາມເຈລະຈາຄັ້ງໃໝ່ກັບອາເມລິກາ ເພື່ອໃຫ້ຜົນບັນລຸເປັນຮູບປະທໍາ ເຊິ່ງສະຖານທີ່ຂອງທັງສອງປະເທດຈະພົບກັນນັ້ນ ມີລາຍງານວ່າມີຄວາມເປັນໄປໄດ້ທີ່ສຸດວ່າຈະນໍາໃຊ້ສະຖານທີ່ຈັດກອງປະຊຸມຄັ້ງ 2 ນີ້ ອາດຢູ່ທີ່ບາງກອກ ປະເທດໄທ, ນະຄອນຫຼວງຮ່າໂນຍ ຫຼື ເກາະຮາ ວາຍ ກໍ່ເປັນໄປໄດ້.
ສໍານັກຂ່າວຕ່າງປະເທດລາຍງານຈາກ ນະຄອນຫຼວງປັກກິ່ງ ປະເທດຈີນ ໃນວັນທີ 10 ມັງກອນ 2018 ວ່າ ສໍານັກຂ່າວຊິນຫົວຂອງຈີນ ແລະ ສໍານັກຂ່າວກາງປຽງຍາງຂອງເກົາຫຼີ ລາຍງານໃນເວລາທີ່ໄລ່ເລ່ຍກັນ ວ່າ ຄິມ ຈອງ ອຶນ ຜູ້ນໍາສູງສຸດຂອງເກົາຫຼີເໜືອ ສໍາເລັດໃນການຢ້ຽມຢາມ ສປ ຈີນ ແຕ່ວັນທີ 7 ມັງກອນ ເຊິ່ງໃນລະຫວ່າງການຫາລືກັບປະທານາທິບໍດີ ຈີນ, ສີ ຈິ້ນ ຜິງ ໄດ້ກ່າວໃນຕອນໜຶ່ງວ່າ: “ລັດຖະບານຈີນພ້ອມສະໜັບສະໜູນການປະຊຸມຄັ້ງທີ2 ລະຫວ່າງຜູ້ນໍາເກົາຫຼີເໜືອ ກັບຜູ້ນໍາອາເມລິກາ ແຕ່ການພົບກັນຄັ້ງນີ້, ຄວນມີການບັນລຸຜົນຢ່າງເປັນຮູບປະທໍາໃນເລື່ອງການປົດອາວຸດນີວເຄຣຍໃນພື້ນມະຫາສະໝຸດເກົາຫຼີ”.
ຂະນະດຽວກັນ ສີ ຈິ້ນ ຜິງ ໄດ້ກ່າວຕື່ມວ່າ: “ທັງສອງປະເທດຄວນພົບກັນຢູ່ເຄິ່ງທາງ”, ດ້ານຜູ້ນໍາເກົາຫຼີເໜືອກ່າວວ່າ: “ເກົາຫຼີເໜືອຈະຍຶດໝັ້ນຕາມແນວທາງປະຕິບັດ ເພື່ອໃຫ້ມະຫາສະໝຸດເກົາຫຼີເປັນພື້ນທີ່ປອດອາວຸດນີວເຄຣຍ ແລະ ການຜ່ອນຄາຍຂໍ້ຂັດແຍ່ງທາງການເມືອງໃນມະຫາສະໝຸດເກົາຫຼີ ດ້ວຍການເຈລະຈາຢ່າງສັນຕິ ເພື່ອນໍາຜົນໃຫ້ເກີດເປັນຮູບປະທໍາຕາມຄວາມຄາດຫວັງຂອງປະຊາຊົນໃນໂລກ”. ຄໍາເວົ້າຂອງຜູ້ນໍາເກົາຫຼີເໜືອ ເພີ່ມຄວາມເປັນໄປໄດ້ວ່າການພົບປະຫາລືຄັ້ງທີ 2 ກັບຜູ້ນໍາອາເມລິກາ ຈະເກີດຂຶ້ນ ເຖິງຍັງບໍ່ມີຄວາມຊັດເຈນກ່ຽວກັບການປະຊຸມຈະເກີດຂຶ້ນເດືອນປີໃດ ແຕ່ມີລາຍງານວ່າ: “ອາດຈະເປັນທີ່ບາງກອກ ປະເທດໄທ, ນະຄອນຫຼວງຮ່າໂນຍ ແລະ ເກາະຮາວາຍ ເປັນບ່ອນມີຄວາມເປັນໄດ້ຫຼາຍທີ່ສຸດວ່າຈະມີການຂໍໃຊ້ເປັນສະຖານທີ່ຈັດກອງປະຊຸມຄັ້ງ 2 ນີ້”.
ຂ່າວບອກຕື່ມວ່າ ໃນການຢ້ຽມຢາມຂອງຜູ້ນໍາເກົາຫຼີ ກັບ ຈີນ ເປັນທີ່ໜ້າສັງເກດການວ່າ ຈີນ ກັບ ເກົາຫຼີເໜືອ ເກັບຂໍ້ມູນເປັນຄວາມລັບຫຼາຍກວ່າປົກກະຕິ ໂດຍມີການຄ່ອຍເປີດເຜີຍລາຍງານຫຼັງ ຄິມ ແລະ ຄະນະເດີນທາງອອກຈາກ ນະຄອນຫຼວງປັກກິ່ງດ້ວຍລົດໄຟ.
Chinese President #XiJinping and #DPRK leader Kim Jong Un held talks, reaching important consensus https://t.co/fs5tW0C8Vw pic.twitter.com/rS8wUecWed
— CGTN (@CGTNOfficial) January 10, 2019
ຮຽບຮຽງໂດຍ: ໃບບົວ ຈັນທະລັງສີ
ແຫຼ່ງຂໍ້ມູນຈາກ: dailynews.co.th
ຮູບພາບຈາກ: voicetv.co.th